The Definitive Guide to Living in the Capital , Cairo , Egypt

فيس فوود

فيس فوود: محل أكلات سريعة محتاج إعادة نظر في مصر الجديدة

  • 36 شارع الأهرام
  • مأكولات سريعة
  • 01095339333,01010426169
تم التقييم بواسطة
Waleed Abuarab
قيم
قيم الآن
فيس فوود: محل أكلات سريعة محتاج إعادة نظر في مصر الجديدة
هـ نتغاضى عن المزحة “الظريفة” اللي في الاسم ومحاولة كتابتها بخط زي المستخدم في كتابة كلمة “فيسبوك” وبنفس الألوان على واجهة المحل، لأن الفكرة كلها لا تليق بمحل في المنطقة الحيوية دي ويفترض أن شكله ومضمونه يكون أحسن بكثير من اللي هو عليه.
إحنا قولنا في مقال قبل كده أن الشروط الأساسية لنجاح أي مطعم هي الجودة والسعر وكمان طريقة عرض أحسن أكلة هو متميز بها لجذب الناس خصوصًا لو لمطعم جديد وبـ يحاول “يربي زبون”.
مطعم «فيس فوود» موجود في مكان حيوي جدًا في مصر الجديدة بجوار الحرية مول، وبالتحديد في منتصف الطريق بين محل «عمو حسني» والحرية مول، وقريب من سينما نورماندي، يعني شارع مليان ناس في كل الأوقات وكل المطاعم اللي موجودة فيه زحمة على طول وشغالة كويس قوي. وتوقعنا أن «فيس فوود» يكون قد المنافسة، عدينا من هناك أكثر من مرة ولاحظنا كان الإقبال عليه مش قد كده. فردين بس هما العاملين فيه واحد بـ يأخذ الأوردر والثاني بـ يحضر الساندويتشات ويجهز طلبك. ومدير المحل أو الشخص على الخزينة كان بطيء وواضح أن الاحترافية شبه معدومة.
المطعم بـ يحاول يتميز بالحواوشي (10 جنيه) وبـ يُقدم مقطع زي الفطائر، جربناه وطعمه كان معقول وفيه حشو خضروات وتوابله مش حارة واللحم نفسه كان رائحته وشكله مطمئن. جربنا ساندويتش كفتة الجمبري والتشيكن رول (14 جنيه). كفته الجمبري مش بطالة (رغم أنها كانت شبه كفتة الأرز) لكن قطع الجمبري فيها صغيرة قوي وتقريبًا مش باينة. التشيكن رول كان معلب من اللي بـ يتباع في أي سوبرماركت وهما بس بـ يقلوه ويجهزوه في الساندويتش. وفيه وجبات لحوم ودجاج وسلاطات كول سلو والسلاطة الخضراء.
وبعد التجربة لقينا أن فعلاً أحلى حاجة هي الحواوشي، لكن واضح أن الأكل مش فيه صنعة جيدة أو شخصية يتميز بها المطعم. حتى الشاورمة كان شكلها مش مغري، ولأن المطعم حجمه صغير فعربية الشاورمة موجودة على باب المطعم من الخارج ورغم كده مش هـ تشم الرائحة المميزة لها ومش هـ تجذبك أنك تقف حتى عند المطعم تشوف إيه الأكل اللي عنده، وما كانش فيه غير سيخ صغير بس فيه شاورمة دجاج وقت زيارتنا.
المطعم تيك آواي وبس، مافيهوش لا ترابيزات ولا كراسي بس لو معاك عربية ممكن تقف أمامه بها ويجهز لك الأوردر ويقدمه لك فيها والأكل بـ ييجي بسرعة وبـ يُقدم ساخن ولكن زي ما قولنا الصنعة مش قد كده.
لو في مصر الجديدة وجعان ومستعجل ممكن تجرب الحاجات اللي قولنا عليها في «فيس فوود» وما تجازفش. الأكل بـ يجهز بسرعة والساندويتشات أسعارها معقولة بس أكيد هو مش من المطاعم اللي تروح لها مخصوص.

نصيحة 360

قبل ما تختار من المنيو اسأل إيه موجود وإيه لأ، علشان مش كل الساندويتشات بـ تبقى موجودة.

أحسن حاجة

الحواوشي، والحق يقال الأكل نظيف.

أسوأ حاجة

موقع المطعم يستاهل مجهود أكثر من كده من أصحابه علشان يوصل لمكانة كويسة في المكان الحيوي ده.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح