The Definitive Guide to Living in the Capital , Cairo , Egypt

كريف – Crave

كريف: مكان تحفة وأكل أحلى فى أركان مول بالشيخ زايد

  • أركان مول - أمام مدينة زايد 2000 - الشيخ زايد
  • عالمي
  • 01200002346
تم التقييم بواسطة
Angie El Batrawy
قيم
قيم الآن
كريف: مكان تحفة وأكل أحلى فى أركان مول بالشيخ زايد

مغامراتنا فى أركان مول بالشيخ
زايد لا تنتهى..كل مرة لما نروح بـ نلاقى مطاعم وكافيهات جديدة فتحت، لكن من أوائل
المطاعم اللى فتحت هناك -فى الوقت اللى كان حواليه لسه أماكن تحت الإنشاء- وكان
واضح لنا جدًا وجذاب بألوانه وديكوراته مطعم «كريف – Crave».

له فرعين فى الزمالك والمعادي، بـ
نحسب للمطعم ده مخاطرته أنه يكون من أوائل الأماكن اللى تفتح فى المول من قبل ما
يتعرف للناس، بس اللى فاجأنا أننا رحنا والمكان كان فاضي بس مافيش شويتين والناس
ملأت المكان جوه وبره، غالبًا كل دول من سكان مدينة زايد 2000 المواجهة للمول.

المكان رائع والديكورات حلوة جدًا
بتفاصيلها وهادئة ومريحة فى نفس الوقت، المكان بـ يجمع بين اللونين الموف والبني
الفاتح مع الأبيض، القعدة اللى بره هائلة وفيها شغل متداخل بالخشب شيك جدًا.

قعدنا فى المنطقة الداخلية لأن
الجو كان حر قوي، المنيو شكلها حلو والاختيارات كثيرة بس قعدنا فترة عقبال ما
استقرينا هـ نأخذ إيه لأن فيه شرح لمكونات كل طبق، أى نعم تجربتنا فى فرع الزمالك
كانت من فترة كبيرة سيئة لكن الاستقبال والديكور وعوامل كثيرة شدتنا أننا نجرب الفرع
ده، طلبنا فى المقبلات علشان نجرب كل حاجة عندهم كومبو بلاتر (45.95 جنيه) اللى
فيه مقبلات مختلفة زي السبرنج رولز وأصابع الموتزاريلا واللى بـ تيجي فى صينية
طويلة فيها عيون وكل عين فيها صنف شكل، وطبعًا نازل معاها كذا نوع صوص، كانت خطيرة
واستمتعنا بها قوي.

فى الأطباق الرئيسية جربنا تشيكن
إم سي إم (51.95 جنيه)، وفيليه ويز تشويس (73.95 جنيه) واللى فيه بـ تختار الفيليه
بتاعك مع اختيارك لطريقة التسوية والصوص اللى عليها، طلبناه بالليمون وكان خطير
واللحم كان مستوي كويس جدًا، مش كثير ممكن تلاقى حد بـ يعمل اللحمة حلوة كده،
والفراخ برضه كانت مستوية كويس وبـ ينزل لك مع الأطباق اختيارين فجربنا البطاطس
البيوريه والخضار السوتيه فى طبق والثاني أخذنا فيه أرز بدلاً من الخضار، بجد
الأكل مبهج وشهر وما يتخيرش عن بعضه، إحنا مبسوطين جدًا.

لما بـ تقعد وتطلب بـ ينزل لك زجاجة
مياة صغيرة (5.95 جنيه) وفيه 12% خدمة و10% ضريبة، الأطباق نفسها بـ تتميز بأشكال
غريبة عجبتنا جدًا خاصة أن بعضها كان على شكل مستطيل فـ تحس أنك بـ تأكل فى حوض بس
شكله حلو!، بعد ما هدينا شوية كان لازم نهدي الموضوع شوية بالعصائر اللى كان شكلها
مغري جدًا جدًا فى المنيو بألوانها وطريقة عرضها، طلبنا عصير ليمون بالنعناع
(16.95 جنيه) وسموزي البرتقال (18.95 جنيه).. إيه الانتعاش ده؟ العصائر كانت أكثر
من رائعة، سكرها مضبوط، خفيفة وكميتها معقولة جدًا، زعلنا لما خلص، خاصة أنه خلص
بسرعة من حلاوته.

إحنا ضعاف جدًا أمام الحلويات..
وخاصة التشوكلت فوندو (34.95 جنيه) اللى بقينا مدمنينه بقالنا فترة وبـ نطلبه فى
كل مكان نروحه، لكن لو عوزنا نحسر الأماكن اللى بـ تعمله كويس «كريف» هـ يكون على
رأس القائمة دي، بجد خرافة، مش هـ ننسى منظر الشوكولاتة الساخنة وهى نازلة بـ تسيح
على الكيك من الداخل مع أول معلقة قطمت جزء منها، كمان مع مزجها بالآيس كريم اللى
بـ يقلل من دسامتها يبقى كده الصورة اكتملت.

شعار «كريف» من أول ما عرفناه
“You Crave.. We Serve”
وده اللى حصل وبامتياز كمان فى فرع أركان مول، الجرسونات هائلين ومتعاونين وبـ
يعرفوا يخدموك بحب.. أكيد لنا زيارة ثاني قريب للمكان لأن مازال عندنا فضول نجرب
أطباق ثانية فى المنيو بتاعهم.. برافو.

نصيحة 360

جرب الجلوس فى المنطقة المفتوحة.. هـ تعجبك قوي.

أحسن حاجة

الأكل كله تحفة بصفة عامة.. خاصة النجم "التشوكلت فوندو".

أسوأ حاجة

ممم. مش عارفين! إحنا اتبسطنا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح