The Definitive Guide to Living in the Capital , Cairo , Egypt

مطاعم
كشري أبو سليمان

كشري أبو سليمان: أقوى كشري في مصر في العتبة

  • 2 شارع أرض شريف - في منطقة شارع عبد العزيز - العتبة
  • مصري
  • 11 صباحًا: 11 مساءً -
تم التقييم بواسطة
Cairo 360
قيم
قيم الآن
كشري أبو سليمان: أقوى كشري في مصر في العتبة

إحنا من مدمني الكشري، مافيش محل بـ نشوفه إلا وندخله، الموضوع بالنسبة لنا مزاج، ونقدر نقول أننا بقينا خبراء في قصة الكشري دي، قبل كده كنا عملنا لكم موضوع عن أقوى عشرة محلات كشري في القاهرة، بصراحة ساعتها ما كناش لسه جربنا كشري “أبو سليمان”، وقتها قولنا أن كشري سيد حنفي هو أقوى كشري ذوقناه، لكن بـ نعلن دلوقت أنه ظهر محل كشري ثاني صغير جدًا وبسيط جدًا جدًا، أقوى فعلاً من سيد حنفي.

“يجعل سره في أضعف خلقه”.. هو ده بالضبط الوصف اللي ينطبق على أبو سليمان، في الأول قيل لنا أن الرجل ده أقوى من أي حد ثاني ممكن نأكل عنده كشري، بصراحة ما كناش مصدقين، خاصة لما شوفنا المحل قد إيه صغير وضيق جدًا مافيش غير أربع ترابيزات متلاصقين اثنين يمين واثنين شمال، الناس بـ تقعد جنب بعض وتأكل، مافيش حد له ترابيزة خاصة به… الكلام ده في الأحلام عند “أبو سليمان”.

عارفين نوعية المطاعم اللي بـ تكون في حواري وزخانيق ما يعرفهاش غير الأكيلة اللي يهمهم الطعم أكثر من الشكل والجو العام، أهو ده الحال مع أبو سليمان، محل ما يتعداش  حجمه أمتار لكن ذوقنا فيه أمتع وأقوى وألذ وأغنى كشري كلناه في حياتنا، قعدنا على ترابيزة مع ناس ثانية ما نعرفهاش، لكن ما حسيناش أن فيه حاجة غلط، الكشري بـ ييجي بسرعة وبـ يبدأ من 3.50 جنيه، وده ثمن لطبق كشري محترم فعلاً ويشبع لكن طبعًا فيه أطباق بأسعار أعلى 4.50 جنيه و5.50 جنيه و6 جنيه وهكذا..

مافيش طواجن، هو كشري وبس، مجرد ما تطلبه ييجي لك في الحال، المحل خلية نحل تبقى قاعد  وأواني التقديم مش مبطلة تكتكة بسبب كثر الأطباق اللي عمالة تنزل، الناس بـ تكون واقفة أمام المحل كثير بـ يأكلوا في علب، ندخل بقى على الطعم…

الكشري غني بالمعنى الحرفي للكلمة، الصلصة طعمها رائع، مايلة للون البني شوية، ما قدرناش نفهم هو حاطط لها إيه علشان تكون بالطعم ده، كمان المكرونة مستوية بجد، وأكثر من الأرز بكثير، والعدس شوية صغيرين، الدقة اللي عاملها فعلاً مميزة، تحس فيها بمزازة كثير من محلات الكشري ما بقيتش بـ تهتم أنها تكون موجودة مع أنها أساس الكشري، الدقة مش مجرد شوية ثوم ما لهمش طعم، الدقة يعني ليمون أو خل وحاجة حمضية تعطي الكشري معنى وروح حقيقية.

لما تحط الدقة على الشطة على الكشري مش ممكن هـ تبطل أكل، ومكن تطلب ثاني لأن الطعم خرافي، بصراحة ما ذوقناش في حياتنا كشري بالطعامة دي، لكن لجل الورد يتسقي العليق، ولجل كشري أبو سليمان لازم تستحمل الزحمة والوقوف علشان تلاقي مكان وتعرف تقعد وتأكل.

نصيحة 360

لو قلبك جامد وعاوز تأكل كشري صحي وما بـ يهمكش الزحمة والمكان الضيق والشكل العام للمكان، يبقى روح بقلب جامد على أبو سليمان هـ تأكل أقوى طبق كشري أكلته في حياتك.

أحسن حاجة

الطعم والرائحة وسرعة التقديم والخدمة من ناس واقفة على رجلها بس علشان تلبي طلبك قبل ما تطلبه بسرعة بديهة.

أسوأ حاجة

ضيق المساحة والزحام الشديد والاضطرار للانتظار.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح