The Definitive Guide to Living in the Capital , Cairo , Egypt

فايكنج – Viking

فايكنج: أكلات أمريكية وتيكس ميكس ضخمة فى مدينة نصر

  • 70 شارع عمر بن الخطاب
  • عالمي
  • 0222919219,0222919972,0222916018
  • 10 صباحًا: 2 صباحًا
تم التقييم بواسطة
Angie El Batrawy
قيم
قيم الآن
فايكنج: أكلات أمريكية وتيكس ميكس ضخمة فى مدينة نصر

كثير من أصحابنا رشحوه لنا وإحنا
بـ نلف بعربيتنا بـ ندور على مكان نأكل فيه بعد يوم مرهق فى الشمس الحارقة، لفينا
كثير جدًا والمرور فى شوارع مدينة نصر كان زحمة وتنفسنا الصعداء أول ما وصلنا، لكن
كل ده راح فجأة لما شفنا المبنى الضخم المهيب بتاع مطعم «فايكنج – Viking».

المبنى مكون من دورين ولونه أبيض
وفيه لوجو عليه رمز الفايكنج، الدور اللى فوق كان مقفول وقت زيارتنا لكن الجرسون
قال لنا أن بـ يعملوا فيه حفلات، وأنت داخل فيه منطقة مفتوحة بالخارج فى الجنينة
للجلوس ومنطقة ثانية بالداخل، المفتوحة لغير المدخنين والمغلقة العكس، المكان محاط
بزجاج فـ تقدر تستمتع بمنظر الشارع، الديكور رائع وجو المكان حلو جدًا، الجرسونات
شعلة نشاط ومتابعينك باستمرار.

قعدنا فى المكان اللى جوه، قبل ما
نختار من المنيو سألنا الجرسون لو حابين نجرب نأكل أطباق من منيو “شواية
فايكنج” اللى بـ يعملوها بس كل يوم جمعة وسبت، مشويات شرقية من كفتة وكباب..
إلخ، الصراحة المنيو الأساسية كانت مغرية جدًا وكنا عاوزين نجرب الأطباق الغريبة
دي.

الأكل هناك فيه مشويات وأصناف
مقلية، لكن المقلى كثير برضه، حتى أن عندهم حاجة لطيفة جدًا البطاطس المهروسة
معمولة على شكل كرات بالبيض والبقسماط ومقلية فى الزيت، فـ تأكل طبقة مقرمشة من
بره والبطاطس المهروسة الطرية هـ تذوقها من جوه، لمنيو لوحدها فتحت نفسنا بس برضه
طلبنا مقبلات فايكنج سامبلر (52.99 جنيه) وده عبارة عن طبق كبير فيه عينات من 4 مقبلات:
بافلو وينجز، جاكيت بطاطس وأصابع الموتزاريلا وسبرينج رولز بالخضار ومعاها 3 أنواع
صوص. وكمان طلبنا شوربة طماطم (14.99 جنيه) وطلبنا يضاف عليها كريمة.

الشوربة جاءت كميتها كبيرة وساخنة
والطعم كان وهمى، بس ما قدرناش نكملها، برضه المقبلات كانت ضخمة ومتنوعة، كمية
المقليات بالنسبة لنا كانت كثيرة لكن ما ننكرش أنها كانت لذيذة، وبرضه ما عرفناش
نخلصها كلها.

اكتشفنا بعد كده أن «فايكنج»
كرماء فى كميات الأكل اللى بـ يقدموها، واللى أكد لنا كده لما طلبنا الأطباق
الرئيسية، اختارنا هوبو تشيكن (58.99 جنيه) وفايكنج ميكس جريل (74.99 جنيه) الهوبو
تشيكن عبارة عن صدور فراخ عليها صوص أبيض وزيتون وبيف بيكون وفلفل ألوان وبـ ينزل
معاها خضار سوتيه وكرات البطاطس المهروسة اللى ذكرناها قبل كده، الأكل بصفة عامة
كله تحفة فى الطعم والتقديم والتخديم عليه، الكميات ضخمة وبقينا منها برضه أخذناه
تيك أواي، بس استمتعنا جدًا به.

وإحنا لسه بـ نأخذ نفسنا ويا دوب
أخذوا الأطباق، لقينا الجرسون جاء لنا يروج للمشروبات والحلويات وبـ يعطينا منيو
علشان نطلب حاجة ثانية، كان الموضوع تسويق أكثر ما منه خدمة ودي حاجة ضايقتنا
شوية، طلبنا منه نستريح شوية وبعدها نطلب ثانى.

شوية كده وانتقلنا للقعدة اللى
بره نجربها، الخدمة فى المنطقة دي مش حلو قوي زي اللى جوه، لما طلبنا كذا مرة
حاجات كانت بـ تأخذ وقت كثير عقبال ما تيجي وفيه وقت عقبال ما ييجي لنا حد أصلاً، طلبنا
برتقال (14.99 جنيه) وليمون بالنعناع (11.99 جنيه)، المشروبات بصفة عامة منعشة
وخففت من الأكل اللى أكلناه شوية ماعدا أننا ما حسيناش أن الليمون فيه طعم نعناع
خالص، وبرضه حصل ثاني موقف أن الجرسون جاء لنا وسأل عاوزين نطلب حاجة تحلية بعد
الشرب فـ تضايقنا ثاني، لدرجة حسستنا أنهم عاوزيننا ننجز ونطلب ونمشي، ختمنا
القعدة بنوجا بالآيس كريم (26.99 جنيه) اللى بـ ييجي لك حسب اختيار نوع الآيس كريم
اللى بـ تحبه وفيه قطع فواكة مجففة ونوجا، كان لطيف لكن كان ثقيل شوية ومسكر وكانت
نسبة النوجا أكثر من الآيس كريم فكانت جامدة.

فيه حد أدنى للطلبات فقط يوم
الخميس هو 75 جنيه، لما بـ تقعد بـ ينزل لك زجاجة مياه صغيرة (6.99 جنيه) وبـ يضاف
خدمة فقط على حسابك، لو عاوز تعرف أكثر عن “فايكنج” زور صفحتهم على الفيسبوك لأن الموقع
لسه تحت الإنشاء.

نصيحة 360

«فايكنج» عندهم بوفيه مفتوح للأفطار كل يوم سبت من الساعة 9 صباحًا لحد 1 ظهرًا (كرواسون، دانش، باتيه، إنجليش كيك، مافنز، بيض، فطير مشلتت بالسمن البلدي، وفول بـ 40 جنيه)، للحجز اتصل بـ 01064233333.

أحسن حاجة

الأطباق كلها بشكل عام كمياتها كبيرة وشهية.

أسوأ حاجة

"الزن على الودان".

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح