The Definitive Guide to Living in the Capital , Cairo , Egypt

مطاعم
كاشيمبا – Cachimba

كاشيمبا: أكل شرق أوسطي لذيذ مع لمسات راقية في جاليريا 40 الشيخ زايد

تم التقييم بواسطة
Hend Salah
قيم
قيم الآن
كاشيمبا: أكل شرق أوسطي لذيذ مع لمسات راقية في جاليريا 40 الشيخ زايد

لما نتكلم عن المطبخ الشرق أوسطي، أول حاجة بـ نفكر فيها هي النكهات المتنوعة وكميات الأكل الكبيرة، أو على الأقل هو ده الحال في مطاعم القاهرة، "كاشيمبا – Cachimba" الموجود في جاليريا 40 الشيخ زايد بـ يضيف لمسة من الرقي والأناقة على النوعية دى من الأكل.

الفكرة دي كانت ظاهرة على شكل المكان، كاشيمبا بـ يقدم شكل مودرن راقي، مع استخدامهم للألوان البرتقالي والأحمر في الديكورات والمكان الخشبي الكبير المليان نكهات شيشة، وطبعًا القعدة الـ Outdoor المريحة.

واحد من الجرسونات المميزين وصلّنا لترابيزة فى المنطقة الخارجية، وعلى طول قدموا لنا ماء ديتوكس لذيذ منعش مجانًا فيه شرائح ليمون وخيار وورق نعناع.

من الحاجات المميزة لكاشيمبا تشكيلة الأطباق المتنوعة الشرق أوسطية –ومنها أطباق التاباس والباييا الباردة والساخنة وحاجات ثانية– وطبعًا لازم نتكلم عن اختياراتهم المميزة من أطباق السي فوود والفراخ واللحوم.

قررنا نختار من تشكيلة أطباق مطبخ الشرق الأوسط، وطلبنا كان تشيكن طاووق راب (55 جنيه) وكفتة أندلسي راب (45 جنيه).

الطاووق كان ملفوف في عيش بلدي وتتبيلته كانت ممتازة وكمان صوص الليمون أضاف للطعم نكهة لاذعة مميزة ومعاه شوية خضروات، بس المشكلة أن فيه جنب من الراب كان محروق.

نروح لراب الكفتة وحوله الحمص والخضروات المطبوخة صح، وصحيح الكفتة كانت طرية وعصارية، لكن نكهتها كانت مش على المستوى بسبب نقص التتبيلة والبهارات، والنتيجة كانت راب طعمه ضعيف، الاثنين قُدموا في طاسات ومعاهم بطاطس محمرة مقرمشة لذيذة.

بعد ما خلّصنا على الراب، طلعنا على الحلو، كان أمامنا 4 اختيارات وهم قطايف (35 جنيه) وشوكليت بيت كيك chocolate beet cake بـ (35 جنيه) –كيك شوكولاتة بالبنجر– وهوت آبل جينجر كيك (30 جنيه) –كيك الشوكولاتة بالزنجبيل الساخن– وأخيرًا شوكليت فوندو (40 جنيه)، وطبعًا إحنا اختارنا الأخير، أصل خلينا نتكلم بصراحة، مين فينا يقدر يقاوم إحساس أنك تدخل المعلقة في الكيك وتشوف بركان الشوكولاتة الرائع وهو بـ ينفجر؟ المهم أن طلبنا وصل من الفرن مباشرة ومعاه بولة آيس كريم فانيليا، والحقيقة أن الشوكليت فوندو كانت مخبوزة صح من بره، بس المشكلة أن حشو الشوكولاتة ما كانش سائل زي ما كنا نتوقع، وعمومًا أكيد طعمها لا يقاوم مافيش كلام.

خلصنا أكلتنا مع فنجان قهوة تركي معمول بمزاج (20 جنيه) وشيشة عنب (38 جنيه)؛ فعلاً أحلى نهاية لأكلة لذيذة.

نقدر نقول أن تجربتنا مع كاشيمبا كانت مُرضية جدًا، واستمتعنا بالأكل وأجواء المكان، وأكيد المنيو الشرق الأوسطية المتنوعة هـ تخلينا نرجع في زيارة ثانية قريب.

نصيحة 360

كاشيمبا عنده منيو إفطار روعة، شوف معلومات أكثر على صفحتهم على الفيسبوك.

أحسن حاجة

قدروا يعملوا توازن بين شخصية المطبخ الشرق الأوسطية المميزة وبين تجربة الأكل الفخمة.

أسوأ حاجة

الكفتة كانت سيئة رغم أنها من الأكلات السهل تنفيذها.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح