The Definitive Guide to Living in the Capital , Cairo , Egypt

ماجيك

ماجيك: ساندويتشات وآيس كريم في مصر الجديدة

  • 2 شارع إبراهيم اللقاني
  • مأكولات سريعة
  • 01227295633
تم التقييم بواسطة
Waleed Abuarab
قيم
قيم الآن
ماجيك: ساندويتشات وآيس كريم في مصر الجديدة
كتبنا قبل كده في كايرو 360 عن محل «ماجيك» العريق الموجود في شارع إبراهيم اللقاني في مصر الجديدة، وبالتحديد أمام كافيتريا “ألامفتريون” في تقاطع شارعي إبراهيم اللقاني والأهرام. وسبب الزيارة الثانية أننا لاحظنا بعض التجديدات اللي طرأت على المحل وتغيير في شكل الواجهة الخارجية بعد ما كنا كتبنا ملاحظتنا في “أسوأ حاجة” أن المحل مهمل ومحتاج عناية واهتمام من القائمين عليه أكثر من كده.

وكانت زيارتنا الثانية بهدف اكتشاف نوع التغيير اللي حصل في المكان، وإذا ما كانت في الشكل بس ولا في الشكل والمضمون “اللي هو الأكل”. الحقيقة الزيارة اللي فاتت ما كانش لنا أي تعليق على الأكل وجودته وما كناش منتظرين أي تغيير يحصل للمنيو أو المطبخ لأن تميز «ماجيك» جاء من ساندويتشاته الكلاسيكية المصرية الأصيلة. ولما وقفنا أمام المحل وبدأنا نستعرض المنيو المطبوع بتاعهم لاقيناه زي ما هو من سنتين فاتوا، ويمكن من 30 سنة فاتوا، المحل رغم قدمه إلا أنه محتفظ بشخصية فريدة ومكانه المتميز في مصر الجديدة بـ يخليه من علامات المنطقة العريقة. حتى عمال المحل كلهم رجال كبار فوق الـ 50 سنة إلا فيما ندر، لكن بـ يشتغلوا بهمة وإخلاص غير عادي، والنتيجة في الآخر أنك هـ تلاقي ساندويتش جميل بين إيديك وبأسعار مش موجودة دلوقت.
كفتة مشوية وكبدة وسجق وكفتة مفرومة وشاورما وشيش طاووق وبانيه وبرجر وحواوشي ومكرونة فرن، وقسم خاص للفول والفلافل والبطاطس والمسقعة والبيض بالبسطرمة. فيه ترابيزتين بس للجلوس داخل المكان لو حبيت بس أغلب الناس بـ تفضل تأخذ أكلها تيك آواي أو تقف بالعربية تأكل أمام المحل مع المخللات المجانية والخدمة المهذبة للعاملين في المحل.

كل ساندويتشات اللحوم في عيش فينو وفرنساوي، أخذنا كبدة وسجق (2.5 جنيه) على سبيل التسخين، وكان حلو بس أنت محتاج 10 ساندويتشات من الحجم ده علشان تشبع، لكن إحنا طلبنا واحد كفتة ضاني مشوية على الفحم (10 جنيه) كان لذيذ بس العيش الشامي كان هـ يبقى أحلى، وما كانش عليه سلاطة طماطم. وجربنا الحواوشي المخصوص (5 جنيه) وكان حلو بس دسم جدًا واللحم كثير داخله لدرجة تجزع النفس، المفروض تبقى أقل من كده. الشاورما هنا وهمية على غير ما يوحي به شكل سيخ الشاورمة أمام المحل، ساندويتش كبير (11 جنيه) كان طعم اللحم فيه مزازة و -بـ نكررها ثاني- أصالة تليق بالمكان، والسعر برضه مثير للاستغراب بالنسبة للحجم.

بعد ما عرفنا أسعار اللحوم نقدر نخمن أسعار ساندويتشات الفول والفلافل، ورغم الأسعار القليلة دي إلا أننا لاحظنا نظافة الأواني المستخدمة وطريقة تحضير الأكل واستخدام القفازات البلاستيكية للعاملين، مكان مثير للدهشة بصراحة.
محل داخل محل، ده الوصف الأمثل لركن الآيس كريم اللي في عمق محل «ماجيك» وهـ تلاقي عنده أحلى آيس كريم بيتي شبه “الداندورما” بتاعة زمان، البولة هنا بـ 2 جنيه وطعمها يجنن، والأحلى هو طبق الفروت سالاد بالآيس كريم (6 جنيه) والفاكهة اللي فيه كانت فريش ومنعشة وطبقة الآيس كريم غنية بالقشطة والزبيب، طعم رائع بـ يفكرنا بمحلات معينة في الإسكندرية، تقريبًا ما جربناش المذاق ده غير في Alex وهنا عند «ماجيك».
رغم التجديدات اللي اتعملت في المحل إلا أنه لسه ناقصه كثير علشان يواكب الزمن اللي إحنا فيه ويوصل للمكانة اللي يستحقها والناس تقبل عليه أكثر. وفيه نماذج كثير لمحلات ثانية عريقة قدرت تطور نفسها بالشكل اللازم بمرور ومحافظة على مكانتها من عشرات السنين. يا ترى هـ نحتاج زيارة ثالثة؟

نصيحة 360

ممكن تشتري مشويات بالكيلو، وآيس كريم بالكيلو كمان.

أحسن حاجة

شاورما أو كفتة وبعدهم آيس كريم أو عصير فريش، هـ تحس بعبق مصر الجديدة.

أسوأ حاجة

لسه محتاج "حملة ترويج" تعمله نقلة نوعية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح