The Definitive Guide to Living in the Capital , Cairo , Egypt

«كاسبر أند جامبينيز» سواء راح الشرق أو الغرب.. فتح فى مكان جديد
أو وفر خدمة توصيل هـ يظل المكان ده عنصر جذب كبير لنا كل ما نشوفه أو نسمع اسمه..
حاجة كده زي المغناطيس.. وده ما جاش من فراغ.. تجربتنا الأولى
هناك فى شهر رمضان اللى فات في فرع سيتي ستارز كانت كفيلة أنها تحببنا فيه من أول
زيارة.

فى مول العرب كان لنا زيارة من فترة
قبل كده لكن حظ الناقد ما كانش لطيف، لكن بعد فترة –وعلشان إحنا بـ نحبه- قلنا
نعطي له فرصة ثانية لأن الزيارات حظوظ، موجود بالقرب من بوابة 2، وله منطقتين للجلوس
واحدة فى المكان المفتوح اللي جنب النافورة الراقصة والثاني بالداخل مدخله من
ناحية المحلات.

القعدة لطيفة فى المكانين، لكن لو
أنت من هواة الاسترخاء أكيد المكان بره هـ يشدك، طلبنا فى الأول سلاطة سيزار بالدجاج
(45 جنيه)، جاءت لنا فى طبق كبير وعميق كأنه نصف دائرة كبيرة، الخس كان طازج
والصوص كان معقول مش كثير ولا قليل والفراخ كانت شرائح رقيقة قوي كانت حلوة بس
كميتها كانت قليلة شوية.

جربنا كمان التشيكن بيستو باستا (56
جنيه) والجرسون نبهنا أن الصوص بتاعها أخضر وبالتالى المكرونة هـ تكون بنفس اللون،
ترددنا فى الأول لكن وافقنا وكانت النتيجة لطيفة جدًا، كانت غنية وطعمها حلو جدًا
إلا أن الصوص كان ثقيل شوية فـ خلانا نشرب مياة كثير، والفراخ كانت مستوية حلو.
كمان طلبنا ذا كلوب (45 جنيه) وهو بالضبط الكلوب ساندويتش وأنت بـ تختار يكون كله
صنف واحد ولا صنفين وبـ ينزل معاه طبعًا بطاطس محمرة فى كوب أبيض عليه لوجو المطعم.

بعد فترة من الأكل شربنا كراميل
لاتيه (22 جنيه) وكمان أصحابنا طلبوا كابتشينو (19 جنيه)، وليمون بالنعناع مثلج
(18 جنيه)، المشروبات كلها بصفة عامة هناك حلوة وغنية لكن اللى كان تحفة أكثر حاجة
الليمون بالنعناع بألوانه الصفراء والخضراء المتداخلة مع بعض وممزوجة بالثلج
المجروش، الكمية كانت كبيرة لكن من حلاوته خلصناه كله.

“كاسبر” زي ما اختصارًا
بـ نسميه عنده زجاجة المياه الكبيرة بـ 13 جنيه، والصغيرة بـ 8 جنيه، والبيبسي
(عبوة الكان) بـ 10 جنيه. وعلى عكس تجربة زميلنا فى الزيارة اللى فاتت لكاسبر
طلبنا جاء لنا بسرعة والخدمة كانت جيدة والجرسونات كانوا متابعيننا.

كمان كاسبر عملوا حاجة حلوة جدًا
ومغرية جدًا بالنسبة لنا مؤخرًا وهى الـ Chocolate Bar اللى تقدر تختار منه أشهر تشكيلة
من حلوى الترافل البلجيكية ودي متوفرة على موقع «ذا جيفتري» أو www.thegiftery.com.