The Definitive Guide to Living in the Capital , Cairo , Egypt

موجود على الشمال بالداخل، واخد Curve وله واجهة زجاج علشان اللى قاعد جنبها يستمتع بمنظر النافورات الجميل والإضاءات المتميزة، الديكور واخد ستايل الكنب الأمريكي بظهره الطويل وبـ يغلب عليه اللون الأحمر زي اللوجو، فيه موسيقى شغالة صوتها منخفض جدًا لدرجة أننا ما ركزناش معاها غير فى نهاية زيارتنا، والمكان نفسه زحمة جدًا وما كانش فاضل غير مكانين ثلاثة.
المنيو فيها الأقسام الموجودة فى أى مكان لكن غنية بأصناف وأطباق إيطالية لكنها مختلفة عن أى مكان طبيعة مطبخه إيطالية، هـ تقعد شوية تتصفحها لأن كل طبق لها شرح للمكونات، بعد تفكير كثير استقرينا على شوربة الطماطم كبداية (16.99 جنيه) “اسأل الجرسون عن شوربة اليوم”، مع طبق تشكيلة المقبلات “Combo Appetizer بسعر 61 جنيه المكون من سيسيليان ستيكس الحارة، وجبنة موتزاريلا مقلية وحلقات الكليماري المقلي معاها صوص المارينارا الحار وصوص الرانش.

نزل لنا عقبال ما يجهز طلبنا سبت فيه رغيف عيش فرنساوي ومعاه طبق فيه زيت زيتون وتقريبًا بالثوم علشان نصبر نفسنا به، الشوربة نزلت فى ثوانى وكانت سخنة وطعمها بالتوابل اللى فيها يهبل، وكمان طبق المقبلات بعده، فى المقبلات السيسيليان فاير ستيكس كانت مشطشطة شوية ومكونة من خبز التورتيا بالطماطم المجففة محشوة بخليط من قطع الدجاج والسجق وفلفل الهالبينو الحار مع البيكون البقري والثوم والبصل وجبنة إيطالية، كانت جديدة علينا وطعمها لطيف لكنها مش اختيار للناس اللى بـ تحب الأكل مشطشط، الكاليماري كان معمول بتتبيلة كارينوز ومقلى وكانت لطيف “إحنا مش من عشاقه قوي عامة”، وأصابع الجبنة كانت وهمية وفيها برضه تتبيلة مميزة مع الجبنة السايحة اللى قعدت تتشد طول ما إحنا بـ نأكلها.

الأطباق الرئيسية لا تقل روعة عن المقبلات والشوربة، الستيك تسويته فى الجون والفراخ كمان طعمها متميز والخضار والبطاطس كملوا اللوحة الفنية اللى كنا بـ نتغزل فيها، الكميات كبيرة وتوقع أنك فى آخر لقمة بـ تأكلها هـ تفطس.
جاء وقت المشروبات علشان تهدي الدنيا شوية، طلبنا Fudge Ban Shake  بسعر 20 جنيه وده كان عبارة عن  شيك الشوكولاتة وكان حلو جدًا بس اختيار ثقيل على المعدة شوية بعد الأكلة اللى أكلناها، ما كانش اختيار فى محله على عكس عصير الفراولة بالليمون Amalafi Strawberry Lemonade  بـ 17 جنيه اللى هدانا وأنعشنا وكان مزيج رائع مش متعودين عليه من الليمون مع الفراولة.

فى التحلية الصور فى المنيو كانت مغرية جدًا كنا عاوزين نجربهم كلهم، اختارنا Turtle Cheese Cake (35.99 جنيه) وهى طبقة من التشيز كيك وكريمة الشوكولاتة على طبقة من البسكويت المقرمش مغطاة بصوص الكراميل والمكسرات وقطع الشوكولاتة، للأسف اختيار رغم شكله الحلو جدًا كان ثقيل جدًا جدًا لدرجة أنك مش هـ تقدر تأخذ أكثر من أربع قطمات منه، الشكل شادننا لكن بطننا ما قدرتش، على عكس التيراميسو (30.99 جنيه) اللى كان كيكه خفيف رغم كميته الكبيرة برضه اللى محتاجة شخص ثاني معاك يشاركك فيها.