The Definitive Guide to Living in the Capital , Cairo , Egypt

مطاعم
مكرونة رضا

مكرونة رضا: الصيت ولا الغنى في وسط البلد

  • 56 شارع منصور
  • مأكولات سريعة
تم التقييم بواسطة
Mohamed Hazem
قيم
قيم الآن
مكرونة رضا: الصيت ولا الغنى في وسط البلد

زي ما اتكلمنا قبل كده عن "مكرونة الإنسجام" وقد إيه هو قدر يبدع في المكرونة بالصلصة بدون أي إضافات، سمعنا عن مكان تاني بيعمل مكرونة وكشري بطرُق مختلفة وإضافات كتيرة اسمه "مكرونة رضا" في وسط البلد، وبما أننا بنعشق المكرونة بمُختلف طرُق تقديمها فكان لازم ندي له زيارة.

المكان بيقدم مكرونة عادية بالصلصة ومكرونة فرن (بالبشاميل) وكشري سادة أو بأي نوع من أنواع الإضافات الموجودة، وكمان بيقدم سندوتشات بس شهرته الأكبر اكتسبها من المكرونة والكشري.

المكان فيه جزء معروض فيه الأكل، المكرونات والإضافات من لحوم وكبدة وغيره، والجزء التاني قعدة واسعة، طلباتنا كانت كالآتي، مكرونة بالصلصة والسجق، كشري بالكبدة البانيه ومكرونة فرن بالكبدة البانية، بعد ما طلبنا على طول نزل لنا ويسكي (مياه سلاطة حراقة) بس المرة دي كانت حراقة جدًا.

أول حاجة نزلت كانت المكرونة بالسجق، كان طبق مخيب جدًا للآمال كبداية، الصلصة ما لهاش أي طعم مميز، يمكن الحاجة البسيطة اللي مدية لها طعم شوية أنها متقطع فيها قطع فلفل أخضر صغير جدًا غير كده هي عادية، أما عن السجق فكان غير مُستساغ، اللحمة مش مضبوطة ومش مريحة في الأكل تمامًا.

تاني طبق كان الكشري بالكبدة البانيه، الكشري بيتي جدًا، يفتقر لنكهة كشري الشارع اللي من وجهة نظرنا تتفوق على طعم الكشري في البيت بمراحل والسر في الصنعة، طبعًا اتكلمنا عن الصلصة هي واحدة في كل اللي أكلناه، تاني حاجة المفروض ان يبقى فيه توازن في المكونات لكن العجيب والغريب جدًا أن أكتر حاجة كانت طاغية هي الشعرية لدرجة تحسسك أنك بتاكل طبق شعرية، الميزة الوحيدة في الطبق كانت الكبدة البانيه، الكبدة متقطعة شرايح رفيعة، مستوية كويس ومش شاربة زيت، ناجحة جدًا بصراحة.

آخر طبق هو المكرونة الفرن بالكبدة البانيه، كان بمثابة النور اللي في آخر النفق، كان طبق كويس، البشاميل كانت حلوة ومضبوطة، نسبتها لنسبة المكرونة متوازنة، وفيها لحمة مفرومة وعليها من فوق صلصة (من غيرها كان الطبق هيبقى أحلى) وعليها شريحتين كبدة بانيه وده كان أحلى طبق فيهم، كل طبق من التلاتة سعره ١٥ جنيه واللي يعتبر مرتفع بالنسبة لنوعية الأكل، والخدمة كانت عادية بالرغم من تأكيد العامل على الطلب اللي طلبناه حوالى ٣ مرات على الرغم من عدم وجود زحام ،ده بالإضافة لطبق مخلل نزِل وإحنا بنخلص آخر طبق من التلاتة، التجرُبة مش سيئة يعني لو معدي من هناك ممكن نجيب مكرونة فرن تاني لكن عمرنا ما هنروح مخصوص.

نصيحة 360

تأكد أنك راكن في مكان صح علشان الونش هناك بيعدي كتير جدًا.

أحسن حاجة

الكبدة البانيه نفسها، يعني لو رُحت هناك تاني هجرب سندوتشات الكبدة البانيه.

أسوأ حاجة

السجق كان بشع، ما يتاكلش.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح