The Definitive Guide to Living in the Capital , Cairo , Egypt

كريف – Crave

كريف: إفطار شهي ودافئ في أركان مول الشيخ زايد

  • أركان مول - أمام مدينة زايد 2000 - الشيخ زايد
  • عالمي
  • 01200002346
تم التقييم بواسطة
Angie El Batrawy
قيم
قيم الآن
كريف: إفطار شهي ودافئ في أركان مول الشيخ زايد

“كريف”.. يا سلام على “كريف”، خاصة الفرع اللى فى الشيخ زايد، المفضل بالنسبة لنا أكثر من فرع الزمالك، سبق ورحناه وكتبنا أول مقال نقدي لما كان تقريبًا الوحيد اللى فاتح فى أركان مول فى بداياته وأعجبنا بجرأتهم علشان شغالين فى مكان ما كانش اتعرف عنه أو اتعمل له دعايا والناس بـ تكتشفه بالصدفة، قررنا نرجع له ثاني فى الشهر الكريم علشان نجرب الأجواء الرمضانية هناك.

النظام إيه هناك فى رمضان؟ كلمناهم بدري تطبيقًا للقاعدة الذهبية: “احجز قبل ما تروح”، بـ تدفع 55 جنيه للفرد لبوفيه مفتوح للشوربات والسلاطات فقط (11 نوع سلاطة)، وبعدين بـ تختار من المنيو العادية بتاعتهم الأطباق الرئيسية (ماعدا البيتزا والساندويتشات) والتحلية والمشروبات (مافيش مشروبات رمضانية) وده له حساب ثاني لوحده، بس المشكلة أنك لازم تروح تدفع Deposit حجز، لكن علشان ما قدرناش وعدناهم نكون هناك قبل الإفطار بساعة علشان كمان تلحق تطلب علشان الأكل ينزل لك على الآذان بالضبط، وحصل.

فى كريف عاملين حاجة لطيفة أوى، بـ يحطوا لك بلح في علبة صغيرة عليها لوجو “كريف – Crave” ومكتوب عليها “نتمنى لكم صومًا مقبولاً وإفطارًا شهيًا” كنا فرحانين بها أوي، طاقم العمل ودود جدًا ومحترف، بعد ما أخذوا الطلب بتاعنا وقبل الإفطار بشوية نصحونا نقوم نأخذ الشوربة والسلاطة قبل الزحام، ده غير أن الديكور بتاعه مميز ويعتبر من الأفضل فى أركان بقطاعات الخشب المتداخلة ووحدات الإضاءة الضخمة.

كان عددنا كبير، طلبنا مكرونة فيتوتشيني ألفريدو (43.95 جنيه)، وريزوتو فروتو دي ماري (44.95 جنيه)، وفراخ بصوص الكريمة والليمون (54.95 جنيه) وستيك ريب آي (94.95 جنيه)، الأكل كله تحفة وخاصة الستيك اللى نزل معاها Baked potato وحاجة زي بشاميل بالسبانخ وعليه جبن من فوق، كله مستوي حلو والملح مضبوط والكميات كريمة ومافيش غلطة، طبق الريزوتو كان مولع أول ما ذقناه لدرجة أننا شخصيًا سخننا.

بار السلاطات حلو جدًا وفيه اختيارات متنوعة والخضار فريش منها السيزر والجرجير بصوص بني كان طعمه حلو أوي والبابا غنوج، لك اختيار فى الشوربات بين المشروم وكريمة الفراخ، والاثنين لا يعلى عليهم.

لأن كميات الأكل كبيرة قعدنا شوية نفصل ونهضم، المشروبات الكوكتيل والسموزي هنا مافيش منها اثنين خاصة العملاق “الجهبذي” المارجريتا (22.95 جنيه) بلونه الأزرق فى أخضر اللى شدنا من أول ما عيوننا وقعت عليه فى المنيو، فيه كمان كوكتيل اسمه Hawaiian Island بسعر 22.95 جنيه تحفة، وكل كوكتيل مكتوب تحته وصف لمكوناته، فيه كمان عندهم مشروبات غازية زي بيبسي (10.95 جنيه) وفى الساخنة قهوة تركي (9.95 جنيه) وأسبريسو Double بسعر 15 جنيه، وزجاجة المياه (حجم كبير بـ 9.95 جنيه).

ختمنا قعدتنا بحاجة جميلة جدًا بـ ندور عليها فى كل مكان نروحه وهي شوكولات فوندو (34.95 جنيه) اللى تفاجئنا بخفيتها وحلاوتها على عكس أماكن ثانية بـ تكون ثقيلة جدًا، بس نصيحة قسمها مع حد صاحبك لأنها كبيرة، بعد حساب سعر الفرد 55 جنيه والأطباق والحلو والمشروب اللى أخذته والخدمة والضريبة ممكن تتخض من الرقم النهائي بس القعدة والمكان والخدمة يستحقوا.. إفطار شهي وخدمة دافئة من جرسونات “كريف”.

نصيحة 360

قلنا رأينا للجرسون وإحنا بـ نحاسب والمدير كان ذوق جدًا وخصم قيمة فرد واحد من عندنا ما أخذش ولا شوربة ولا سلاطة، كانت حركة ذوق منهم، بس يمكن كان مافيش مشكلة علشان ده فرد واحد بس.

أحسن حاجة

الخدمة والمكان والأكل.

أسوأ حاجة

ليه إجباري للفرد سلاطة وشوربة؟ فيه ناس مالهاش فيهم، ليه يتحاسبوا عليها؟

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح