The Definitive Guide to Living in the Capital , Cairo , Egypt

مطاعم
Bell’s

مطعم Bell’s.. كيدز إيريا وقعدة رومانسية ولحمة بالجمبري والبرتقال.. وأكتر

Bell's أكل المعادي عنوان bell's كيدز ايريا مطعم منيو مطعم Bell's
  • ميدان مصطفى كامل - سرايات المعادي
  • 09:00 - 23:59
تم التقييم بواسطة
Mohamed Talaat
قيم الآن
مطعم Bell’s.. كيدز إيريا وقعدة رومانسية ولحمة بالجمبري والبرتقال.. وأكتر

النهاردة جايين ومعانا مفاجأة حلوة، مطعم مميز قررنا في كايرو 360 إننا نجربه ونكتب عنه وده علشان هو متكامل في خدماته، عندهم أوبن إيريا وسط خضرة جميلة، فيها مكان صغير برايفت وعالي، يعني ينفع رومانسي، وإيريا فيها تليفزيون تقدروا تتفرجوا فيه على حاجات كتير وأهمها الماتشات، ومكان مغلق لو أنتم حابين وده لطيف جدًا، وأهم حاجة، وهي اللي خلتنا نقول عليه متكامل إن فيه “كيدز إيريا” علشان تخرجوا من غير ما تشيلوا هم شقاوة أطفالكم اللي هيبقوا قصاد عينيكم وواخدين حريتهم وأنتم كمان تقدروا تقعدوا براحتكم.

خلال السطور الجاية هنقول لكم على تجربتنا في مطعم Bell’s المعادي.

المكان واسع وكبير والمساحة الخارجية اللي اخترنا نقعد فيها بجوار الكيدز إيريا بتكون هادئة لو مافيش أطفال كتير بتلعب، وكمان عندهم الناحية التانية قعدة بمستوى أعلى شوية عن منطقة الكيدز إيريا اللي فيها 6 ألعاب مختلفة، والمساحة الداخلية كلاسيكية ولطيفة ومريحة، وألوانها بيضاء هتخليكم تحسوا بالراحة، وكأنكم دخلتوا مسلسل هوانم جاردن سيتي، أما فريق العمل فحسينا إنه لطيف رغم إحساسنا إنهم مش بروفيشنال بالشكل الكافي، لأنه رغم إن المكان ماكنش زحمة لما رحنا ولكن كنا بنجد صعوبة أن نلاقى حد ياخد مننا الطلب أو يشيل الأطباق بعد ما نكون خلصنا ولازم ندور عليهم ونشاور لهم.

بدأنا طلبنا بـBell’s Platter وسعره 220 جنيه، وهو عبارة عن رولز فراخ وموتزاريلا وهوت دوج ومعاهم 4 صوصات مختلفة “تارتار عسل – خردل – مستردة – وكوكتيل”، وفوقيهم قطع ناشوز صغيرة، وهو طعمه حلو والقرمشة فيه مظبوطة، والتتبيلة واخدة حقها والتسوية ممتازة.

وكمان طلبنا ناتشو بالفراخ والجبنة، وكان سعره 135 جنيه، وكان تحفة وعجبنا جدًا، وطعمه كان مميز، وكل حاجة فيه مظبوطة، ومكس الجبن كان لطيف، وهو كمان كان فيه ذرة حلوة وفاصوليا حمراء، ولكن كميته قليلة بالنسبة لسعره، وبالنسبة للمشكلة دي عمومًا هنتكلم فيها في جزء لوحدة.

أما الطبق الرئيسي فكان لحمة بالجمبري بالبرتقال، وسعره كان 295 جنيه، وهو اختراع عظيم وحلو جدًا، الصوص اللي فيه كان مميز جدًا، وطلبنا معاه أرز وحبينا الأرز جدًا وبقينا ناكل الأرز مع الصوص وكان عامل عظمة، أما الجمبري فهو كان مستوى مظبوط لا زيادة ولا ناقص، ولكن اللحمة للأسف ماكنتش أحسن حاجة ولكنها تتاكل مافيش مشكلة، محتاجين يغيروا الجودة بتاعتها وكمان التسوية تكون أفضل لأنها كانت ناشفة شوية في التقطيع.

وكمان طلبنا فراخ حارة بالبارميزان، وكان سعرها 260 جنيه، ومعاها مكرونة صوص أبيض، وللأسف ماكنتش أحسن حاجة ورغم أن كلنا جربناها ولكن مافيش حد عجبته وكان فيها أفتر تيست لازع جدًا وواضح، وكمان الفراخ مش أفضل حاجة والبارميزان جودتها متستاهلش تكون موجودة في مكان لطيف زي ده، وحتى الصوص ماكنش له إضافة للطبق وكان اختيار مش لطيف، نتمنى يكون أفضل الفترة الجاية.

وطلبنا لاتيه بسعر 60 جنيه، وهو كان عادي ولكن المج اللي متقدم فيه كان لطيف، وعلشان طبق الفراخ الحارة بالبارميزان مكنش أحسن حاجة فالإدارة اهدتنا 2 تشيز كيك هدية، وده شيء لطيف منهم، لكن كنا نتمنى ما يحسبوش سعر الطبق خصوصًا إننا مقربناش منه أصلًا.

الأسعار بالنسبة للمكان لطيفة، ولكن بالنسبة للكميات بتاعة الأطباق كلها ما عدا الـBell’s Platter فهي قليلة جدًا، ومحتاجين يعيدوا نظر في حساب التكاليف بتاعة الوجبات سواء بتقليل السعر أو بزيادة الكميات.

بصفة عامة تجربتنا كانت إيجابية، وهنكررها تاني أكيد.. لكن نتمنى الأمور تكون أفضل كتير.

تقدروا تعرفوا أكتر عن Bell’s من خلال صفحة الفيسبوك من هنا.

نصيحة 360

المكان لطيف جدًا لخروجة عائلية متكاملة خاصة لو معاكم أطفال.

أحسن حاجة

Orang Beef Shrimp.

أسوأ حاجة

فراخ حارة بالبارميزان.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح