The Definitive Guide to Living in the Capital , Cairo , Egypt

مطاعم
كبابجي مصر

كبابجي مصر.. أكلة جامدة وقعدة حلوة في هليوبوليس

أكل حمام كبابجي مصر مشاوي مصر الجديدة نيفة هليوبوليس ورق عنب
تم التقييم بواسطة
Mohamed Talaat
قيم
قيم الآن
كبابجي مصر.. أكلة جامدة وقعدة حلوة في هليوبوليس

مصر الجديدة معروفة بإنها منطقة تراثية وليها هيبة كده، سواء في مبانيها أو في جوها ومودها، ده حتى ريحة الهواء فيها مختلفة بتخلي المود يتغير 180 درجة، ويمكن علشان كده قررنا إننا نروح نغير جو ونفك عن نفسنا ونجبلكم معانا تجربة جديدة، وفعلًا جربنا هناك مطعم جميل اسمه “كبابجي مصر” يلا بينا نحكيلكم.

مبدئيًا كده المطعم بيقدم مشويات وطواجن وسندوتشات بمختلف الأسعار، يعني هتاكلوا هتاكلوا، المكان عبارة عن دورين بديكور عصري مريح، وألوانه هادية بيغلب عليها اللون البني الفاتح، وعندهم مكان خارجي متاح تاكلوا فيه، كراسيه كبيرة ومريحة، والترابيزات ثابتة وقوية، علشان كده احنا اخترنا نقعد بره.

نيجي للخدمة، الخدمة في المكان كويسة جدًا، والعاملين كلهم مبتسمين ودايمًا متاحين لمساعدتكم، والأهم في المكان إن المطبخ مكشوف قدامكم، تشوفوا فيه عملية تحضير الأكل وعمايله.

البداية كانت بشوربة لسان عصفور ( 15 جنيه) ونزلت سخنة وبسرعة، ومعاها ليمون وطعمها كان جميل وشوربتها مفيهاش دهون كتير ومش دسمة، ودي حاجة تبسط، وكمان طلبنا مقبلات سمبوسك 4 قطع (20 جنيه) والغريب إنها نزلت دافية، وكمان الجبنة جواها سايحة وفيها بارميزان، وده شيئ عظيم أماكن قليلة اللي بتهتم بيه، ده غير كمان طلب ممبار (30 جنيه) كان رهيب جدًا ومفيهوش غلطة.

جربنا كمان محشي ورق العنب (25 جنيه) وده بصراحة يتكتب فيه مواويل، لأنها كانت أول مرة ناكل في مطعم ويبقى ورق العنب مستوي ومظبوط بطعم جنان ورز معمول صح، وكمان طعمه مسكر، أيوة ورق العنب كان مسكر وحلو، وده خلانا نقف كتير علشان نعرف إيه الإضافات اللي محطوطة مخلياه طعمه حلو، وقررنا إننا نسأل “الشيف” علشان نعرف سر الخلطة، ولما سألناه قلنا إنه بعد تسويته بيعمل تتبيلة مكونة من “طماطم شيري” متقشرة ومعاها تومية ونعناع، وبيسقي بيها ورق العنب.

في الطواجن جربنا طاجن تورلي باللحمة (85 جنيه) وكان متسوي مضبوط والكمية حلوة جدًا تكفي فرد أكيل، لكن المشكلة إن اللحمة نفسها معجبتناش، وكان ممكن تتبل بطريقة أفضل أو نوعها يكون أحسن.

جمب الطاجن جربنا  ¼ كيلو نيفه (88 جنيه) ورغم إننا أكلنا قبل كده نيفة في أماكن متخصصة لكن نقدر ندي نجمة ذهبية لكبابجي مصر على طعم النيفة المحبوك واللي رغم إننا عارفين دسامتها، إلا إننا أكلناها كلها واحنا متسلطنين من نضافتها وريحتها البلدي وتتبيلتها وتحميرها.

كمان طلبنا ¼ سجق مشوي (75 جنيه) وده يا جماعة محتاج حد أكيل، ومش أي حد يطلبه، ولو انتوا 2 ممكن تطلبوا ربع واحد كفاية لأنه تقيل جدًا ومتخدم عليه وبلدي 100%، و طلبنا فردة حمام مشوي (50 جنيه)، وفردة حمام محشي مشوي (60 جنيه) هو كان حلو والأرز لذيذ، لكن مش أحسن حاجة، ومحتاجين إنهم يراجعوا المورد والشيف علشان يكملوا كل حاجة حلوة كانت في المطعم.

نصيحة 360

مفيش مشكلة في الركنة، والمكان كبير ومكيف، وبيستوعب أعداد كبيرة.

أحسن حاجة

ورق العنب

أسوأ حاجة

الحمام

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح