The Definitive Guide to Living in the Capital , Cairo , Egypt

كريبو – Crepo

كريبو: كريب وساندويتشات سريعة في الكوربة

  • 6 شارع الصومال، الكوربة، مصر الجديدة
  • مأكولات سريعة
  • 01228570599
تم التقييم بواسطة
Waleed Abuarab
قيم
قيم الآن
كريبو: كريب وساندويتشات سريعة في الكوربة
غريب قوي المحل ده! إحنا متابعين نشاطه من
فترة وإقبال الناس عليه، يمكن لأنه في مكان استراتيجي ووسط عدد من القهاوي، فالناس
بـ تستسهل أنها تطلب من عنده وتقعد تستنى 5 أو 10 دقائق على ما الطلب يجهز، ويمكن
لأن الكريب نفسه أكلة مغرية ولسه فيه ناس في مرحلة اكتشاف اللفائف الفرنسية
اللذيذة. بس اللي وصلنا له بعد تجربة المحل ده في تخصصه الدقيق وهو الكريب وفي أكثر
من مناسبة، أنه لا يرقى للمكانة اللي أصبح فيها ولا الكريب بتاعه وهمي زي ما كنا
متخيلين لما شوفنا الإقبال عليه، إنما هو الصيت ولا الغنى والموقع والأسعار القليلة
قبل كل شيء، هي دي عوامل نجاح “كريبو – Crepo” الموجود في شارع الصومال في منطقة
الكوربة في مصر الجديدة.
تيك آواي وبس، هـ تأخذ أكلك وتقعد على واحدة من القهاوي
القريبة من المحل وكأنك قاعد بـ تأكل بالداخل. المنيو مطبوع على الجدار خلف الكاشير
اللي قاعد بره المحل في الشارع، وفيه كل أنواع الكريب الحادق والحلو، الحادق فيه
لحوم ودجاج ومأكولات بحرية وخضروات وجبن، والحلو هو النوتيلا السادة أو بالموز
والمكسرات. الأسعار من 8 جنيه لحد 15 جنيه حسب الحشو والإضافات. طلبنا كريب بالبرجر
وإضافات الجبنة الشيدر والموتزاريلا (13 جنيه)، 10 دقائق بالضبط وهـ يبقى فيه قرطاس
كبير بين إيديك فيه الكريب المثلث الضخم من كثر الحشو، وده من عوامل تميزالمحل.
الكريب فيه حاجة غلط، العجين مش تخين بالعكس هو رقيق ومقرمش، لكن الحشو وخلطة
المايونيز والكاتشب والجبن الرخيص اللي داخل اللفائف بـ تعطي له طعم غريب ونكهة
عطرية غير محببة، هي صحيح ضخمة وتشبع لكن الطعم ينقصه الحلاوة والمذاق. الموضع كان
أفضل شوية مع كريب الدجاج الكريسبي بالجبن (15 جنيه) لأنها كانت سبايسي وفيها توابل
أكثر ممكن تداري على أي مشاكل في الطعم. لكن برضه قطع الدجاج كانت مقلية في زيت
واضح أنه مستخدم أكثر من مرة ورائحته ظاهرة في الأكل. يعني الكريب الحادق هنا مش
لذيذ ودي خلاصة الكلام. الكريب الحلو حلو، بالتحديد النوتيلا بالموز والمكسرات رغم
أنها بهدلة وبـ تنزل شوكولاتة سايحة من كل حتة إلا أنها مع شوية مناديل ورق وكوباية
مياه وأنت قاعد على القهوة هـ تبقى أحسن حاجة ممكن تأخذها من عند “كريبو” وتقريبًا
دي أكثر كريباية عليها إقبال عنده حسب ملاحظتنا هي وكريب “الكاتيوشا” الحادق اللي
شبه ساندويتشات الديناميت في محلات الفول، وبـ يبقى فيه دجاج ولحوم وسجق وجبن وسعره
16 جنيه.
وقت زيارتنا ما كانش فيه كريب سي فوود رغم أنه مكتوب في المنيو. وساعات
مش بـ يبقى فيه جبن علشان يتحط على الكريب، ومع ذلك المحل دائمًا شغال والإقبال
الشبابي مش بـ يقف خصوصًا على الأصناف اللي قولنا عليها واللي إحنا شخصيًا بـ
نفضلها دون باقي المذاقات زي السجق والكبدة والشيش طاووق والكفتة. جرب “كريبو” لو
طلبت معاك كريب وأنت في الكوربة لأنه الوحيد اللي بـ يقدم الأكلة المحببة دي في
المكان الحيوي ده.

نصيحة 360

لازق في المحل جنبه "كبداكي" لساندويتشات الكبدة والسجق، هو تابع له وله نفس الكاشير، ممكن تجربه بالمرة.

أحسن حاجة

سريع وفي مكان متفرد هو أحسن استغلاله.

أسوأ حاجة

حشو الكريب الحادق.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح