The Definitive Guide to Living in the Capital , Cairo , Egypt

مطاعم
نقنقة

مطعم نقنقة المعادي.. أكل معقول وخدمة سيئة وديكور متميز

المعادي ثكنات المعادي خلطبيتة ديكور خشب شارع 9 كافيه مطعم نقنقة نقنقة نقنقة المعادي
  • 32 شارع 9 بجوار محطة مترو ثكنات المعادي
  • 11:00 - 04:00
تم التقييم بواسطة
Mohamed Talaat
قيم
قيم الآن
مطعم نقنقة المعادي.. أكل معقول وخدمة سيئة وديكور متميز

رغم إن شارع 9 في المعادي فقد رونقه السابق، وبقى زحمة جدًا وعشوائي، لكن لسه فيه محلات ومطاعم بتفتح فيه، وآخرهم مطعم جديد اسمه “نقنقة”، وهو جنب مترو ثكنات المعادي على اليمين، الناصية التانية من قهوة “قمر الزمان”، وإحنا في كايرو 360 قررنا نجرب الأكل عندهم ونقول لكم رأينا.

أولًا الديكور جميل جدًا، وبيعتمد على الأصالة القديمة، سواء عن طريق الترابيزات أو الكراسي بتاعة زمان، اللي مصنوعين من الخشب، وكمان عاملين مكتبة فيها كتب متنوعة محطوطة وسط مجموعة من الحطب كديكور، ومافيش قعدة داخلية للأسف، لأن حجم المطعم صغير جدًا، ومافيش غير الشارع.

في البداية نقنقة العاملين فيها واضح انهم أول مرة يشتغلوا في المجال، وما عندهمش الخبرة الكافية علشان يتعاملوا مع الزحمة، ولكن البنات اللي موجودة في المكان بتحاول تساعد على قد ماتقدر، ونتمنى إنهم يبقوا أفضل المرة الجاية.

 طلبنا 4 طلبات مختلفة، منهم واحد حلو، وللأسف اتنين نزلوا مع الحلو، فقلنا للويتر شيل الحلو علشان هيسيح وخليه في التلاجة، وماينفعش الحلو ينزل مع الأكل، وبالفعل أخده معاه، والطبق التالت اللي هو المكرونة وصل بعد ما الطبقين خلصوا أصلًا، ولما طلبنا المدير جالنا نفس الويتر على إنه المدير، وإحنا بنأكد أن لو هو ده المدير فعلًا يبقى المكان هيقفل بمشاكل كتير مع العملاء.

المدير بتاع المكان، اللي هو نفسه الويتر، ماكنش عاجبه إننا بنسأل على الأوردر أو إننا طلبنا الحلو يتحط في التلاجة، وإننا بنستفسر على الأكل ومكوناته، وفعلًا ماعرفناش ناخد منه أي معلومة وكان غير جدير بمكانه حتى كفرد عادي من فريق عمل المطعم.

 في البداية جربنا طاسة “شهيصة” وكانت بـ38 جنيه، ودي عبارة عن غموز سجق وبسطرمة وفلفل ألوان، متغرق في الجبنة مع بعض البهارات الجميلة، وحبات طماطم “صفراء”، ورغم إنها نزلت باردة إلا أنها كانت حلوة جدًا، وعجبتنا، خاصة أن الجبنة المطبوخة عاملة طعم عجيب، وبنشكرهم على معلومة الجبنة البديلة للموتزاريلا.

طاسة “كرانشي”، اللي سعرها كان 32 جنيه، كانت عبارة عن فراخ كريسبي محطوطة في الجبنة ومعاها فلفل ألوان ومشروم، وماكنتش مميزة ولكن مش وحشة، لأن الفراخ ماكنتش بانيه بلدي، ولكنها عجينة “كوكي”، ولكن الجبنة المطبوخة مع البهارات كانت مظبطة الطعم اللي خلانا استمتعنا بالأكلة رغم كل شيء.

وجربنا من عندهم كمان مكرونة “خلطبيتة”، اللي كان سعرها 40 جنيه، ودي عبارة عن مكرونة بالجبنة المطبوخة وفيها سجق وبسطرمة، وكان طعم المكرونة حلو والجبنة المطبوخة إديتها ميزة وطعم مختلف، ولكن للأسف السجق ماكنش مستوي كويس، ورغم إننا ماكملناش الأكل ولكن محدش سألنا مأكلتوش ليه، وكأن شئ لم يكن.

أما الحلو فإحنا طلبنا “جولي” وسعره 39 جنيه، وكان عبارة عن “موز محمر بالزبدة – مولتن كيك” – آيس كريم – مكسرات”، وده كان حكاية، أولًا هو نزل مع الأكل الأول، وطلبنا يتحط في التلاجة لحد ما نخلص أكل ووضحنا لـ”المدير” إنه مافيش حلو بينزل مع الأكل أكيد، ولما طلبناه تاني للأسف نزل والآيس كريم سايح، والموز “مسود” ولكن الطعم كان كويس بس مش مميز.

نصيحة 360

إوعى تروح المكان وهو زحمة، الأخطاء بتكون كتيرة قوي

أحسن حاجة

الديكور وروح المكان  

أسوأ حاجة

الخدمة والحلو "جولي"  

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح