The Definitive Guide to Living in the Capital , Cairo , Egypt

لما تحب تخرج وأنت في إسكندرية أكيد أول حاجة هـ تفكر فيها مكان يكون بـ يطل على البحر… ولما قعدنا نفكر شوية إيه المكان اللي ممكن نروحه، قررنا نروح مطعم وكافيه “ليبانيرو – Lebanero”… أولاً لأن موقعه فعلاً على البحر، ثاني حاجة لأنه مطعم لبناني فهـ يكون مختلف شوية عن باقي المطاعم والكافيهات المصرية.

بـ يتميز “ليبانيرو” -اللي بدأ نشاطه في نوفمبر 2010- بتصميم المطعم من جوه اللي واخد شكل مثلث.. وفيه ضلع كامل من المثلث ده بـ يطل على البحر… كمان هـ تلاقي أن اللي غالب على ستايل المكان هو الخشب اللي موجود في الأسقف والكراسي… بالإضافة أن فيه أعمدة كثير جوه متعلق عليها فوانيس للديكور، وزرع موزع في كذا ركن من أركان المطعم.

طبعًا إحنا أول ما دخلنا المطعم كان نفسنا جدًا نقعد على الترابيزات اللي بـ تشوف البحر، لكن للأسف كان صعب لأن المكان كان زحمة جدًا، فأخذنا الجرسون لترابيزة جوه شوية لأنها يمكن الوحيدة اللي كانت فاضية ساعتها… بس أكثر مشكلة فيها أنها كانت قريبة من المطبخ والجرس اللي بـ يرن للطلبات اللي خلصت كان جانبنا وكان صوته بصراحة مزعج أوي.

جاب لنا الجرسون المنيو واختارنا الأكل.. نزلنا الأول الأطباق الجانبية اللي اختارناها واللي كانت طبق ورق عنب بزيت الزيتون معاه كرنب أحمر وشرائح طماطم وليمون (16.50 جنيه) وطبق بوريك بالجبنة (17.75 جنيه) وهو عبارة عن 3 قطع فطاير ملفوفة محشية جبنة وعليها سمسم، لكن المفروض أننا لما اختارناها في المنيو يكون جواها برضه حبة البركة وريحان ونعناع لكن للأسف لما أكلناها ما لقيناش غير جبنة بس في الحشو… بعد كده نزلت الأطباق الرئيسية، والميزة أنها ما تأخرتش قوي يعني ثلث ساعة تقريبًا وكان الأكل كله نزل.

اختياراتنا كانت طبق فتة سورية بقطع الفراخ المحمرة والزبادي والعيش المحمر والأرز الأبيض وعليها صلصة طماطم ومكسرات (51 جنيه)، وطبق صدور فراخ مشوية بصوص النعناع معاه مشروم وصوص كريمة وبطاطس محمرة وخضار سوتيه (54.50 جنيه)، وطبق شيش طاووق عبارة عن صدور فراخ مقطعة ومشوية ومعاها خضار سوتيه وبطاطس بيوريه (52.25 جنيه)، وبيتزا تركي على شكل بيضاوي عليها بسطرمة كثيرة وبصل وفلفل أخضر وأصفر ومشروم وطماطم (47.25 جنيه)… الأكل طعمه حلو وإحنا شايفين أن أسعاره بالنسبة لأسعار مطاعم لبنانية وسورية كثير في مصر معقولة.

بعدها طلبنا المنيو مرة ثانية علشان بصراحة كان نفسنا قوي نجرب الحلويات بتاعتهم اللي شكلها مغري جدًا… فطلبنا طبق اسمه “بومبا دو” وهو عبارة عن قطعة سخنة شبه الكيكة الأسفنجية شوية ومعاها بولة آيس كريم فانيليا وبودر قرفة وصوص كراميل (28.50 جنيه)، وأوريو مادنيس (32.50 جنيه) عبارة عن آيس كريم فانيليا محشية بسكويت أوريو وعليه صوص كراميل، وطبق لقمة القاضي  (21.75 جنيه) سخنة عليها صوص شوكولاتة واختارنا يكون نصفها بيضاء ونصفها بني (مش بالعسل زي المعتاد)، أطباق الحلويات فعلاً حلوة ولذيذة جدًا واختراع لقمة القاضي ده حكاية، وفي الآخر شربنا كابتشينو (19 جنيه) وبرضه كان طعمه حلو.

التجربة بتاعتنا كانت لطيفة وأكيد هـ نيجي ثاني علشان المرة اللى جاية نستمتع بمنظر البحر فى عروس البحر المتوسط… الإسكندرية.