The Definitive Guide to Living in the Capital , Cairo , Egypt

مطاعم
مينس – Mince

مينس الزمالك: منيو جديدة مالهاش حل

تم التقييم بواسطة
Ramy Soliman
قيم
قيم الآن
مينس الزمالك: منيو جديدة مالهاش حل

مينس حكاية لوحده، مينس قدم لنا تسعة أطباق مقبلات وثلاثة ساندويتشات جداد مع قسم رائع للسلايدرز وأطباق حلو جديدة مع طبق “إلفيس”، مينس أكبر مطعم برجر في القاهرة من الآخر عمل منيو جديدة مالهاش حل.

الطلعة ابتدت بواحد Loaded Nachos بـ (50 جنيه) مع Loaded Onion Rings بـ (35 جنيه) ندلع بيهم نفسنا وإحنا بنتفرج على الإبداعات الجديدة في المنيو. نبتدي مع الناتشوز اللي كانت عبارة عن عيش تورتيلا مقرمش عليه تشيلي كون كارني تحفة وصوص جبنة سايحة غنية وجواكامولي وساور كريم. فعلًا طبق هايل معمول صح الصح ويكفي عدد أفراد معقول.

بالنسبة لكوكتيل حلقات البصل والموتزاريلا ستيكس اللي بيتقدم معاهم صوص مارينارا خفيف جدًا للأسف فهو طبق فيه خمس حلقات بصل كبيرة مقليين ومقرمشين وعليهم توابل إيطالي ومليانة جبنة موتزاريلا سايحة، والحاجة الغريبة كانت البصل الأحمر اللي مش متعودين عليه، بس عمومًا هو عمل نكهة قوية ومسكرة للأكل. تفتكروا لو الكلام ده حطيناه على برجر، الطعم كان هيطلع عامل إزاي؟

نقدر نقول إن أحلى حاجة في المنيو بالنسبة لنا هي السلايدرز اللي بتخليك تقدر تجرب طعم أكتر من برجر في وجبة واحدة. بصراحة فكرة أنك مش محتاج تختار ساندويتش واحد بس من بين ساندويتشات البرجر اللذيذة وتحتار بينهم فعلًا عبقرية، واحتفالًا بالفكرة طلبنا ثلاثة سلايدرز: اختراع مينس الجديد Pulled BBQ Beef بـ (30 جنيه) مع 4 Chillis  بـ (25 جنيه) وأخيرًا Smoked  بـ (25 جنيه). السلايدرز بيكون معاها كول سلو مينس بعد التعديل، بس خلونا نبتدي بسرعة مع الباربيكيو بيف سلايدر اللذيذ وقوام البريسكيت المشوي الطري المميز الغرقان صوص باربيكيو بطعمه المسكّر وعليه بطاطس رفيعة عملت للبرجر طعم مقرمش هايل.

أما 4 Chillis فأحلى حاجة فيه اللحمة المستوية كويس جدًا والعصارية في نفس الوقت، وكمان العيش الطري اللي ماسك كل مكونات الساندويتش كويس والأربعة أنواع فلفل اللي أضافوا طعم مشطشط جميل وتوازن مع طعم البصل المسكر والجبنة السايحة الغنية. نفس الكلام ممكن نقوله على السموكد؛ قطعة البرجر عليها بصل مكرمل وجبنة مدخنة ومربى توت عملت سيمفونية من الطعم المسكر والمدخن.

خلصت رحلتنا في مينس مع Sweet Potato Ice Cream  بـ (30 جنيه) وآبل باي (40 جنيه) بالآيس كريم (15 جنيه). الطبق الأولاني عبارة عن بطاطا حلوة مفتوحة وفيها نكهة قرفة جميلة، مع بولتين آيس كريم روعة عليهم صوص كراميل. هو الطبق بسيط وخفيف، بس الطعم روعة وهو أقرب نموذج للبنانا سبليت لكن على الطريقة المصرية. فطيرة التفاح هي اللي سرقت الأضواء بحشو التفاح بالقرفة اللذيذ والعجينة المدهونة زبدة اللي مسكت الحشو كويس وماكانتش مزيتة خالص. طبعًا مش معقول تدخل على فطيرة التفاح من غير بولة آيس كريم.

على العموم، أكيد الأصناف الجديدة من مينس أضافت كتير للمنيو. يعني أطباق المقبلات تعتبر هايلة للناس اللي بتحب تشترك مع بعض في أكلات خفيفة، والسلايدرز كمان فكرتها ذكية جدًا، وطبعًا الحلويات على نفس مستوى طبق الإلفيس فرينش توست المحبوب.

نصيحة 360

أطباق الحلو الجديدة مش متاحة في كل الفروع – اتصل بيهم الأول.

أحسن حاجة

السلايدرز وفطيرة التفاح روعة.

أسوأ حاجة

صوص المارينارا الخفيف قلل كتير من جمال طعم حلقات البصل.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح