The Definitive Guide to Living in the Capital , Cairo , Egypt

من فترة كبيرة قدر المطبخ الأمريكي يكسب المصري، وساهم حبنا للأكلات المقلية الغرقانة في الصوصات والدريسينج المختلفة في ظهور عدد كبير من المطاعم اللي بـ تقدم الأكل الأمريكي في كل نواحي القاهرة، ده ما يمنعش أن فيه مطاعم قدرت تقاوم التغييرات المستمرة في ساحة المطاعم وحافظت على سمعتها وسط العاصمة، وواحد منهم هو فدركرز.

من هنا طلعنا على أحدث فروعهم في الشارع الطويل الشبيه بفوود كورت القاهرة الجديدة، أو بمعنى أصح كونكورد بلازا، ومجهزين عقولنا ومعدتنا لاستقبال برجرهم الرائع.

المكان عبارة عن دورين بديكورات ألوانها مبهجة، مع قعدات ثانية في الهواء المنعش، بس مع السقعة المرعبة قررنا ندخل في الدفء، الجرسون وصلنا لترابيزة جنب الشباك، وبسرعة قدم لنا المنيوهات.

فدركرز زي ما عودنا، بـ يقدم كل الأطباق الأمريكاني المحبوبة من مقبلات كلاسيكية، لسلاطات، لشوربة، لبرجر، لستيك، لأطباق فراخ، لساندويتشات ملفوفة وحلويات، طلبنا تمبل ويد برجر 13 باوند (47 جنيه) مع إضافة مشروم (8 جنيه) وهوت روكس برجر 12 باوند (52 جنيه)، مع كولا عادية (17 جنيه) وكولا دايت (17 جنيه)، وبعد ما خلصنا الطلب طلعنا على بار السلاطات المجاني.

الجرسون قدم لنا طبقين فاضيين، وبدأنا نملأهم بالسلاطات اللذيذة، كان واضح أن بار السلاطات أصغر من المعتاد واختياراته أقل، بس كالعادة بـ يقدم لمحة من الأكلات المحبوبة منها سلاطة بطاطس، كول سلو، مخلل، طماطم بالفلفل وجواكامولي، وكلهم كانوا طازجين، جنب بار السلاطة هـ تلاقي محطة الصوصات، ومنها أخذنا صوص باربيكيو، مايونيز والجبنة السائحة المشطشطة.

وإحنا لسه عند بار السلاطات، أكلنا كان وصل على الترابيزة بشكله اللذيذ، برجر التمبل ويد كان well-done زي ما طلبنا، وعليه مشروم طازج زيادة ومن غير جبن وطماطم زي ما طلبنا برضه، أما الهوت روكس فكان medium، وغرقان في صوص الرانش. اللحم في الساندويتشين كان عصاري، وعليه كمية ممتازة من الإضافات، بالنسبة للويدجز اللي بـ تُقدم مع الساندويتش كانت طرية وتتبيلتها لذيذة، بس كميتها كانت قليلة شوية.

على العموم، فدركرز قدر يواجه المنافسة الشديدة اللي بـ تقابله من محلات البرجر الجديدة بدعايتها القوية وشكلها المغري، السبب في رأينا هو الخدمة الممتازة، الأطباق اللذيذة والإضافات المجانية اللي بـ يحس العميل أن الموضوع يستاهل الفلوس اللي دفعها.