The Definitive Guide to Living in the Capital , Cairo , Egypt

مافيش أجمل بالنسبة لنا من المناقيش اللبناني والسلاطات والحلويات اللي بنشم فيها ريحة بيروت، حاجة كده بنحتاج نجربها كل فترة، ومن الأماكن اللي لسه محافظة على جودتها لحد دلوقتي هي كراكاس.

ما بين أصناف الفطار اللي  تجنن مناقيش وفول وفلافل وصفايح لبنة وأنواع سلاطات تجنن، حبينا نجرب حاجات خفيفة تنفع كمقبلات وتنفع كفطار في نص اليوم، فأختارنا من السلاطات فتوش بـ 45 جنيه، و صفيحة لابنة حلومي بـ 44 جنيه، وحلينا بعد كده بعروس بيروت بـ 52 جنيه مع براد شاي بـ 17 جنيه، وموخيتو باشون فروت بـ 38 جنيه.

أول حاجة جت كانت الفتوش، طبق سلاطة كبير جدًا يكفي أكثر من شخص بتتبيلة تاخد العقل وعيش مقرمش من اللي قلبك يحبه.

بعد كده جت صفيحة الجبنة وهي مش صفيحة ولا حاجة دي عبارة عن 4 قطع عجينة مربعين وجواهجم قطعة جبنة حلوم سخنة وبطريقة وتجنن.

للأسف عروس بيروت كان خيبة أمل كبيرة بالنسبة لنا لأن أولًا الآيس كريم هم عاملينه جيلاتو بيمط كده بيتي فكان طعمه غريب، ده غير إننا وجدنا مع الحلاوة الشعر قطع كنافة الجرسون حاول يقنعنا إنها قطع حلاوة مجمدة، ولما زعلنا بدلناها بقطع جلاش بنفس السعر تقريبا بس برضه ماكنتش فريش والعسل فيها أو الشربات كان قليل.

نيجي للشاي الصراحة إحنا اتخضينا لما لاقيناهم جايبين لنا شاي فتلة لأن تجربة الشاي اللي على النار دي ما تتوصفش بس مس مشكلة، لكن الموخيتو كان كويس وطعمه هايل.

كنا متوقعين تجربتنا في كراكاس تبقى أقوى بمراحل من اللي شوفناه، لكن وبرغم إن أسعارهم غالية في معظم الحاجات إلا أنهم لسه محتفظين بجودتهم مع بعض العيوب.