The Definitive Guide to Living in the Capital , Cairo , Egypt

مطاعم
لا كازيتا – La Casetta

لا كازيتا: أجمل بيتزا ممكن تأكلها في حياتك في المعادي

تم التقييم بواسطة
Nagla Ashraf
قيم
قيم الآن
لا كازيتا: أجمل بيتزا ممكن تأكلها في حياتك في المعادي

يا سلام على الأكل الإيطالي وجمال الأكل الإيطالي في القاهرة، أحيانًا بـ تصيبنا خيبة أمل من بعض المطاعم الإيطالية، وأحيانًا بـ ننتقل للأجواء الإيطالية الكلاسيكة وجمالها، مطعم “لا كازيتا – la Casetta” من المطاعم المشهورة جدًا في المعادي، خاصة بالبيتزا بتاعتها، الحق يقال هو كل أكلهم حلو والمنيو متنوع فعلًا، ما بين كثير من الأكلات الإيطالية والأطباق الكلاسيكية.

بدأنا بسلاطة Santa Monica بـ 35 جنيه، وهي سلاطة خضروات بحرية وكان معاها جبنة مبشورة تحفة وخس وجزر وكمية الجمبري كانت مناسبة جدًا.

بعد كده بقى المتعة كلها في بيتزا لا كازيتا، اللي معروفة بالعجينة الرفيعة والجبنة اللي بـ تدخلك في عالم كله حاجات بـ تمط وأنت بـ تجري وراها بالشوكة، علشان تلحق الموتزاريلا السائحة، المهم بيتزا بحر الموتزاريلا دي كانت بيتزا Salome بـ 54 جنيه، واللي كان جواها فراخ ومشروم وطماطم، والجدير بالذكر أن عندهم تقسيمات كثيرة لأحجام البيتزا ومسميينها على أسماء لاعبي الكرة نبدأ من الأصغر للأكبر: شيكو وبيبو ومارادونا وفي الحجم العادي كمان ما لاقوش لعيب ينفع يسموه به تقريبًا.

طلبنا كمان Sea Food Special بـ 79 جنيه، واللي كان غني جدًا بالبشاميل ووجه محمر في الفرن، بمجرد ما تأخد منه حتة بالشوكة، هـ نلعب نفس لعبة الموتزاريلا، وبرغم أن الطبق كان صغير إلا أنه كان ثقيل جدًا، وغني جدًا، ومليان جمبري وكاليماري، وطلبنا معاه مكرونة Caprice a la Crème بـ 54 جنيه، ودي بقى كانت قنبلة موقوتة ثانية، لأنها كانت ثقيلة جدًا بالفراخ والمشروم. يعني أنت لو شخص بـ تحب الدسامة هـ تستمتع، بس لو حد بـ يحب الأكل يبقى خفيف، مش ده المطعم المناسب لك خالص يا فندم.

أخيرًا، نقدر نقول لك أن أي وجبة هـ تأكلها هناك هـ تستمتع بها، لأن مطعم لا كازيتا بقى له سنين في المعادي، ومعروف بجودة أكله ده غير فروعه الثانية في مصر. المشكلة الوحيدة بس أن الإضاءة كانت خافتة جدًا، وده ممكن يناسب جو الكافيه أكثر من جو مطعم بـ تروحه الكثير من الأسر المصرية، اللي بـ تبقى عاوزة تشوف بعض على الأقل. لكن الأكل والخدمة ممتازين. وكالعادة ما تروحش غير مع حد أنت بـ تحبه وعاوز تستمتع معاه بأكل حلو ومعمول بحب.

نصيحة 360

جرب العيش بتاعهم بالثوم والزبدة حكاااية.

أحسن حاجة

البيتزا طبعًا.

أسوأ حاجة

الدسم في الأكل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح