The Definitive Guide to Living in the Capital , Cairo , Egypt

  • 12 شارع عبد الحميد سليمان - العجوزة
  • 11:00 - 23:59
تم التقييم بواسطة
Mohamed Talaat
قيم الآن
نوباديا.. بساطة النوبة في قلب القاهرة

كتير من المصريين عندهم ارتباط عاطفي كبير بأسوان بشكل عام والنوبة بشكل خاص، ودايمًا بيكون حلم المصريين العاشقين للرحلات أو الناس العادية زيارة النوبة، ولأن المسافة كبيرة بين القاهرة وأسوان فزيارة بلاد الدهب بتكون صعبة نوعًا ما على البعض، واللي بيزوروها مرة بيحبوا يرجعوا لها تاني، ولكن لو مش قادرين تسافروا فتقدروا تروحوا “نوباديا”، اللي هينقلكم من زحمة وصخب القاهرة إلى روقان وهدوء النوبة.

خلال السطور الجاية هنقول لكم على كل اللي محتاجين تعرفوه عن المكان اللي جربناه مرتين في الفترة الأخيرة.

 

نوباديا هو ملتقى ثقافي نوبي مميز، بيجمع ما بين مطعم وكافيه، وبيتعمل فيه حفلات نوبية كمان، وهو عبارة عن شقة دور أرضي مع مساحة خارجية، وهناك هتلاقوا كل حاجة مرتبطة بالنوبة، والمكان عبارة عن شقة دور أرضي في فيلا، وفيه قعدة خارجية لطيفة، وكمان غرفة خاصة لو أنتم جروب وعاوزين تقعدوا مع بعض، ده غير أنكم ممكن تعملوا مشروب الجبنا أو الشاي على الفحم في نفس المكان اللي فيه شوي الأكل، ولو تعلمون نفسيًا ده عظيم، وكمان فيه القعدة الداخلية سواء في الريسبشن، أو في الغرف وكل حاجة حواليكم موجودة هتخليكم تحسوا أنكم في النوبة، وكمان بيبيعوا هدايا ومنتجات نوبية، ده غير ترابيزات موجودة عليها كل نباتات ومشروبات النوبة.

المكان بيقدم أكل ومشروبات نوبي، وده إحنا جربناه بنفسنا وكمان حضرنا الحفلة علشان ننقلكم التجربة كاملة.

طلبنا مشروب الأبرية النوبي وسعره 25 جنيه، وهو عامل زي الرقاق ولكن أخف وبيتشرب بعد ما يتعمل بالماء وممكن يضاف له ليمون أو من غير مع سكر، وهو مرطب قوي ومفيد للجسم خاصة في الحر.

طلبنا وجبة مشويات سعرها 120 جنيه، وكانت عبارة عن قطع شيش طاووق تحفة ومعاها قطعتين كفته من أجمل ما هتاكلوا من حيث التتبيلة، وربع فرخة كانت “ورك” بس ماكنتش أحسن حاجة ونتمنى تكون أفضل بعد كده.

كمان طلبنا ربع فرخة مشوية لوحدها وكان سعرها 85 جنيه، وبردوا ماكنتش ألطف حاجة في الأكل ومحتاجة تكة تظبطها، وكمان بينزل مع كل وجبة أرز مفلفل عظيم هيفرحكم، وطاجن “ويكا” ودي أكلة مشهورة جدًا في النوبة والصعيد، وطاجن “أتر” اللي هو سبانخ خضراء من اللي كلها حديد وحب دي، وتقدروا تطلبوا الويكا والإتر لوحدهم بسعر 45 جنيه للطبق، وكمان مع كل طلب بينزل عيش دوكة نوبي وهو عيش من بره خفيف ومن جوا تقيل، وتحسوه أنه نص تسوية علشان اللبة اللي فيه.

ودخلنا على الحلو، وطلبنا كابد بالعسل سعره 35 جنيه، وهو عبارة عن عيش مخصوص ومعمول بالعسل الدافئ وطعمه عظيم، ولكن يحظر على مرضى السكر علشان العسل من خير بلاده مش مغشوش.

وخلينا نوضح شوية حاجات مهمة تخلوا بالكم منها في نوباديا؛ أولًا هو بيقدم أكل وشرب ولكنه مركز ثقافي في المقام الأول، وعلشان كده مش هتقدروا تدخلوا بالأحذية جوا، ولازم تقلعوها بره ودي من عادات النوبة، فخلوا بالكم بقى، ثانيًا، لو هتطلبوا أكل فالتجهيز بياخد وقت ممكن ساعة أو أكتر لو مشويات لأنهم بيعملوا الأكل مخصوص مش جاهز، ولو هتحبوا تعملوا جبنا على الفحم فتجهيزها هياخد وقت علشان كده يفضل تحجزوا بالتليفون قبلها.

فريق العمل هناك خريجين سياحة وفنادق وهما أصحاب الفكرة، فتعاملوا على أنكم في بيتكم مش في مكان ما، وهما نفسهم بيتعاملوا بطيبة وحب وشخصية النوبة، فأستمتعوا وماتنسوش أن هما كل فترة عندهم حفلات نوبية، وإحنا حضرنا واحدة منهم وكانت لطيفة وانبسطنا، بس لازم تروحوا بدري علشان تلحقوا مكان مميز، ولو هتحضروا الحفلة ماتتعشموش بأكل غير السندوتشات علشان الضغط بيكون كبير، وزي ما قلنا الأكل بيتعمل طازة بطازة.

 

تقدروا تعرفوا أكتر عن مركز نوباديا الثقافي من خلال صفحة الفيسبوك من هنا.

نصيحة 360

استمتعوا بمشروبات النوبة والحفلات بتاعتهم وعيشوا الأجواء النوبية.

أحسن حاجة

المتعة في نقل ثقافة النوبة والمعايشة.

أسوأ حاجة

الفراخ!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح