The Definitive Guide to Living in the Capital , Cairo , Egypt

لامفيتريون – L’Amphitrion

لامفيتريون: تاريخ وبس

تم التقييم بواسطة
Meriam Wagdy
قيم
قيم الآن
لامفيتريون: تاريخ وبس

في شارع الأهرام اللي في قلب مصر الجديدة فيه
أكتر من مطعم قديم٬ بـ يفكر الحي والمنطقة بزمن ليه معماره المميز وطعمه اللي
مايتنسيش. «لامفيتريون» بقى له في شارع الأهرام حوالي 90 سنة بالتحديد من سنة
1922. مُلاكه الأصليين كانوا يونانيين٬ و«أمفتريون – Amphitryon» هو شخصية من شخصيات الأساطير
الإغريقية٬ وكان على حسب الأسطورة قائد من طيبة. لكن الويتر شرحلنا الإسم على انه معناه “لقاء الأحبة”.

المكان اللي واخد ناصية وموقعه هايل٬ ومساحتة
اكبر مايبان عليه من بره. متقسم لحوالي خمس أماكن: 3 عبارة عن قهوة مفتوحة٬ وقهوة
مغلقة٬ ومكان واخد شكل مطعم واسمه «شيه پاسكال –  Chez Pascale» وعرفنا من الويتر ان پاسكال هي أول أحفاد مالك المطعم الحالي واللي عندها النهارده 5 أو 6
سنين. قررنا نقعد في «شيه پاسكال». المكان واخد طابع المطاعم القديمة٬ كله شبابيك
إزاز قديمة٬ وترابيزاته تقليدية كلاسيكية. المكان كان مرتب وإضاءته قوية ولذيذة٬ وكانت الكراسي
خشب مريحة٬ على عكس باقي الأماكن اللي كراسيها بلاستيك عليها خدديات٬ وكان كل اللي
في المطعم٬ برة وجوة إما بـ يشرب قهوة ولا شاي٬ او بـ يستمتع بالشيشة بتاعته.
ماحدش كان بـ ياكل وعرفنا ليه بعدين.

اول ما قعدنا الويتر جابلنا المنيو. المنيو
عبارة عن ورقة محطوطة في جراب جلد٬ المنيو متقسم تقسيمة مش تقليدية وتدل على
الإهمال. الأكل مشويات تقليدية وبـ تبدأ من 30 جنيه لطبق الكبدة الإسكندراني٬ لـ59 جنيه
لطبق ريش مشوية. والعجائن والمشويات بـ تبدأ من 10 جنيه لطبق الرز السادة لـ28
جنيه لمكرونة فواكه البحر اللي مسمينها في المطعم “مكرونة شرائط هرقل”. في
السلطات العادية اللي بـ تنزل مع المشويات وبـ تتراوح أسعارها ما بين 6 و8 جنيه
وكان فيه كمان “أونر رينج” المقصود بيها “أونيون” اللي هي
شرايح البصل المقلية. المشروبات ونكهات الشيشة محدودة٬ بالنسبة للشيشة مافيش غير معسل وتفاح وبـ6.5 و7 جنيه. وكان فيه كمان «زبادي شيكر» وده غالباً كان المقصود به
“شيك”.

طلبنا من الويتر فلتو مشوي بالمشروم فقالنا
ناخد كباب وكفته أحسن٬ وفعلاً أخدنا كباب وكفته (47 جنيه) وبيكاتا بتلو (48 جنيه).
الأول كان نازل معاه بطاطس محمرة٬ والتاني بطاطس محمرة برضه وخضار سوتيه. الكفته
كانت حلوة جداً والبهارات المستخدمة فيها طعمها واضح٬ واللحم نفسه باين جودته العالية وطعمه جميل٬ الكباب ماكانش بـ يشد وكان حلو برضه. البطاطس كانت عادية٬
لكن حلوة. وكان نازل جنبها كاتشب بيتي طعمه معسل وفريش٬ لكن كان محطوط في إزازة
هاينز قديمة! البيكاتا كانت مزيتة وتكاد تكون مهرية٬ الصوص اللي عليها كان غريب٬
لكن اللحمة نفسها كان باين عليها كويسة. الخضار السوتية ماكانش عليه ذَرة ملح ولا فلفل ولا أي حياء من أي نوع. مع الأكل اخدنا محشي ورق عنب. وده كان
رزه مهري وسمين جداً ولحمته مش مستوية والورق نفسه ني.

شربنا مع الأكل ليمون بالنعناع (8 جنيه) وقدم
لنا بعض العزاء مع الأكل اللي وصفناه. بعد الأكل اخدنا طبق مهلبية مع الأيس كريم كان صغير وطعمه حلو بس مافيهوش حاجة مميزة٬ المميز كان تمنه: 14جنيه!

بعد ما الهمنا تاريخ المكان وجوه القديم
واسمه الإغريقي٬ اتفاجأنا في الأكل مفاجئة مش سارة٬ لكن مفاجأة الفاتورة سرقت
الأضواء من المفاجأة الأولى: 182 جنيه! (المكان على فكرة قديم وجميل فعلاً، لكن مش فخم لدرجة الغلو ده أبداً) ودفعنا 8 جنيه على العيش! 4 جنيه للطبق٬ مع
ان المنيو بـ يقول العيش الشامي بـ2 جنيه٬ ده غير ان احنا ماطالبناش عيش أصلاً. ده
غير الـ30 جنيه اللي دفعناها خدمة وضريبة.

نصيحة 360

إشرب ماتاكلش.

أحسن حاجة

التاريخ اللي ورا المكان والركنة السهلة.

أسوأ حاجة

عيش بـ8 جنيه ومن غير ما نطلبه! بجد؟

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح