The Definitive Guide to Living in the Capital , Cairo , Egypt

مطاعم
لو كير 1940 – Le Caire 1940

لو كير 1940: أكلات شرقية وهمية في مصر الجديدة

  • 96 شارع عمر ابن الخطاب
  • مصري
  • 10 صباحًا: 2 صباحًا -
تم التقييم بواسطة
Waleed Abuarab
تقييمك
قيم الآن
لو كير 1940: أكلات شرقية وهمية في مصر الجديدة
رايحين المكان وعندنا انطباعات مسبقة عن شكله ونوع المنيو بتاعه، علشان شوفنا قبل كده فرع له كلاسيكي وأنتيكة بزيادة في عمارة قديمة في الزمالك وقعدته بصراحة كانت كئيبة أو نقدر نقول “عواجيزي” شوية. وكنا عارفين أن المنيو عبارة عن مشويات وحمام وبط وملوخية وكوارع وحاجات زي دي. فـ توقعنا أننا نشوف حاجة مشابهة في فرع مصر الجديدة.

لكن تفاجئنا لما لقينا نفسنا أمام مطعم وكافيه في منتهى الشياكة والأهم أنه في منتهى الحداثة، وإن كان محافظ على طابع كلاسيكي وقور لكن بطريقة مبهجة وتحببك في جو المكان. فرع مصر الجديدة موجود في شارع عمر بن الخطاب جنب ساحة طعام تيـﭭولي على نفس الصف بتاعها، وما توقعناش أن الإقبال يكون كبير كده على «لو كير 1940» في ظل وجود أكبر فوود كورت في مصر على بعد خطوات منه. لكن استغرابنا ما استمرش كثير بعد ما دخلنا واكتشفنا قد إيه المكان ظريف وقعدته حلوة؛ وإحنا لسه ما تكلمناش على الأكل كمان.
فيه قعدة في منطقة خارجية مفتوحة وفيه صالة مكيفة داخلية، الغريب أن الشيشة مسموح بها في كل الأماكن، أو ده اللي إحنا شوفناه. فضلنا القعدة الخارجية علشان الجو حلو اليومين دول. وبدأنا نتصفح المنيو العملاق وإحنا بـ نلف بعينينا على الديكورات والإضاءات الـ Steel بألوانها الخشبية المميزة، وعجبنا درجات السلالم اللي بـ تفصل بين كل منطقة جلوس والثانية، ولاحظنا أن الإقبال جامد على الشيشة والحلويات والعصائر، يعني كثير من رواد المكان بـ يتعاملوا معاه على أنه كافيه أكثر.
هـ تلاقي شوربات لسان عصفور وكوارع وكريمة دجاج وملوخية وشوربة بالموزة البتلو بأسعار من 18 لـ 40 جنيه، والمقبلات فيها كبدة فراخ وكشك وممبار وورق عنب وسجق بلدي وسبرنج رولز بأسعار من 19 لـ 25 جنيه، والركن الشرقي فيه حمام محشي (39 جنيه للواحدة) وشركسية بالفراخ (58 جنيه) وبط بالخلطة (69 جنيه) وملوخية بالجمبري (45 جنيه) وملوخية بالأرانب (59 جنيه) وكسكسي باللحم الضاني (74 جنيه) وغيره من الأكلات الشرقية أو المصرية جدًا اللي مش هـ تلاقيها في أماكن كثير. وفيه ركن المشويات الطلبات فيه بالأطباق مش بالكيلو، زي طبق الميكس جريل (67 جنيه) وطبق الشواية الميكس اللي بـ يكفي 3 أفراد (199 جنيه) والسمان المشوي (54 جنيه). وأطباق السلاطات غالية بالنسبة لحجم الطبق، يعني الطحينة والسلاطة البلدي والبابا غنوج بـ 15 جنيه!
طبعًا الاختيار كان صعب، بس حبينا نجرب ورقة اللحمة بالبطاطس (60 جنيه) من الركن الشرقي وكان اختيار موفق جدًا؛ لأنها اتقدمت مستوية كويس قوي، اللحم يكاد يكون مهري وممتزج بخلطة الطماطم والفلفل وقطع البطاطس تمامًا، وبـ يُقدم معاها أرز بشعرية. وجربنا طبق مشويات فيه كفتة وكباب وشيش طاووق (3 قطع من كل نوع) ومعاه أرز بالخلطة وبطاطس محمرة. طعم المشويات هنا خطير والتتبيلة جديدة وفهمنا أن فيه صوص وخلطة خاصة بالمكان اسمها “لو كير صوص” بـ تضاف لمعظم الأكلات علشان تضيف اللمسة المميزة لأطباق المكان. الكميات مشبعة جدًا في الأطباق الرئيسية، لكن قليلة في المقبلات زي طبق السجق البلدي (25 جنيه) اللي طلبناه في البداية علشان نسخن به ورغم طعمه الخرافي والخلطة السرية اللي عليه إلا أننا كنا نتمنى أن الكمية تبقى أكثر شوية.
فيه أطباق رئيسية غربية زي السكالوب والفاهيتا والبط بصوص البرتقال والبيكاتا بأسعار من 50 لـ 70 جنيه، وممكن تطلع حلوة، بس التمكن هنا في الأكلات المصرية اللي بـ ينافسوا فيها بجدارة مطاعم زي «أبو السيد» و«الست حسنية». منيو الحلويات فيه أرز باللبن ومهلبية بالمكسرات بس دول بـ يخلصوا بدري لأن الإقبال عليهم كبير. فحبينا نشوف كده أخبار الشيفات العباقرة إيه في أكلة غربي حتى لو كانت حلويات. لكن كريب النوتيلا (22 جنيه) كان دون المستوى والعجين ما كانش نضج تمامًا، فحسينا أن من الأفضل في المرة الجاية نجيب طبق أم علي أو مهلبية من اللي بـ تخلص بدري للأسف. ولهواة الشيشة؛ الشيشة فواكة هنا بـ 10 جنيه، والفاخرة منها بـ 22 جنيه.
كم كبير من الكوكتيلات والعصائر والمشروبات الساخنة، وفيه وجبات إفطار لحد الساعة 1 ظهرًا، معظم أسماء الوجبات والكوكتيلات واخدة Theme القاهرة القديمة زي “السلطان” و”الباشا” و”العمدة” والأسعار غالية شوية بس مقبولة بالنسبة لجودة الطعم ومستوى الخدمة والقعدة الحلوة والمزيكا اللطيفة اللي بـ يشغلوها في المكان.
زيارتنا لفرع «لو كير 1940» المرة دي غيرت فكرتنا عن شكله التقليدي في الزمالك، وعرفنا مكان ممتاز نلجأ له لما تطلب معانا أكل مصري خالص، أو لما نحب نعزم أصدقائنا الأجانب على أكلة فولكلورية ومكان رومانتيكي.

نصيحة 360

خليك في المنيو الشرقي؛ وفي الأكل الرئيسي والتحلية.

أحسن حاجة

الأكل حلو قوي؛ الشيفات هنا هم عصب المكان، ومش بـ يتغيروا مهما حصل.

أسوأ حاجة

مافيش تيك آواي أو خدمة توصيل إلا لمناطق قريبة للفرع، ومافيش توصيل مشروبات أو حلويات خالص.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح