The Definitive Guide to Living in the Capital , Cairo , Egypt

مطاعم
مانولي-MANOLY

مانولي: أول بيتزا باستا في مصر في مطعم هيرجعك للتسعينيات

MANOLY pizza & pasta station باستا بطاطس تويست بيتزا بيتزا باستا جبنة موتزاريلا ستكس مانولي ناتشوز
تم التقييم بواسطة
Omar Abd-elmaqsoud
قيم
قيم الآن
مانولي: أول بيتزا باستا في مصر في مطعم هيرجعك للتسعينيات

في تجربتنا النهارده مطعم إيطالي مش بس جديد ومبتكر في أطباقه اللي بيقدمها، ولا كمان في جوه التسعيناتي، لأ كمان جديد في عمره، لإنه لسه فاتح من أيام قليلة، وبالتالي هيبقى صعب نحكم عليه بشكل كامل، لكن خلينا مع بعض نشجع التجربة الحلوة في مطعم “مانولي” –باستا وبيتزا استيشن- ونقولكم على اللي دوقناه وشوفناه.

في الأول كده الجو العام للمكان جميل وهادي، وطول الوقت بتسمع أغاني وموسيقى من إنتاج التسعينيات بس، وبالتالي هتحس إن ودنك متعودة ومرتاحة للي بتسمعه، ولو قررت تزوره في أيام الويك إند، هتشوف عروض مسرحية مختلفة، ممكن تكون حفلات غنائية، أو ستاند أب كوميدي، وممكن لو عندك موهبة تطلع توريها للناس على المسرح اللي في المكان.

كل ترابيزه في المكان كان عليها أفيش أو تلاتة – على حسب حجمها- من أفيشات أفلام التسعينيات، زي عبود على الحدود، أو همام في أمستردام، أو صعيدي في الجامعة الأمريكية، وكان رأينا إن الأفيشات لو كانت متعلقة على الحيطة كتابلوهات كان هيبقى أفضل.

أول ما هتدخل المكان هتلاقي قدامك مكتبة صغيرة عليها تلفزيون قديم وشوية ألعاب قديمة زي السلم والتعبان، وبنك الحظ وفيديو جيم للجيب، ولو دخلت لجوه المطعم في ركن قريب هتلاقي عليه مكتبة مليانة شرايط فيديو وشرايط كاست قديمة، ودي كانت أحلى حاجه في ديكور المكان.

نيجي للأكل، وببصة صغيرة على المنيو هتلاقي افتكاسات جديدة بيقدمها المطعم في الأكل الإيطالي التقليدي اللي كلنا نعرفه، اللي هوه الباستا والبيتزا، فقررنا نجرب أول طبق جديد ومبتكر و بيتقدم بس في “مانولي” وهو “الباستا بيتزا” والطبق ده عبارة عن نوع باستا من اختيارك (بنا – حلزوني- سباجيتي – فيتوتشيني) مع صوص برده من اختيارك (أبيض – أحمر- روز) والجديد فيه إنه بيتقدم على شكل بيتزا وعليه مكونات البيتزا، يعني بتاكل بيتزا مكرونة.

طلبنا “باستا بيتزا سي فود رانش” بـ(72 جنيه) والحقيقة كان طعمها عادي، مش فظيع، لكن طريقة تقديمها والشكل النهائي للطبق كان مميز جدًا.

الطبق التاني كان “بيتزا مانولي” واللي عبارة عن بيتزا فيها 4 أنواع من البيتزا (بيبروني – فراخ – هوت دوج – تشييز لوفرز) وكانت بـ(43 جنيه) للحجم الصغير، وبشكل عام كانت ظريفة، لكن العجينة كانت محتاجه تستوي شوية.

في المقبلات جربنا الـ”تريو مانولي” واللي عبارة عن (صوابع موتزاريلا – ناتشوز – بيتزا شرايح – بطاطس) وكانت بـ (75 جنيه) وده كان بالنسبالنا سعرمبالغ فيه شوية على حجم وكمية الطبق، لكن بشكل عام الـ”ناتشوز” كان مميز جدًا وطعمه رائع، صوابع الموتزاريلا كمان كانت جميلة بس كانت محتاجه تبقى سايحه أكتر.

كمان جربنا “بطاطس تويست” ودي عبارة عن بطاطس محمرة تويست على عود خشب، المشكلة فيها إن التوابل كانت قليلة جدًا، وحجمها صغير جدًا عن شكلها اللي موجود في المنيو، ده غير سعرها (23 جنيه) اللي يعتبر مبالغ فيه بالنسبة للكمية.

المشروبات في مانولي غير المشروبات الغازية، فيه عصاير طبيعية فرش لكن المفاجأة بالنسبالنا كانت في حاجتين، الحاجة الأولانية هي إن “مانولي” بيقدم عصاير مصرية تقليدية زي “التمر الهندي” و”الكركدية” وده كان حاجه جميلة، المفاجأة التانية هي شكل الكوباية المميز اللي بيتقدم فيه العصاير، واللي بتيجي على شكل “لمبة” مقلوبة، وكان شكلها مميز وجميل.

وفي الحلو، جربنا “موز مقلي بالأيس كريم” بـ(35 جنيه) اللي كان أقل من العادي، لإن الموزة اتقدمت بحالها من غير ماتتقطع لحلقات علشان تسهل أكلها، ده غير إن مفيش فيها أي طعم مميز أو مختلف، وسعره كان مبالغ فيه بالنسبة لحجم الطبق.

طبق الحلو التاني كان عبارة عن “بطاطا بالباشميل بالآيس كريم” بـ (27 جنيه) وده يمكن كان طبق جميل، لكنه برده صغير في الحجم، ده غير إن في كمان حاجه لفتت نظرنا وهي إن مفيش ولا صورة في المنيو للحلويات اللي بيقدمها المكان. 

بشكل عام، المكان جديد والتجربة فيه لسه مش كاملة لكنها كانت بالمقارنة بمكان جديد لسه فاتح فهي تجربة حلوة وجديدة، وأكيد هتتطور مع الوقت، ومهم جدًا تزوروه علشان تقولوا رأيكم في اللي كلتوه للاستاف الموجود واللي بيرحب بأي رأي ممكن يساهم في تطوير المكان.

نصيحة 360

خد معاك فلوس كاش، لإن المكان مش بيقدم خدمة الدفع بالفيزا.

أحسن حاجة

الجو العام للمكان والديكور تسعيناتي جميل.. العصاير المصرية التقليدية كانت جميلة، والمشروبات بشكل عام فرش وبتتقدم في كوباية كبيرة شبه اللمبة.

أسوأ حاجة

مفيش ولا صورة في المنيو للحلويات اللي بيقدمها المكان.. والأسعار غالية شوية مقارنة بمكان لسه فاتح جديد، وجودة وكميات الأكل فيه مش كبيرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح