The Definitive Guide to Living in the Capital , Cairo , Egypt

مطاعم
tree lounge

مطعم Tree lounge.. تجربة رومانسية جديدة في المعادي

Tree lounge اكل المعادي تشيكن بارميزان قعدة رومانسية كوردن بلو مطعم
تم التقييم بواسطة
Mohamed Talaat
قيم
قيم الآن
مطعم Tree lounge.. تجربة رومانسية جديدة في المعادي

دايمًا بندور على قعدات مختلفة تناسب الكل، وبيبقى عندنا معايير خاصة علشان نقدر من خلالها نحكم على تجربتنا، ونفيدكم ونوجهكم لأفضل حاجة، وعلشان كده المرة دي اخترنا إننا نروح مكان رومانسي، كتير من الناس اتكلموا عنه، وهو مطعم  Tree lounge في المعادي، وغالبًا كانت أحد أسباب شهرته هي قعدته الجميلة وجوه الرومانسي وحفلاته الدائمة.

في السطور اللي جاية هننقل لكم تجربتنا في كايرو 360 بعد زيارتنا للمطعم.

أولًا انتوا أول ما توصلوا هتلاقوا عربية كابورليه قديمة لونها موف على الباب، ومكتوب عليها اسم المطعم، تقدروا تتصورا معاها للذكرى، وأول ما تدخلوا هناك هتختاروا واحد من 3 أماكن ممكن تقعدوا فيها “إن دور – آوت دور – الروف”، وده غير “Kids area – الكيدز إيريا” المخصصة للأسر، واحنا اخترنا نقعد بره رغم إن الجو كان سقعة، وكانت القعدة حلوة والجو رومانسي حقيقي، ومكدبوش اللي قالوا إنه أهم حاجة في المكان إنه رومانسي.

طلبتنا كانت “تشيكن كوردن بلو” بـ (100 جنيه) وده كان عبارة عن صدور فراخ مقلية، ومحشية بالجبنة التركي المدخنة، وعليها من فوق طبقة جبنة سايحة، لكن احنا محسيناش بطعم الجبنة التركي المدخنة، وكان الطعم كإنه بانيه مقلي وخلاص، وكمان مفيش فيه جبنة “شيدر” تديه طعم مميز، وحتى الصوص مكنش موجود.

نزل مع الطلب خضار سوتيه، كان جميل جدًا، وأرز للأسف مكنش أحسن حاجة، لأنه كان ناشف.

الطلب التاني كان “تشيكن بارميزان” بـ(100 جنيه) وهو عبارة عن صدور فراخ مقلية بالخلطة وعليها جبنة “بارميزان” وكان معمول حلو بس الفينيش بتاعه فلت منهم شوية، الأطراف كانت محروقة، لكن مأثرتش على حكمنا بإنه كان حلو، وكان معاه بطاطس دوبل بالبهارات حبيناها جدًا جدًا.

المكان في مجمله لطيف، وبنرشحه بقوة لأي كابلز حابين يروحوا مكان رومانسي وهادئ، وحتى لو أسرة ومعاهم أطفال مش هيقلقوا، لإن الكيدز إيريا هتخليهم يستمتعوا بوقتهم، وللأسف ملحقناش نجرب المشاريب عندهم بس أكيد هنجربها في مرة تانية.

صفحة الفيسبوك من هنا.

نصيحة 360

المطعم رومانسي وهادئ ومناسب للكابلز

أحسن حاجة

البطاطس المحمرة  

أسوأ حاجة

الكوردن بلو محتاج يتظبط ويتخدم عليه كويس.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح