The Definitive Guide to Living in the Capital , Cairo , Egypt

كورتادو – Cortado

كورتادو: مطعم جديد لطيف فى المهندسين

  • 8 شارع البطل أحمد عبد العزيز
  • عالمي
  • 01141422220
تم التقييم بواسطة
Angie El Batrawy
قيم
قيم الآن
كورتادو: مطعم جديد لطيف فى المهندسين
نهاية شارع البطل أحمد عبد العزيز مكان يزغلل العين بكمية المحلات والمطاعم بأنوارها، لكن من فترة عدينا على الجهة المقابلة لمحل «بي تي إم – BTM» قبل عمارة الإمارات لقينا مطعم جديد لفت إنتباهنا جدًا بلونه البرتقالى القوي وتصميمه اللى بـ يدل على ديكور لطيف واسمه غريب.. مطعم «كورتادو – Cortado».

الافتتاح الرسمي كان الخميس اللى فات، لكن كانوا عاملين Soft Opening بقى لهم شهر، المكان من الداخل شكله رائع بديكوره اللى بـ يغلب عليه برضه اللون البرتقالى، فيه قعدة تحت (كافيه) واللى فوق (مطعم) بـ تطلع له بسلم شبه حلزونى، وده واضح من ديكور المكان، القعدة اللى تحت (واللى مقسمة لجزئين فى مكان مفتوح والثاني مغلق بس محاط بزجاج) عبارة عن ترابيزات وكراسي خشب مناسبة لجو الجنينة، أما فوق فالكراسي ظهرها طويل ومنجدة وشكل الترابيزات عامل زي قعدة الصالون وهى مناسبة أكثر لجو المطاعم، فيه حرفين “C” كبار فى الواجهة نازل منهم نافورة والإضاءة خافتة فى جزء الكافيه على عكس جزء المطعم.

قعدنا فى الدور اللى تحت، المنيو كبيرة وفيها اختيارات كثيرة، أول حاجة اختبرناها فى المكان أننا ما كناش عارفين نقرأ المنيو من الظلمة فشغلنا نور الموبايل بتاعنا، الأصناف كثيرة ومختلفة ما شفناهاش فى أماكن ثانية، نزل لنا زجاجة مياه (حجم كبير بـ 4.95، وصغير بـ 3.95 جنيه)، بدأنا قعدتنا بشوربة طماطم بالريحان (13.99 جنيه) اللى كانت ممتازة مع قطع العيش المحمص اللى جاءت لنا منفصلة جنب الطبق، القوام والطعم ممتاز وكمان الريحان أعطى لها مذاق متميز، بداية جيدة لقعدتنا.
من الأطباق الرئيسية طلبنا حاجة جديدة أول مرة نشوفها هى كسرولة ألا فيتيلو Casseruola Ala Vettelo أو طاجن البتلو (74.99 جنيه) وهو عبارة عن طاجن فيه بتلو مع بصل وفلفل ألوان وفاصوليا خضراء وبشاميل مغطى بجبنة موتزاريلا وبـ ينزل معاه طلبين جانبيين اختارنا سوتيه وبطاطس بيوريه، وكمان جربنا كراستد بارميزان سلاد (29.99 جنيه)، الأكل جاء لنا بعد وقت طويل جدًا لدرجة أننا سألنا عليه مرتين، خاصة ما كانش فيه مبرر أن السلاطة تتأخر لكن ممكن نلتمس عذر للطاجن، المهم جاء لنا الأكل فى الآخر شكله وتقديمه حلو جدًا، الطاجن كان سخن مولع، الخضار والجبنة مع البشاميل تحفة رغم أنهم كانول محتاجين يكونوا ماسكين نفسهم لأن البشاميل كان “ميه” شوية ونجم الطاجن اللى هو البتلو كان تسويته غريبة، لما أكلناه كان طعمه غريب مش عارفين ناقصه إيه، لكن بصفة عامة الطاجن كان كويس، السلاطة كانت عبارة عن خس وخيار وطماطم معاهم شرائح فراخ مقلية ومعاها صوص منفصل، كان فيه حاجة بـ تقرمش فى المكونات بس طبعًا ما كناش شايفينها فى الظلام، السلاطة لطيفة والمكونات طازجة لكن مافيهاش حاجة Special.

عندهم مشروبات فريش وكوكتيل وقهوة وشوكولاتة ساخنة (كافيه لاتيه 14.95 جنيه) وباردة وغازية (سفن أب 9.95 جنيه)، طلبنا من منيو المشروبات المنفصلة عن الأطباق كورتادو كوكتيل (24.95 جنيه) المكون من كيوي وبرتقال ومانجو، كان فريش وطعمه حلو والمكونات طازجة استمتعنا به، ومن المشروبات الباردة طلبنا ميلك شيك فانيليا (15.95 جنيه) كان ساقع وخفيف وقوامه مضبوط.
المكان بـ يضيف خدمة، مافيش ضريبة، ولهم صفحة على الفيسبوك ممكن تتابع منها جديد المكان اللى استمتعنا بالقعود فيه على الرغم من شوية تضبيطات ممكن يعملوها علشان يبقوا أفضل وأفضل. 

نصيحة 360

المكان بـ يقدم شيشة، وممكن كمان هناك تلعب بلاي ستيشن، وتعمل عيد ميلاد بموسيقى مصاحبة لحد من أصحابك. اتصلوا علشان تعرفوا تفاصيل الحجز.

أحسن حاجة

شوربة الطماطم بالريحان.

أسوأ حاجة

طعم البتلو كان ناقصه حاجة!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح