The Definitive Guide to Living in the Capital , Cairo , Egypt

كان لازم يكون لنا تجربة أفطار في سيتي ستارز زي كل سنة، والسنة دي اختارنا
مكان مشهور جدًا واسمه مش مرتبط برمضان أو أكلات رمضان بأي شكل، لكن شكل المحل من
الخارج والديكورات من الداخل والاستعدادات اللي عملها لاستقبال الشهر الكريم كان
حافز أننا ندخل ونكتب عن المكان لأول مرة في تاريخ كايرو 360.

«فرايدايز – T.G.I Friday’s» له فروع مساحتها
كبيرة في المهندسين والمعادي، وهنا فرع سيتي ستارز في مصر الجديدة أصغر شوية،
موجود في الدور الخامس في المرحلة الأولى من المول، قريب من مجموعة مطاعم ثانية هي
«رومانوز مكروني جريل» و«أوليفز». القعدة حلوة قوي داخل المطعم مش في التراس
الخارجي، خياميات على الجدران وفوانيس وأغاني رمضان قبل المغرب وفيه شاشات بـ تعرض
البرامج والمسلسلات. مكتوب من الخارج على لافتة كبيرة تفاصيل أفطار رمضان والأسعار.
الأفطار هناك خليط من البوفيه المفتوح والمنيو الثابت للأطباق الرئيسية اللي فيه 5
أطباق من أشهر أطباق «فرايدايز» بالإضافة لطبق شوربة ساخنة ومشروب رمضاني وطبق
حلويات. الوجبة للفرد الواحد بسعر ثابت هو 120 جنيه غير شاملة الخدمة والضريبة،
يعني ممكن نقول الفرد بـ 150 جنيه ونريح نفسنا. وكعادة كل المطاعم في رمضان
المشروبات الغازية والعصائر بـ تبقى خارج المنيو المحدد وهـ تطلبها بشكل منفصل.

الأطباق الرئيسية اللي بـ تختار منها بـ تبقى فاهيتا دجاج أو لحم، وفيه
أطباق دجاج بالأعشاب المشهور بها «فرايدايز» وسكالوب الدجاج، بيكاتا اللحم البتلو،
وطبق المأكولات البحرية (Fisherman) اللي فيه جمبري
وكاليماري وسمك مقلي. الطبق الرئيسي معاه أرز أو بطاطس بيوريه أو محمرة أو خضار
سوتيه. بـ تختار الطبق الرئيسي قبل الأفطار بوقت كافي وبـ تحدد معاه نوع الشوربة
والأنواع الموجودة هي لسان العصفور بالخضروات وشوربة العدس، وبـ تحدد عاوز قمر
الدين ولا كركدية، وقبل المغرب بـ 10 دقائق بـ يدعوك الجرسون لزيارة البوفيه
المفتوح للسلاطات الباردة والمقبلات الساخنة زي الكبيبة والسمبوسك وقطع الدجاج
التندر والبافلو وينجز وكل أنواع المحاشي وصوصات مختلفة حارة وحلوة. البوفيه
المفتوح ممكن تعمل منه طبق يقفلك تمامًا وينسيك أساسًا أن فيه طبق رئيسي لسه هـ
ينزل أمامك، ولأن الطبق الرئيسي بـ ينزل بعد المغرب بحوالي 10 دقائق على ما تكون
شربت الشوربة وبدأت في المقبلات فحاول ما تشبعش قوي لأن الكميات هنا كبيرة قوي
والبوفيه المفتوح رغم أن أصنافه مش كثير لكن مغري جدًا وطعم الأكل اللي فيه خطير
وبـ يشبع طبعًا.

شوربة العدس حكاية، تسخين ممتاز
قبل الأكل، أحلى من اللسان عصفور. طبقنا الرئيسي كان بيكاتا اللحم البتلو بالصوص
البني مع الأرز والسوتيه، للأسف البيكاتا كانت أقرب للـﭭيل المشوي على الجريل،
قطعة اللحم كبيرة وسميكة شوية، مش شبه البيكاتا اللي بـ نأكلها في أي حتة، الصوص
اللي عليها لذيذ بس اللحم نفسه ما كانش بنفس اللذاذة. الأرز المبهر والسوتيه
ممتازين في «فرايديز» طبعًا.

طبق رئيسي ثاني هو سكالوب صدور الدجاج مع قطع المشروم
المقلية، ده كان اقتراح الجرسون لما سألناه عن طبق دجاج مذاقه فريد ومميز، وفعلًا
كان اختيار موفق وعجبنا تتبيلة الدجاج جدًا وشجيرات المشروم المقرمشة، مع البطاطس
البيوريه والسوتيه.. الطبق ده كان عالمي. جنب الأكل استمتعنا بعصير قمر الدين
والكركديه اللي سكرهم وقوامهم مضبوط جدًا، لكن بعد شوية وبعد عطش اليوم الطويل هـ
تلاقي نفسك محتاج مشروب ثاني، وهنا ييجي دور البيبسي الـ Refill (15 جنيه) اللي بـ تطلبه لوحده وبـ تقعد تملأ
كوبايتك طول ما أنت قاعد. بعد الأكل لك اختيار طبق حلو، ممكن تزور بوفيه الحلويات
الشرقية اللي فيه كنافة وقطائف وبلح الشام (القطائف هنا مقرمشة ولذيذة) وممكن
تختار طبق أوريو مادنس العملاق اللي فيه خليط الآيس كريم وبسكويت الأوريو
والشوكولاتة، وده كان اختيارنا مع الوجبة وقعدنا نأكل فيه تقريبًا ساعتين بعد
الأفطار، بس كان أكثر من رائع.

تقريبًا اتصاحبنا على كل العاملين في المكان من كثر ما قعدنا هناك (لأننا
كنا مستمتعين بالقعدة) وكمان من كثر ما هم ودودين وظرفاء، الخدمة هنا سريعة
ومتطورة جدًا وبسيطة من غير أي تكلفة، وده حببنا في المكان أكثر. زيارتنا الجاية
لـ «فرايديز» هـ تكون بعد رمضان علشان نجرب المنيو العادي بتاعهم ونقول لكم رأينا،
بس النهاردة إحنا بـ نرشح لكم المكان ده لأفطار رمضاني عظيم وكريم.