The Definitive Guide to Living in the Capital , Cairo , Egypt

مطاعم
كافاييرو

كاﭭاييرو: كافيه ومطعم هادئ في المهندسين

  • 19 شارع الكروم، ميدان مصطفى محمود
  • عالمي
تم التقييم بواسطة
Waleed Abuarab
قيم
قيم الآن
كاﭭاييرو: كافيه ومطعم هادئ في المهندسين
صعب تلاقي مطعم أو كافيه هادئ في المهندسين، أو بالتحديد في شارع جامعة الدول العربية، الشارع الصاخب وأضوائه المبهرة والمزيكا وصوت المباريات والحفلات الحية اللي طالعة من كل محل أو قهوة في الشارع ده خليتنا متأكدين أن صعب حد يقدر يكسر الطابع الخاص بأكثر الشوارع شهرة وحيوية في العاصمة. فكان لازم ندور في الشوارع الجانبية المتفرعة من شارع جامعة الدول العربية علشان نلاقي مكان هادئ معزول نوعًا ما عن صخب المهندسين المعتاد. وده لأننا كنا محتاجين فعلًا الهدوء في يوم زيارتنا للمحل ده.

«كاﭭاييرو – Cavaiero» موجود في شارع الكروم المتفرع من شارع جامعة الدول، وهو الشارع اللي على ناصيته مبنى بنك الإسكان والتعمير الزجاجي الضخم قبل مسجد مصطفى محمود مباشرة. هـ تدخل الشارع الهادئ وتمشي خطوات قليلة لحد ما تلاقي «أويا لاونج» على شمالك وبعده على طول «كافاييرو» بإضاءة خافتة ولافتة أنيقة ولوجو مميز. البوابة صغيرة توحي أن المكان مساحته صغيرة من الداخل، لكن لما دخلنا لاقينا طرقة طولية ممتدة وفيها أماكن للجلوس يمين وشمال، وفي نهاية االممر مخرج على مساحة مفتوحة مخصصة للشيشة والمدخنين، يعني نقدر نقول المكان على شكل حرف T ومقسم كويس جدًا وغالب على ديكوراته اللون الأخضر الزرعي، بس معمول بشياكة وهـ تحب شكل القعدات والكنبات المريحة المستخدمة. دخلنا مع بعض أصدقائنا من هواة الشيشة في المساحة المفتوحة واللي مستوى القعدات والكراسي اللي فيها أقل شوية من نظيرتها في القاعة المكيفة، لكن المكان بشكل عام جيد ومريح للأعصاب، وفيه شاشات تليفزيون في كل ركن وزاوية ومزيكا عربي بمستوى صوت معقول في الخلفية.

منيو تقليدي زي أي كافيه، مافيش أي حاجة مميزة تُقال عن أصناف «كاﭭاييرو»، مقبلات وشوربات وأطباق لحوم ودجاج وبيتزا وباستا وساندويتشات، وحلويات ومشروبات وكوكتيلات وشيشة. لو عاوزنا نرشح لك طبق حلو ومش منتشر في كل حتة ممكن تجرب طبق دجاج ستراجانوف (42 جنيه) وهو عبارة عن قطع دجاج بصوص الطماطم والجبن وعليه قطع مشروم فريش وحلقات طماطم وفلفل رومي. مع البطاطس البيوريه والخضار السوتيه هـ تنبسط من الأكلة دي وهـ تشبع جدًا كمان.

البيتزا هنا حلوة ومكوناتها فريش جدًا، جربنا بيتزا “Meat Lovers” أو عشاق اللحوم (43 جنيه) وكانت مليانة بيبروني وسوسيس وغرقانة في الموتزاريلا، وتشبع فرد واحد أو فردين مش جعانين قوي.
تشيز كيك بالفراولة (24 جنيه) هـ يبقى ظريف بعد الأكلة دي، وممكن تشرب آيس شوكليت (18 جنيه) أو أي سموزي أو كوكتيل كل حاجة طلبناها هنا كانت لذيذة ومافيش عليها أي ملاحظات. حتى الشيشة كانت مثالية وخدمة الولعة سريعة ونكهاتها تقليدية بس جودتها عالية. الفواكة بـ 14 جنيه والشيشة الفاخرة بـ 24 جنيه. واللي الطبي بـ 5 جنيه.
الخدمة جيدة بس بطيئة شوية، ولازم تنادي على الجرسون أكثر من مرة، ورغم أن عددهم مش قليل إلا أنك ممكن تحس بالتجاهل ولازم تأكد على طلبك علشان ما يحصلش لخبطة. لكن بشكل عام المكان مريح ونظيف والخدمة أكثر من مقبولة. جرب «كاﭭاييرو» لو كنت في المهندسين وبـ تدور على مكان هادئ وأكلات ومشروبات لذيذة.

نصيحة 360

فيه انترنت Wi-Fi ودي حاجة ظريفة. ومافيش خدمة على الفاتورة، ودي حاجة أظرف، بس مش معنى أنه ما يكونش فيه مبلغ للخدمة أنه يبقى مستوى الخدمة أقل من المطلوب! وممكن تشوف صفحة المكان على الفيسبوك.

أحسن حاجة

القعدة حلوة والأطباق الرئيسية لذيذة وكمياتها كبيرة.

أسوأ حاجة

الخدمة البطيئة، أو غير المنتبهة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح