The Definitive Guide to Living in the Capital , Cairo , Egypt

مطاعم
قدورة – kadoura

قدورة: ملك السمك بيتألق فى فرع تيفولي دوم زايد

تم التقييم بواسطة
Angie El Batrawy
قيم
قيم الآن
قدورة: ملك السمك بيتألق فى فرع تيفولي دوم زايد

أنك تاخد لقب “ملك” في مجال معين دي مش بتيجي من فراغ، دي سنين خبرة وشغل وجهد وشغف وحاجات تانية كتير، والدليل على كده أنك تحتفظ باللقب ده لمدة 67 سنة.

قدورة ملك السمك في إسكندرية من سنة 1950، له ثلاثة فروع في الإسكندرية (شارع بيرم التونسي، وطريق الكورنيش، وأمام قصر المنتزة)، وفرعين في القاهرة (جامعة الدول والشيخ زايد)، عنده خبرة كبيرة في مجال السمك لأن أبوه وجده كانوا صيادين، لما كان في العشرينيات من عمره كان بيورد السمك لبعض محلات الأسماك وبيجمعه كمان من الصيادين وبعدين يبيعه جملة للتجار في سوق راتب، لحد ما أسس محله سنة 1950.

من أسبوع رحنا زيارة لفرعه في تيفولي دوم الشيخ زايد، المكان عبارة عن دورين وفيه كمان قعدة تحت في الهواء الطلق، يومها كانت الدنيا زحمة ولقينا كذا ترابيزة محجوزين بس الجرسون اللطيف كان ذوق ودبر لنا ترابيزة صغيرة لأننا كنا فردين بس في الـ Outdoor.

مافيش منيو، وطبعًا زي أي مطعم سمك أنت بتختار نوع السمكة وأنت واقف وأي نوع سي فوود تاني وطريقة تسويته وبتروح على الترابيزة تستنى الطلب بتاعك، بس المتاح غير كده سلاطات وشوربة سي فوود (60 جنيه) فقط.

ولأن أسعار السمك متغيرة يوم عن التاني، هنقول لكم أسعار يوم زيارتنا، الجمبري كان فيه نوعين: نوع إسكندراني الكيلو بـ 320 جنيه، والتانى سويسري ضخم جدًا الكيلو بـ 500 جنيه، أخدنا نص كيلو من الأول واختارنا نعمله مشوي مع شرايح البصل والطماطم، السمك البوري وقت زيارتنا كان الكيلو بـ 100 جنيه، أخدنا سمكة نص كيلو واختارنا نعملها سنجاري.

 

السلاطات الموجودة بيجيبها لك الجرسون على صينية وأنت بتختار الأنواع اللى أنت عاوزها، كان فيه سلاطات خضراء وبابا غنوج وثومية وبتنجان وطحينة وطماطم متبلة، إحنا اختارنا سلاطة خضراء (15 جنيه) وبابا غنوج (15 جنيه) وكمان طلبنا بولة أرز صيادية (15 جنيه).

الأكل اتأخر شوية وعصافير بطننا كانت بتصوصو، بس منظر الجمبري المشوي والسمك لما شفناهم وهما داخلين علينا نسّانا كل حاجة، تتبيلة الجمبري مع شرايح البصل والطماطم كانت رائعة ولحمة الجمبرى كانت مستوية كويس ومش بتشد، السمك برضه كان لحمته دايبة خالص وتتبيلتها عظيمة بس ما كانتش كتيرة بالنسبة لسمكة نص كيلو، اللى كان محبط الأرز لأنه كان ناشف وفيه ورق لورا كتير، تخيلوا بولة أرز طلعنا منها 4 ورقات لورا ودى كانت حاجة مزعجة بالنسبة لنا، الموضوع كده عامل زي لما تقعد تطلع حبهان من الأكل، السلاطات كانت فريش وحجم السلاطة الخضراء كانت أكبر من بابا غنوج.

ختمنا زيارتنا بعصير ليمون بالنعناع (15 جنيه) كان منعش جدًا وسكره مضبوط، تجربتنا في فرع الشيخ زايد كانت حلوة جدًا خاصة أنها كانت بتوصية من أصحابنا اللى راحوا الفرع ده قبل كده وشكروا فيه، وأكيد ممكن نروحه تاني.

نصيحة 360

قدورة عندهم خدمة توصيل الطلبات للمنازل.

أحسن حاجة

السمك والجمبري.

أسوأ حاجة

الأرز الناشف.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح