The Definitive Guide to Living in the Capital , Cairo , Egypt

«كارباتشيو» مطعم إيطالى جنب مطعم «بلدينا» فى أركان
مول، لقيناهم فى زيارتنا الأخيرة فتحوا حديثًا، ووقت زيارتنا كان المكانين فاضيين،
لكن فيه مغناطيس شدنا ناحية “كارباتشيو” خاصة أننا بـ نحب الأكل
الإيطالى وكمان الجرسونات البنات اللى استقبلونا كانوا بشوشين جدًا.

البنوتة اللى كانت معانا فهمتنا
طبيعة المطعم، له 3 فروع ثانية فى “أواسيس” بهليوبوليس، وداون تاون مول
فى التجمع الخامس، وسيتي سباس مول فى 6 أكتوبر.

المكان واجهته زجاج وفيه ستائر
متحركة علشان لو أنت متضايق من الشمس، وفيه كمان قعدة خارجية وبالتالى القعدتين
ظاهرين لبعض عبر الزجاج، بس الفكرة أنك هـ تهرب من الحر بالتكييف اللى جوه، وممكن
لما الجو يلطف تنقل قعدتك برة، على الجنب فيه ديكور شكله حلو قوي وألوان المكان
مبهجة وزاهية، هما لسه Soft opening
لكن بجد التجربة كانت تستحق.

أول ما قعدنا نزلوا لنا زجاجة
مياة كبيرة (14 جنيه) علشان كنا مجموعة كبيرة، فتحنا نفسنا واشتركنا كلنا فى سامبلر
إيطاليانو (65 جنيه) وهو طبق مقبلات مشكلة فيه سبرينج رولز وفراخ بانية رقيقة
وحلقات البصل المقلية وأصابع الموتزاريلا مع 3 أنواع من الصوص. الطبق ضخم جدًا
استحالة شخص واحد يقوم به، بـ ننصح أن مجموعة تطلبه وتشترك فيه زي ما عملنا، عيبه
الوحيد بس كان مملح شوية، رغم أن الأكل كله كان مقلى لكن كان خفيف ومش متحمر زيادة
ومستوي كويس. بداية جامدة لزيارتنا.

طلبنا أطباق رئيسية كثيرة من
حماسنا، جربنا شاتو فيليتو (69 جنيه) وهو عبارة عن فيليه بصوص الفلفل وطبق ثاني
طلبناه بصوص المشروم، وبـ ينزل معاه اختيارين لنا هما  بطاطس محمرة وخضار سوتيه، اللحم طلبناه Well done كان معمول كويس بس كان فاضل له
شوية صغيرة تشوية، صوص المشروم كان كويس بس محروق شوية، وصوص الفلفل خلى الأكل مُر
قوي لدرجة قلنا للجرسون يشيلوه وعمل لنا كده بكل اهتمام، التعاملات هنا كويسة جدًا
ودى حاجة كويسة فى واجهة المكان.

ذقنا كمان إسكالوب كوردون بلو (61
جنيه) شكل الطبق كان حلو قوي كنا مستخسرين نأكله، الإسكالوب كان مستوي تمام وطعمه
حلو قوي، «كارباتشيو» كمان عندهم كلوب جريل ساندويتش (33.90 جنيه) وتشيكن سنيورا
(53 جنيه) وبرضه جذبنا شكله والصوص والجبنة السايحة عليه من فوق. الأكل هنا بـ
تأكله بعينك قبل فمك.

منيو المشروبات غنية عند
“كارباتشيو”، أسعار المشروبات: بيبسي دايت (9 جنيه)، قهوة تركي سينجل
(11.90 جنيه)، ولأن الدنيا كانت حر بعدنا عن المشروبات الساخنة وجربنا  كافيه لاتيه أون ذا روك (16.90 جنيه) ومعنى كلمة
أون ذا روك أنه معمول بثلج مجروش، لو عاوز إضافات زي فانيليا على مشروبك بـ (3.90
جنيه)، وكمان جربنا فانيليا شيك (21.90 جنيه)، المشروبات منعشة وخففت من حرارة
الجو وكمية الأكل الكبيرة اللى أكلناها.

الحساب بـ يضاف عليه 12% خدمة و10%
ضريبة، وفيه هناك شيشة ممكن تجربوها أنتم لأننا بصراحة مالناش فيها،
“كارباتشيو” مكان لطيف ممكن تخرج فيه مع أصدقائك وتستمتع بأكل حلو
وأسعار معقولة، وكمان ديكور وضيافة حلوة، الفكرة بس أن فيه حاجة محسسانا أنه مش
إيطالى قوي، مش عارفين إيه هي.. بس المهم أننا اتبسطنا.