The Definitive Guide to Living in the Capital , Cairo , Egypt

زي ما فيه زحف عمراني على المساحات الشاسعة في القاهرة الجديدة، فيه زحف غذائي غير عادي وانتشار ملحوظ للمولات وساحات الطعام في الشوارع الجانبية في المنطقة، وما بقاش شارع التسعين بس هو محور التجمع الخامس، اللي بـ يضم أفضل المطاعم والمحلات، لكن شوارع موازية له ومتقاطعة معاه بقيت أكثر حيوية، وبـ نلاقي فيها كل يوم مكان جديد فتح، بالإضافة للفروع الجديدة اللي بـ تفتح من المطاعم الكبيرة المشهورة زي سبكترا والمنوفي الكبابجي وأسماك البرج وغيرها.

فوود كورت صغير داخل محطة بنزين أويل ليبيا في شارع التسعين الشمالي الموازي للتسعين الرئيسي، خلف مجمع البنوك، وفيه مطعمين وكافيه وسوبر ماركت، وكانت زيارتنا لمطعم «مانهاتن برجر – Manhattan Burger» وهو داينر أمريكي متخصص في البرجر زي ما هو واضح، وفيه بعض ساندويتشات الهوت دوج والسلاطات والبطاطس المقلية، لكن التخصص كله في البرجر، وكله في الكايزر من الحجم الكبير ما عدا رابس البرجر اللي في عيش التورتيا والكريسبي برجر اللي في لفات الكازوني المقلية ودول تقريبًا الحاجتين الوحيدتين غير التقليديتين في المنيو.

المكان صغير من الداخل، فيه ترابيزة واحدة للجلوس، وباقي الترابيزات في الساحة الصغيرة المفتوحة أمام المحل في الهواء الطلق، الهواء اللي ما كانش مناسب تمامًا لزيارة ليلية في الشتاء في التجمع الخامس، واضطرينا نقعد بره لأن المكان مشغول بالداخل، وكنا فاكرين أننا لازم نروح نعمل الأوردر بنفسنا لأن المكان تقسيمته شبه مطاعم أمريكانا، والكاونتر الطويل عليه أكثر من كاشير للتيك آواي، لكن طلع فيه سيرفس عادية والويتر بـ ييجي لحد عندك. القعدة بسيطة ومقصود بها أنك تأكل بسرعة وتقوم، أنت في النهاية داخل محطة وقود، بس لحسن الحظ الخدمة كانت كويسة والأكل كان أكثر من رائع.

جربنا برجر الـ Cold Cuts مع البيف والتركي المدخن وجبن الأيمنتال (42.5  جنيه) بـ ينزل معاه طبق مخلل صغير، ولو عاوز تخليه كومبو بـ تزود 15 جنيه على ثمنه، كثير قوي 15 جنيه على زجاجة كولا صغيرة وشوية بطاطس! المهم البرجر كان حلو وحجم قطعة البيف كان 250 جم تقريبًا، يعني هـ تشبع من الكومبو أكيد، وإضافات التركي والجبن كانت كثيرة وعاملة تأثير واضح في الطعم. الـ Apple Burger أو البرجر بشرائح التفاح الأخضر المكرمل والبلو تشيز (39.5 جنيه) كان اختراع لطيف، التفاح فريش ومسكر بطريقة محترفة، والبلو تشيز مضبوطة مش كثير ولا قليلة، ده ساندويتش لهواة التجريب والطعم المبتكر. البطاطس المحمرة بـ تتقدم كرينكلز أو ويدجز أو عادية، وفيه طبق مقبلات فيه ناجتس وموتزاريلا ستيكس وحلقات بصل مع الباربكيو صوص والمايونيز اسمه مانهاتن ميكس (45 جنيه) جربناه علشان نعرف مستوى المقبلات كلها، ورغم أنه برضه غالي شوية، لكن المقليات اللي فيه كلها كانت لذيذة وقرمشتها مضبوطة، والأجمل من المقليات كان طبقة الجرجير اللي مغلفاها، خلصنا الجرجير الفريش قبل الناجتس تقريبًا.

المنيو فيه زبادي مجمد بـ 20 جنيه أو بـ 25 جنيه بثلاث إضافات عليه، كنا عاوزين نجربه لكن للأسف الماكينة كانت عطلانة ووعدونا زيارتنا الجاية تشتغل. تجربة كويسة في «مانهاتن برجر» فكرتنا بوجباتنا في فدركرز ولو سيلز وغيرها من الأمريكان داينرز المشهورة، ومنتظرين منه بعض الإضافات في المنيو، وبعض الترابيزات في الداخل أو بعض الدفايات في الخارج، ويا سلام لو فيه تليفزيون أو مزيكا حلوة في الخلفية، وهـ نبقى طماعين لو قولنا عاوزين حمام أو حوض بدل الوايبس.