The Definitive Guide to Living in the Capital , Cairo , Egypt

الاسم بـ يقول أنه “كافيه” بس الحقيقة أنه مطعم قبل ما يكون
كافيه خاصة أن أكلاته مميزة جداً ومش بـ يقدم شيشة. موجود في قلب مصر الجديدة في
الشارع الهادي اللي ورا «ماكدونالدز» الميريلاند، والمدخل عليه إضاءة بسيطة
وحواليه أشجار كثيفة وممكن ماتخدش بالك من المطعم كله لو كنت ماشي بسرعة شوية.

التصميم الداخلي والديكورعايز مقال لوحده، المصمم قدر يستغل المساحة
الصغيرة للمكان ويعمل أكبر عدد ممكن من أماكن الجلوس (حوالي 12 ترابيزة) وعلى
مسافات كافية. الإضاءة هادية قوي يعني يادوب هـ تشوف الأكل اللي قدامك، في شاشة
صغيرة جداً بـ تعرض أفلام أجنبي من غير صوت، والمزيكا اللي شغالة في السماعات لـ«فرانك
سيناترا» و«شارل أزناﭭور» وده تماشياً مع الطابع الكلاسيكي الرومانسي للمكان،
وبالمناسبة المكان مش زحمة خالص.

المطبخ واخد أكلات من كل دول البحر المتوسط، إيطالي ويوناني وفرنسي، بس
غالب عليه المعجنات الإيطالية والباستا والبيتزا.

إبتدينا بـ شوربة كريمة المشروم وشوربة الطماطم وكانت خير فاتح للشهية بـ
مزازتها وريحتها الخطيرة ومكعبات العيش المحمص اللي بـ تيجي جنبها. إخترنا طبق
رئيسي «دجاج كاردينال» وده عبارة عن قطع صدور فراخ متغطية بصوص لونه وردي بطعم
الطماطم وجبنة الناتشو ومعاه بطاطس بوريه وخضار سوتيه، الطبق كان نموذجي في الطعم
والشكل بالذات صوص الجبنة السميك اللي ممكن تغمسه بالعيش الأبيض المقرمش اللي بـ
ينزل مع الطلب. تاني طبق كان باستا «سيسيليا دي ماري» ودي مكرونة ﭘنا (قلم) بصلصة
البحر المتوسط بقطع الكاليماري والجمبري ومعاها جبنة موتزاريلا والكمية في الطبق
كانت كتير وتكفي أنها تكون وجبة كاملة لفرد، وفاجأنا «ميركادو» أن الباستا كمان
هايلة وطعم السي فوود واضح جداً وسط المكونات. طلبنا سلاطة إسمها «الأمير أندرو» –
مش عارفين إذا كان المقصود بيها الأمير أندرو حاكم «يورك» الإنجليزية – المهم أن
السلاطة كانت لذيذة وفيها قطع جبنة حلوم مشوية وكابوتشا وخوخ كُمبوت وكنتالوب
وتفاح وعليها توابل وليمون ومتستغربش المكونات دي لأن الناتج النهائي رائع لدرجة
أننا خلصناها قبل ما الطبق الرئيسي ينزل. أكتر حاجة لفتت نظرنا ان كل المكونات في
الأكل فريش جداً، الخضار السوتيه والفواكه في السلاطة والسي فوود والفراخ.

الحلويات في المنيو مش كتير وبـ تتلخص في الآيس كريم بصوصات مختلفة
وبالفواكه وفي بيتزا النوتيلا الحلوة، جربنا آيس كريم اسمه «إيزادورا» وده كاس فيه
2 بولة ڤانيليا معاها أبريق صغير فيه شيكولاتة سخنة تصبها على الآيس كريم وإستمتع
بأحلى طعم للآيس كريم.

المشروبات الباردة في المكان عبارة عن كوكتيلات خاصة بالمكان زي«بينكي» وده
فراولة على برتقال على ليمون وكان زي كل حاجة في المكان فريش ولذيذ. المشروبات
السخنة هي القهوة والإسبرسو والكابوتشينو وجربنا الـ«موكا» وكانت ممتازة زي اي
حاجة طلبناها في المطعم.

الأسعار معقولة، الأطباق الرئيسية بـ تكون بين 40 لـ 80 جنيه حسب المكونات،
والباستا كانت بـ 3 جنيه وفي بولونيز عادية بـ25 جنيه، والبيتزا حجم واحد و4 أنواع
بس وأسعارها من 25 لـ35 جنيه، الشوربة من 10 لـ15 جنيه، المشهيات والسلاطات كتير
جداً في المنيو وسلاطة «الأمير أندرو» كانت بـ25 جنيه. والحلويات والآيس كريم كلها
تقريباً بـ15 جنيه. والكوكتيلات والقهوة كلها بـ 15 جنيه تقريباً.

الخدمة ممتازة والويترز هـ يقدروا يساعدوك إنك تحدد إختياراتك وكل حاجة في
المكان نضيفة وأنيقة حتى الحمامات، ولاحظنا كمان أن مدير المحل بـ يستقبل بعض
الزباين القدام بنفسه.

لو كنت بـ تحب الهدوء والكلاسيكية يبقى أكيد هـ تحب «ميركادو».