The Definitive Guide to Living in the Capital , Cairo , Egypt

كارلوس – Carlo’s

كارلوس: طبخة باظت على حبة ملح فى أركان مول بالشيخ زايد

  • أركان مول - أمام مدينة زايد 2000 - الشيخ زايد
  • لبناني
  • 01122208881
تم التقييم بواسطة
Angie El Batrawy
قيم
قيم الآن
كارلوس: طبخة باظت على حبة ملح فى أركان مول بالشيخ زايد

انفراد لموقع كايرو 360.. ده أول
مقال نقدي ننشره -على موقعنا بشكل خاص وعلى الإنترنت بشكل عام- عن مكان مميز بـ
يكبر يوم بعد يوم فى قلب مدينة الشيخ زايد اكتشفناه بالصدفة (وكانت أحلى صدفة) أثناء
وجودنا هناك.. بـ نتنبأ أنه هـ يسَمع عن قريب.. المكان ده هو “أركان
مول” اللي أمام مدينة زايد 2000 فى الشيخ زايد.

مجمع مطاعم وكافيهات (بعضها فتح
والبعض الآخر لسه فى التجهيزات) أشبه بـ “تيفولى دوم” الموجود فى
هليوبوليس بس الفرق أن الأماكن على الجانبين طوال ما أنت ماشي فى المول الطويل مش
دائري زى فى تيفولى، كله مطاعم وكافيهات ماعدا بس فيه كوافير “محمد
الصغير” فتح لسه من كام يوم، وجيم اسمه “Jazzercise” وواحد ثاني اسمه “The Little Gym” وبـ يحيط كل ده من الجانبين
مباني بنك HSBC
اللى لسه فى مرحلة التجهيزات. وفيه سلم كهربائي فى وسط الممر بـ ينزلك الدور اللى
تحت المؤدي لجراج المول بـ نوعدكم نكتب لكم دليل شامل للمكان عن قريب على الموقع.

فى آخر الممر وأنت ماشي على أيدك
الشمال “كوفى شوب كومبانى” و”لا جورمانديز La Gourmandise” وهـ تلاقى فى الجهة
المقابلة له مطعم شدنا ديكوراته وقعدته جدًا وبعد كده اكتشفنا أنه «كارلوس – Carlo’s» اللى معروف أنه موجود فى مركب Le Pacha 1901 اللى فى الزمالك واللى برضه
لقيناه تابع لنفس المكان هناك لأننا لاحظنا أن الجرسونات بعضهم لابس مريلة عليها
لوجو كارلوس والباقى مكتوب Le
Pacha. 

الديكور جميل وراقى وبـ يكون أحلى
كمان وقت المغرب مع الإضاءات الموزعة بحرفية فى المكان، فيه على الجانبين قعدات بكنب
وترابيزات وثانية بكراسي وترابيزات، والجانب الشمال كله كنبه لونه رمادي واليمين
أبيض عليهم مخدات كثيرة جدًا والجانب اليمين على مستوى أعلى شوية وفيه مياه زي شلالات
صغيرة بالأسفل عند الـ Step
اللى بـ تؤدي للكنب.

المكان بـ يغلب عليه اللون البني
والبيج والرمادي، فيه شاشة بروجكتور واحدة عملاقة إلى جانب شاشات تليفزيون ثانية
صغيرة فى أماكن متفرقة، وفى المنتصف فيه بار للمشروبات الروحية لأن لاحظنا أن أغلب
المنيو –للأسف- بيرة وكونياك وغيرها. كل المكان Outdoor والمكان الداخلى هـ يفتح كمان 3
أيام.

المنيو فيها حاجات غريبة مع بعض،
هـ تلاقى ركن لبنانى وشرقى وعالمي وإيطالى وبيتزا وهامبورجر، الركن الشرقى فيه
أصناف غير تقليدية زي حواوشي (39.90 جنيه) وفيه شركسية بالفراخ (31.90 جنيه) وفيه
كمان كِشك، المنيو ملخبطة بعضها مترجم والباقى لأ، وكل ده حسسنا أن الدنيا مرقعة
مالهاش علاقة ببعض شوية، فيه كمان مزات باردة وساخنة، المشروبات العادية الفريش
والساخنة والباردة اختياراتها مش كثيرة وفى صفحة واحدة على عكس المشروبات الروحية
واخدة صفحتين واختياراتها كبيرة!

طلبنا من قائمة السلاطات سلاطة
خضراء (21.90 جنيه) اللى جاءت لنا بعد فترة وكانت عبارة عن خيار وجزر وخس وطماطم
وفلفل وقطع زيتون مقطعة! وطبعًا استغربنا أن حبة خضار جاءوا لنا كوحدات مش حتى
كسلاطة مقطعة وعليها صوص ويكون سعرها 22 جنيه!

أخذنا كمان فراخ مشوية بالأعشاب
(77.90 جنيه) بـ ينزل لك اختيار واحد فقط كـ Side dish فأخذنا خضار سوتيه، المضحك فى
الموضوع أن الخضار فى الطبق كان عبارة عن 3 جزرات وكوستين وواحدة بروكلى، كنا
حاسين أنهم ديكور أكثر ما منهم أكل، الفراخ كانت على عكس ده حلوة قوي ومستوية كويس
بس كان عليها جلد بدهون من فوق، لكن نعتقد أن دي طريقتهم فى تسوية الفراخ.

لما بـ تقعد بـ ينزلوا لك زجاجة
مياة كبيرة رغم أننا كنا فردين! لكننا طلبنا الحجم الصغير (6.50 جنيه)، جربنا كمان
بيف فيليه مشوي (91.90 جنيه) ومعاه بطاطس محمرة، البيف كان عظيم جدًا والتسوية
كانت مش طبيعية والطعم حلو، البطاطس كانت كويسة مش مميزة قوي.

فى المشروبات جربنا تشوكلت سموزى
(18 جنيه) اللى جاء لنا فى كوب طويل تصميمه حلو قوي ومختلف والسموزي نفسه كان سكره
كويس ومنعش، والأيس لاتيه (14.90 جنيه) بإضافة نكهة كراميل (3 جنيه) كان برضه حلو
وقوامه معقول.

التحلية هـ تلاقيها كثير فى
كارلوس ممكن تختار من صفحة كاملة هناك اللى أنت حاببه، عندهم كمان شيشة (13 جنيه)
والشيشة المخصوص (29.50 جنيه)، طلبنا أم على (29.90 جنيه) بـ يستغرق تجهيزها 30
دقيقة بس المفاجأة أنها جاءت لنا باردة مش ساخنة زي ما كنا متوقعين، كان سكرها
زيادة شوية بس كانت مليانة زبيب ومكسرات وجوز هند وتكفى فرد واحد.

وقت زيارتنا لقينا ناس طالبة سوشي
على الرغم من أنه ما كانش مذكور حاجة عنه فى المنيو، ملحوظة عامة على “كارلوس”
أن الأكل غالى إلى حد ما على الكمية الصغيرة اللى بـ تقدم ولكنه حلو، فى الآخر
وأنت بـ تحاسب بـ يضيفوا كوفر (6 جنيه لفردين) و12% خدمة و10% ضريبة. حصل لنا موقف
كمان غريب فى نهاية قعدتنا الجرسونات جاءوا لنا مرتين وقالوا لنا بالذوق نقوم
علشان المكان محجوز رغم أنهم ما ذكروش ده وقت ما قعدنا! ما فهمناش إيه معنى الموقف
الغريب ده.

“كارلوس” مكان حلو، بس
نقدر نقول أنه بـ تنطبق عليه المقولة الشهيرة “بوظ الطبخة على حبة ملح”..
أكل جامد (بصرف النظر عن الكمية) وديكور رائع وموقع متميز.. ولكن!

نصيحة 360

اسأل على نظام السوشي هناك لأن كان شكله شهي جدًا.

أحسن حاجة

القعدة هناك رائعة والديكور مِتكلف.

أسوأ حاجة

موضوع المشروبات الروحية طبعًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح