The Definitive Guide to Living in the Capital , Cairo , Egypt

كوكس أند بيجز

كوكس أند بيجز: إفطار في تراس مفتوح في صن سيتي مول

  • صن سيتي مول، الدور الخامس
  • عالمي
  • 01207500813
تم التقييم بواسطة
Waleed Abuarab
قيم
قيم الآن
كوكس أند بيجز: إفطار في تراس مفتوح في صن سيتي مول

صن سيتي مول فتح أبوابه للجمهور من سنة تقريبًا، موجود في طريق المطار في
مساكن شيراتون، من بعيد وأنت معدي من جنبه هـ تشوف لوجو «كارفور» العملاق، تقريبًا
فيه ناس تعرف المول بأنه “كارفور اللي في مساكن شيراتون” لكن الحقيقة
الموضوع أكبر من كده، لأن داخل المول المكون من 5 طوابق منهم 3 طوابق تحت الأرض هـ
تلاقي عدد هائل من المحلات والتوكيلات والمطاعم والكافيهات إن شاء الله يكون فيه
مجال أننا نكتب مقالات عنها كلها. والبداية كانت مع وجبة إفطار لذيذة في مطعم «كوكس أند بيجز – Kook’s & Bigg’s» الموجود في الطابق
الخامس أو الطابق الثاني فوق الأرض. المطعم عبارة عن تراس خارجي مفتوح وفيه View جانبي على
الطريق لكن المنظر في الخارج مش حلو قوي لأن المنطقة المحيطة لسه منطقة بناء
وأعمال تحت الإنشاء، بس في المستقبل هـ يبقى فيه حدائق والمنظر من فوق هـ يبقى
تحفة. مشكلة ثانية في المكان المفتوح أن الجو حار فعلًا والمراوح هنا مش كفاية ولا
مكيفات الأماكن المفتوحة، فلو مش بـ تستحمل الحر أو الرطوبة يبقى أكيد مش هـ
تستحمل القعدة وقت طويل هنا. غير كده المكان ظريف وديكوراته أنيقة ومساحته مش
كبيرة وفيه حوالي 10 ترابيزات بأحجام مختلفة ووقت زيارتنا العدد كان محدود وعجبنا
ده جدًا لأن المكان كان هادئ وحسينا وكأننا في عزومة منزلية بسيطة.

في إفطار رمضان «كوكس أند بيجز» عامل بوفيه مفتوح فيه أصناف محددة طول
الشهر، وهي عصير قمر الدين أو الكركديه، شوربة اليوم (كريمة الدجاج أو لسان
عصفور)، سلاطات ومخللات، كرات اللحم بالصوص الأبيض وكفتة البطاطس وكبدة دجاج بالبسلة وأرز بالخلطة ومحشي كوسة وباذنجان
وطبق رئيسي من المشويات، وأخيرًا اختيارك من المهلبية بالمكسرات أو الحلويات
الشرقية المنوعة. وجبة الإفطار للفرد بـ 120 جنيه غير شاملة الضريبة ولا الخدمة،
يعني نقدر نقول 150 جنيه للفرد.

الأكل حلو ده أكيد وفيه أصناف مميزة ومبتكرة زي كبدة الدجاج المخلوطة بحبات
البسلة وكرات اللحم أو الكبيبة اللبنانية بالكريم صوص، لكن طبق المشويات الرئيسي
كان محبط، أولًا لأنه معمول على الجريل مش على السيخ أو الفحم، حتى الكفتة كانت
على الجريل، قطعة الستيك والدجاج المشوي كانت مستوية كويس، لكن التتبيلة والطعم
بشكل عام كان ناقصه شوية بهارات وكثر من “المذاق”. نقدر نقول أن اللي
أنقذ الوجبة الأرز بالخلطة وأصناف اللحوم الجانبية زي الكبيبة وكفتة اللحم بالبطاطس والليمون وكبدة الدجاج اللذيذة. المحاشي كمان كانت مش قوي ده غير أنها كانت محشوة
باللحم بجانب الأرز فكانت دسمة جدًا. حلقات بنجر وخيار مخلل وطحينة وسلاطة زبادي
وباذنجان مخلل ده اللي كان موجود على بوفيه المشهيات، الطعم حلو بس كان المفروض
يبقى فيه تنوع أكبر من كده، وكان المفروض يبقى فيه سلاطة طماطم وثومية مثلًا.

الخدمة مهذبة لكن بطيئة شوية وبدأنا نستخدم البوفيه بعد المغرب بحوالي 10
دقائق لأن بعض الأصناف ما كانتش جاهزة، لكن مع بداية تناولنا للأكل بدأ
الجرسونات يتحركوا بكل نشاط حولنا علشان يشوفوا لو ناقصنا حاجة. بعد الإفطار
عجبنا جدًا المهلبية بالمكسرات والحلويات الشرقية، فريش ومذاقها رائع، لكن
ما قدرناش نقعد وقت طويل بسبب موضوع الرطوبة في المكان المفتوح وبسرعة رجعنا لأحضان
المول علشان نستمتع بالتكييف ونتمشى شوية بعد الوجبة الدسمة.

نصيحة 360

بما أنه مكان مفتوح ففيه شيشة طبعًا، ولو مافيش ضغط على المطعم ممكن تدخل وقت الإفطار وتأكل على طول بدون حجز مسبق بالتليفون.

أحسن حاجة

الأرز بالخلطة وكبدة الدجاج بالبسلة.

أسوأ حاجة

نفس مشكلة المطاعم داخل المولات؛ أقرب حمام في نفس الدور بعيد جدًا عنه.  

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح