The Definitive Guide to Living in the Capital , Cairo , Egypt

مطاعم
موتزاريلينا

موتزاريلينا: بيتزا وباستا وساندويتشات في صن سيتي مول

  • صن سيتي مول، الدور الخامس
  • إيطالي
تم التقييم بواسطة
Waleed Abuarab
قيم
قيم الآن
موتزاريلينا: بيتزا وباستا وساندويتشات في صن سيتي مول
إن كان فيه حاجة مميزة نذكرها قبل غيرها في المطعم ده يبقى أسعاره بالمقارنة بباقي المطاعم في نفس المكان، تجاربنا اللي فاتت في صن سيتي مول بين المطاعم اللي فيه أثبتت أن الأسعار هناك مش قليلة خالص وبـ تدفع مبلغ ضريبة وخدمة مش قليل بالإضافة للرقم اللي في الفاتورة. لكن «موتزاريلينا» ورغم شكله الأنيق كعادة كل مطاعم الدور الخامس في صن سيتي مول أسعاره حنينة جدًا وده بـ يرجع أولًا لنوعية الأطباق اللي بـ يقدمها وثانيًا علشان يكسب زبائن من نوع خاص اللي هم زوار المول اللي مش عاوزين يقعدوا في الفوود كورت ولا عاوزين يدخلوا صالة مطعم أو كافيه يقضوا فيها وقتهم، حاجة كده بين البينين.
المطعم له Theme Color أحمر مميز هـ تشوفه من بعيد، والقعدات فيه بسيطة ومريحة، مكان مخصص للأكل وبس، هـ تأكل وجبتك وأنت بـ تسمع أغاني بوب قديمة كالعادة في سماعات جودتها مش قد كده، بس ممكن تتفرج على التابلوهات الظريفة على الجدران اللي فيها رسوم لشيفات ومطابخ إيطالية من عصور مختلفة. مساحة المحل مش كبيرة بس الترابيزات نفسها كبيرة وممكن مجموعة تدخل تقعد مع بعضها على نفس الترابيزة ويأكلوا ويدردشوا سوا.
بيتزا طبعًا وباستا ولازانيا وساندويتشات لحوم ودجاج ووجبات بـ تُقدم مع الأرز أو الأسباجتي أو البطاطس وفيه بطاطس ودجز بـ تُقدم في طواجن مع اللحم المفروم والموتزاريلا وفيه عدد من السلاطات والمقبلات وأخيرًا عصائر وحلويات. سيزار سلاد مع الموتزاريلا (20 جنيه) كان أول اختيارتنا، جبل من الخس بصوص السيزار عليه كرات موتزاريلا مالهاش أي طعم ولا أي لازمة ووجهنا ملحوظتنا لمسؤولي المحل وقالو لنا أن دي طريقة معروفة في تقديم كرات الموتزاريلا النيئة مش سايحة ولا مبشورة ولا حاجة فطلبنا منهم يلغوا الطريقة دي خالص لأنها ممكن تطفش الزبائن، والحق يقال كانوا مهذبين جدًا وتقبلوا الرأي بصدر رحب. بيتزا بقطع شاورما اللحم (24 جنيه) كان حجمها مناسب جدًا لفرد واحد وطعمها لذيذ وسمكها ممتاز، يمكن بس قطع الشاورما ما كانتش فريش كفاية، بس البيتزا هنا هي أحلى حاجة. حبينا نجرب برجر موتزاريلينا الجامبو (26 جنيه) بعد ما رشحه لنا الجرسون، وفعلًا تم تقديمه بطريقة تفتح النفس زي ما بـ يُقدم في «فدركرز» مع بطاطس الودجز السميكة وحلقات البصل، لكن شتان الفرق في الطعم ونوع اللحم، البرجر هنا لحم مش صافي، لحم مخلوط بالتوابل زي البرجر اللي بـ تشتريه من السوبر ماركت. العيش بالسمسم هو أحلى حاجة في الساندويتش والبصل والخيار المخلل أضافوا بعض المذاق. يعني الساندويتش عادي جدًا مش حلو ولا وحش، بس كان دون توقعاتنا وخلاص. كولا مع الأكل (8 جنيه) وفروت سلاد بعد الأكل (12 جنيه) وانتهت وجبتنا في «موتزاريلينا» وما دفعناش كثير، دفعنا على قد مستوى الأكل تقريبًا، والخدمة المهذبة ما قدرتش تعوض نقص الخبرة، لكن المكان في النهاية ظريف ومش هـ تضايق من القعدة والأكل هناك، وجايز حظك يطلع كويس في أطباق ثانية كانت عجبانا في المنيو زي وجبة الجمبري بصوص السويت أند ساور وكبدة الدجاج ودبابيس الدجاج المقلية. هنا ممكن تأكل وجبة كاملة ومشروب وتدفع 30 جنيه أو أقل، وهي دي ميزة المطعم اللي تكلمنا عنها. جرب «موتزاريلينا» في زيارتك الجاية لصن سيتي مول في مساكن شيراتون.

نصيحة 360

من المحلات القليلة داخل المول اللي بـ تعمل دليـﭭري للمناطق القريبة.

أحسن حاجة

الأسعار وحجم البيتزا.

أسوأ حاجة

كرات الموتزاريلا والفروت سلاد.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح