The Definitive Guide to Living in the Capital , Cairo , Egypt

فى شارع 9 الحيوى الموجود فى المعادى، «فاينرفالد – Wienerwald» جاء لنا مباشرة من بلده الأصلى ألمانيا. المطعم الجديد بـ يقدم مكان كبير للقعده فى الخارج، بـ يظلله مظلات تقليدية لونها أبيض وأخضر. ديكورات المكان معاصرة وجديدة مع أثاث خشب داكن ونباتات خضراء بـ تعكس الخضرة الطبيعية الموجودة فى ألمانيا.
«فاينرفالد» متخصص فى أطباق الفراخ المشوية، وده محير نظرًا إلى أن كلمة “فاينر” هى نوع من السوسيس الألمانى. وقت ما الشركة تم تأسيسها سنة 1955، أطباق الطيور كانت تعتبر نوع من الترف، ولغاية النهاردة بـ يركزوا دائمًا على أهمية أن مكونات الأكل تبقى طازجة وجودتها عالية. شوفنا الفراخ الكبيرة اللى بـ تلف على أسياخ -كلها مذبوحة على الطريقة الإسلامية- فى الأفران الموجودة وراء بوفيه السلاطات المبهر وأخذنا منيو علشان نفكر نأكل إيه.
بجانب الفراخ المشوية الكاملة وأنصاف الفراخ، وأجنحة الفراخ، وبرجر من أفخاذ الفراخ -عبارة عن قطع من فخذ على شكل عيدان- وساندويتشات، ومختارات من أكلات مقاطعة بافاريا وكمان أنواع مختلفة من السلاطات. وزى أى مكان بـ يعمل أكلات سريعة منيو المشروبات محدودة على الصودا (5.45 جنيه) والمياه المعدنية (3.45 جنيه) أو الفوارة (7.95 جنيه) وكمان ممكن تطلب شاى (بـ 6.45 جنيه)، ووجبات الأطفال برضه موجودة وسعرها (19.95 جنيه).
قررنا نجرب وجبة الفراخ المشوية المكونة من نصف فرخة مع ثمانية أنواع من الأعشاب وصوص الزبدة (38.5 جنيه) مع اختيارنا من صنف جانبى واحد: بطاطس بالكريمة أو سلاطة. جربنا كمان بوفتيك بـ يُقدم معاه بطاطس محمرة (32.45 جنيه)، قررنا نألف سلاطة من دماغنا بـ تتكون من أربعة أصناف (14.45 جنيه) علشان المنيو خالية من وصف السلاطات الموجودة: كرنب بالخل، وطماطم، وخيار وسلاطة بطاطس وفراخ باردة مع سويت تشيللى صوص. أول ما خلصنا طلبنا، أخذنا من الكاشير جهاز صغير بـ يهتز أول ما الأكل يخلص علشان نروح نأخذه، وده فعلاً حصل بعد دقائق قليلة.
أول ما شوفنا الأكل على الصينية، بدأنا نحس بجوع رهيب من منظر كميات الأكل الكبيرة. البوفتيك كان عبارة عن قطعة كبيرة من الفراخ رطبة ولذيذة، ومغطاه بمسحوق ذهبى من العيش المحمص. البطاطس المحمرة كانت مضبوطة بس ملحها زيادة. أما السلاطة فكانت باردة، وطازجة ومقرمشة، بس السويت تشيللى تشيكن كانت محتاجة شوية صوص كمان.
أجمد وأطعم طبق كان طبق الفراخ. مشوية بامتياز ولونها ذهبى مايل للبنى، وكل قطمة بـ تنطق من كثر جمال الطعم. ورغم أن سلاطة البطاطس كانت لذيذة، طلبنا من الجرسون أنه يسخنها زى ما بـ نحبها.
بعد ما خلصنا الوجبات المترابطة مع بعضها حسينا بالشبع تمامًا، بس أصناف الحلو شكلها كان حكاية وبـ تيجى على شكل Apfelstrudel بسعر 15 جنيه أو موزاييك كيك mosaic cake بنفس السعر وأكيد هـ نرجع ثانى علشان نجربهم.
فاينرفالد راسم خطة لافتتاح أكثر من عشرين فرع فى القاهرة خلال الثلاث سنين القادمة. وعلشان يلتزموا بوعدهم بـ يقدموا وجبات سريعة، ولذيذة وجودتها عالية بشكل أنيق، وده بـ يخلى الأكلات المليانة زيوت وغير الصحية موضة قديمة.