The Definitive Guide to Living in the Capital , Cairo , Egypt

تم التقييم بواسطة
Cairo 360
قيم
قيم الآن
مهراجا: أكل هندي بامتياز في المعادي

من كتر ما بنتفرج على الأفلام الهندي واللي بيجي فيها، قررنا نعيش يوم هندي من أوله لآخره، وطبعًا اليوم ده كان لازمه تجربة أكل هندي على أصوله، زي تجربتنا في مطعم (مهراجا)  فرع المعادي، وما تقلقوش، المطعم ليه 9 فروع في القاهرة، ما بين التجمع ومدينة نصر واكتوبر ومصر الجديدة، وحتى الشيخ زايد والرحاب.

الرحلة ابتدت من أول ما دخلنا من باب واقف عليه فيلين حراسة بيرحبوا بالضيوف، جو المطعم هندي بشكل طبيعي ما فيش فيه أي تكلف، الأغاني الهندي والروايح والأفلام الهندي اللي شغالة على  mbc Bollywood  ده غير إنكم ممكن تتصوروا بالعمة أو الساري الهندي لو كنتم بنات، على شوية تابلوهات متعلقة لأشهر الفنانيين الهنود، وبعض الرموز الهندية التقليدية القديمة.

المنيو في اللحظة الأولى محير، لكن لفتين في المنيو مع شرح بسيط من الموظف هتفك اللغز، المنيو بيبدأ بوجبات يومية، في الأغلب بتكفي من فردين لتلات أفراد، وبعدين المُقبلات الهندية، والشوربات والخضار المشوي بالطريقة الهندية (التنوري) ، لكن اللي كان محير بالنسبالنا إن سواء الفراخ أو اللحوم أو المأكولات البحرية مقسومة في المنيو لنصين، في منها لوحدها بدون أي إضافات وبتبقى بطريقة واحدة بس وهي ( مشوي بالتنور)، أو ممكن تلاقيها مع صلصات مختلفة، مش قولتلك منيو محير.

حاولنا ننوع في الأطباق علشان نجرب أكبر قدر ممكن من الأصناف، فبالنسبة مثلًا للأطباق الرئيسية – واللي اتقدمت في أطباق مصنوعة من فخار شكله مميز- كانت كالتالي (سبانخ تشيكن) وده عبارة عن قطع فراخ مخلية مع صوص سبانخ وبهارات هندية لذيذة جدًا، أما الطلب التاني كان ( شاهي مورج) وده عبارة عن قطع من أوراك الفراخ المخلية بس المره دي مع صوص الكاجو والكريمة وكمان البهارات الهندي، وده أكتر طبق حسسنا فعلًا إننا بناكل أكل هندي مش أي كلام، الطلب الأخير كان (مورج مكني بتر تشيكن) وده من أشهر الأطباق الهندية اللي بيقدمها (مهراجا) وهو مكون من فراخ مع صلصة طماطم وزبدة وكريمة، وسعر كل أطباق الفراخ مع مختلف أنواع الصوص هو 60 جنيه للطبق.

طلبنا أطباق جانبية زي الرز السادة ( 30 جنيه) وهو رز بسمتي معمول على البخار، وبيتقدم في حاجه زي الـ(المج) الفخار بس حجمه كبير نسبيًا، وكان طعمه مميز جدًا، وطبعًا جمب الرز كان في نوعين من العيش الهندي، (بلين نان) وده عيش هندي ساده (10 جنيه للقطعتين) و(بتر نان) وده عيش هندي بالزبدة ومخبوز في (التنور) (15 جنيه للقطعة).

المقبلات والسلطات بصراحة كانت من أفضل اللي اتقدم لنا بالرغم من أن الكمية كانت قليلة، بس لفت نظرنا (مخلل المانجا) مثلًا، طبعًا ده غير (سلطة البطاطس) المعمولة بطريقة هندية.

الصدمة الكبيرة اللي قابلتنا في (مهراجا) كانت الفرق الكبير بين حجم الأطباق في المنيو وشكلها وحجمها الحقيقي، ده غير إن الكميات كانت قليلة جدًا حتى على فرد واحد، ده في حالة إذا كنت أكيل وجعان بجد.

لكن بعد ما خلصنا، وكتعويض عن حالة عدم الشبع اللي كنا فيها، كان في هدية ظريفة من المكان في انتظرنا، وهي (آيس كريم جوز الهند الطبيعي) واللي بيتقدم في ثمره من جوز الهند الحقيقية، تمنه في المنيو (30 جنيه) لكن بيتقدم كهدية بعد الأكل، وكان طعمه رائع جدًا.

سيبك بقى من المكان التحفة، والأكل المميز (برغم إنه كمياته كانت قليلة) ، وركز في إنك مش بتدفع service ولا taxes في الفاتورة، يعني المكتوب في المنيو هوه اللي بتدفعه وبس، وفي المجمل كانت تجربة بصراحة تحسسك إنك داخل بيتك مش مطعم والسلام.

نصيحة 360

حاول تروح بدري شويه عن معادك لو رايح فرع المعادي، ويفضل ما تروحش بعربيتك إلا لو حافظ المعادي، لإن المكان يتوه و الركنات قليلة.

أحسن حاجة

 الأكل هندي بامتياز، لو فعلاً بتدور على أكل هندي جودته عالية. السيرفس سريعة و الناس ودوده جداً. المكان جوه جديد مش تقليدي.

أسوأ حاجة

المنيو مش مفهومه للوهلة الأولى، وهتحتاج حد يشرحلك. شكل الأكل في المنيو و كمياته مختلفه عن الحقيقة، الأكل كمياته قليلة مقارنةً بسعره.  

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح