The Definitive Guide to Living in the Capital , Cairo , Egypt

نجحت مركب لو باشا ١٩٠١ وسط المنافسة الشديدة الموجودة بين مطاعم الزمالك أنها تحافظ على نجاحها وتقديمها لمطاعم رائعة مطلة على النيل، ومعانا واحد من مطاعمهم الرائعة المتخصصة في الأكل الهندي وهو مهاراني – Maharani.

مهاراني موجود في الدور الأرضي من المركب، واللي بـ يميزه بجد هو أجواءه اللطيفة وديكورات منطقة الشرق الأقصى بألوانها العنابي والأخضر، وكمان تمثال جانيشا إله الهندوس، ونقدر نقول أن الكلام ده جديد علينا، بس يعتبر مبالغ فيه شوية وإحنا مش متعودين عليه.

أول ما وصلنا مهاراني قدموا لنا المنيوهات، وصحيح إحنا عارفين اختيارنا المعتاد من قسم المقبلات وهو البانير باكور ا Paneer Pakora بـ (54 جنيه) –عبارة عن مكعبات جبنة مغلفة بعدس مطحون بدل البقسماط ومقلية– اختيار الأطباق الرئيسية هو اللي احتاج شوية وقت وتفكير، طلبنا نصف فرخة تاندوري Murgh Tandoori بـ (87 جنيه) مع تشيكن كورما بوت Chicken Korma Pot بـ (103 جنيه) ومعاهم طبق جانبي من الأرز البسمتي الهندي برياني خضار (49.90 جنيه).

بعد ما عملنا الأوردر على طول قدموا لنا مقرمشات مجانية عبارة عن صوص نعناع ومخلل مانجو وليمون ونعناع ومعاهم عيش وصوص مانجو تشاتني، والأخير إحنا طلبناه من الجرسون اللطيف.

صوص المانجو تشاتني بطعمه اللذيذ وشوية الشطشطة المميزة كان على مستوى الحدث، أما الباقيين فمستواهم كان أقل، يعني صوص النعناع كان سبايسي بزيادة والمانجو المخلل كان عديم الطعم، أنقذونا من الشطشطة الرهيبة بعيش النان الطازج (16.90 جنيه) وطبق المقبلات اللي قدروا يعوضونا عن كل اللي فات، البانير باكورا المكون من 6 فطائر مقلية مع فرش من البقدونس كان مقرمش وطعمه هايل.

نروح على الأطباق الرئيسية ونقول أن النصف فرخة التندوري كانت طرية وتتبيلتها تحفة، بس تتبيلة التندوري كانت محتاجة تتعمق أكثر في الفرخة، وبالتالي طعم قلب الفرخة ما كانش على المستوى، صحيح الطعم العام للفرخة كان كويس، لكن الكمية ما تشبعش فرد واحد حتى، خصوصًا أن الفرخة صغيرة ومافيش معاها أي طبق جانبي.

الطبق الثاني خطف كل الأضواء فعلًا، طعم التشكين كورما ومعاها حبهان وماء ورد وكاري وصوص أبيض كان هايل خصوصًا مع صوص الكاري الرائع ولمسة من الثوم والتوابل ونكهة مسكّرة بسيطة، وكل ده مع الكاجو المطحون عمل طعم هايل لمكعبات الفراخ الطرية، الطبق ده تحية لكل الناس اللي نفسها تجرب أكلة هندية أصلية.

أكيد طعم البرياني خضار -بالتوابل والأعشاب والبازلاء والجزر– كان روعة، خصوصًا لما تضيف عليه شوية من صوص التشيكن كورما اللذيذ، وغالبًا هو أحسن برياني نجربه في حياتنا.

خلصنا الأطباق الرئيسية وطلبنا جولاب جامون (34.90 جنيه)، وهو طبق من أطباق الحلو الكلاسيكية في جنوب آسيا عبارة عن كرات مقلية من الحليب المكثف مغلية في ماء ورد، نقدر نقول أن كرات الجولاب جامون اللذيذة كانت ذهبية لامعة من الخارج ودافئة وطرية من الداخل وطعمها فعلاً كان رائع، ونفس الكلام بالنسبة لصوص ماء الورد اللي كان لذيذ زي الأكلة نفسها؛ عارفين الزلابية؟ هي نفس الكلام بس النسخة الآسيوية منها؛ ودي كانت نهاية رائعة لأكلة ممتعة عليها شوية ملاحظات.

بعيدًا عن كميات الأكل القليلة وذبذبات الموسيقى المزعجة الطالعة من “أون توب” الموجود على روف المركب، مهاراني أثبت أنه من المطاعم الأصلية الحقيقية القليلة في القاهرة.