The Definitive Guide to Living in the Capital , Cairo , Egypt

كاريزما

كاريزما: قهوة غربي أو كافيه شرقي في مدينة نصر

تم التقييم بواسطة
Waleed Abuarab
قيم
قيم الآن
كاريزما: قهوة غربي أو كافيه شرقي في مدينة نصر
لما بـ تدخل في دهاليز مدينة نصر والشوارع الجانبية من عباس العقاد ومكرم عبيد ومصطفى النحاس، بـ تلاقي شوارع هادئة وأنوارها قليلة مليانة محلات وقهاوي بلدي وصالات بلياردو وكافيهات ومطاعم، بس لها ستايل مختلف عن الموجود في الشوارع الرئيسية، مش عارفين ده علشان طبيعة الشوارع الهادئة اللي هي فيها، ولا هم اللي اختاروا الشوارع الهادئة علشان عاوزين محلاتهم تكتسب صفة الهدوء. الغريب أننا خُدعنا في كافيه «كاريزما» الموجود في امتداد شارع البطراوي المتفرع من شارع عباس العقاد والموجود بجوار مستشفى التوفيقية. وده لأن «كاريزما» من الخارج شكله هادئ جدًا ومش هـ تحس بوجوده لو عديت من جنبه وأنت مش باصص ناحيته، لكن بمجرد ما بـ تدخل بـ تلاقي عالم ثاني، صاخب ولا يخلو من المرح والزبائن اللي قاعدين تحس أنهم أصحاب مكان ولاحظنا فعلًا أن كل حد بـ يدخل المكان بـ يسلم على العاملين بالاسم وكمان على بعض الزبائن اللي قاعدين على الترابيزات.

اللون الأحمر هو Theme المكان من الخارج ومن الداخل. المكان مش مبنى؛ هو أشبه بخيمة كبيرة والجدران عليها خياميات وتحف شرقية وأواني صغيرة للزينة، وعجبنا جدًا شكل المكان من الداخل وديكوراته، وتوزيع القعدات وشاشات التليفزيون، والأهم من ده كله أن الكراسي كانت ضخمة ومريحة، والموسيقى اللي كانت شغالة كانت ظريفة، أغاني عربي من التسعينيات وأوائل الألفينات، موود ظريف لائق على المكان.
المكان فتح من شهر أو أكثر شوية، علشان كده مش كل المنيوهات جاهزة، لو هـ تطلب مشروبات هـ تضطر تسمعها من الجرسون بأسعارها لأن مافيش منيو مطبوع لهم، لكن منيو الأكلات كان فيه منه واحد بس، بدأنا نتفرج عليه بالدور إحنا واللي قاعدين على ترابيزة واحدة. وعلشان ما نضيعش وقت سألنا الجرسون: “هو إيه مش موجود عندكم من المكتوب في المنيو؟” قال لنا أن كله موجود ماعدا أطباق الأسماك والجمبري، ومن هنا بدأنا نبص على أطباق الدجاج واللحوم والبيتزا.
فعلاً اختارنا البيتزا لكن الجرسون راح ورجع لنا بعد شوية وقال لنا أن فيه مشكلة في الفرن ومش هـ ينفع نأكل بيتزا! طيب وبعدين؟ طيب فيه ستيك ودجاج مشوي ولا إيه النظام؟ قال لنا: لأ تمام ده موجود. فطلبنا طبق بيف ميلانو بالجبنة الشيدر ومعاه أرز وبطاطس محمرة (65 جنيه) وطبق تشيكن ليمون (53 جنيه) وده بـ يكون فيه صدور دجاج مشوية ومغطاة بصوص الكريمة وقطع الليمون المعصفر ومعاه بطاطس بيوريه وسوتيه. طبق الشيف سالاد (29 جنيه) كان بداية موفقة من منيو المشهيات، فيه قطع سلامي وتركي مدخن ودجاج مشوي وفلفل ألوان وطماطم، طبق يفتح النفس فعلًا. الدجاج بالليمون المعصفر كمان كان خطير، جربه ومش هـ تندم، خاصة لو كنت من هواة الليمون والأكلات المزِزة، البيف فيليه للأسف كان مش قد كده، كان فيه شبه من البرجر والتوابل عليه زيادة، ولأن الشيدر ما كانتش سايحة عليه بالشكل الأمثل. الأصناف الجانبية كلها ظريفة، السوتيه والبطاطس والأرز لفت نظرنا أنه معمول بالسمن البلدي.
عصير تفاح فريش (12 جنيه) كان لذيذ ومنعش، فيه قطع تفاح وثلج، ومعمول أحسن من أي مكان ثاني، كمان الليمون بالنعناع (13 جنيه) فكرة كويسة لو عاوز مزيد من الانتعاش.
الخدمة جيدة وبـ نتوقع أداء أفضل كل لما يمر وقت على المكان والعاملين فيه، «كاريزما» بمكانه وستايله هـ يعرف يكسب زبائن جديدة كل يوم.

نصيحة 360

المكان مناسب أكثر للشباب وقعدات الحبَّيبة، مش للعائلات أو الأطفال.

أحسن حاجة

فيه تخت شرقي بـ يقدم أغاني قديمة كل يوم خميس، والأطباق والساندويتشات والشيشة كويسين هنا.

أسوأ حاجة

العمال في المكان بدأوا يخرجوا القمامة من المطبخ للشارع مرورًا بصالة الطعام وسط الناس اللي قاعدة، أكيد تصرف غريب ومؤذي للعين وللأنف.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح