The Definitive Guide to Living in the Capital , Cairo , Egypt

التجربة اللندنية فى الأكل مش مميزة للدرجة، وعلشان كده كان واضح لنا أن المنيو بـ تحاول تكون قريبة من الشكل اللندنى على قدر المستطاع. على مقدمة المنيو صورة لساعة بيج بن وشخصية حارس القلعة الإنجليزية المشهورة مبتسمة، بس من الداخل حسينا أنهم بـ يحاولوا يعكسوا تعدد الثقافات فى لندن. المقبلات بـ تشمل أطباق تايلاندية ومكسيكية، لكن فى الآخر اختارنا الطبق الإنجليزي المفضل حلقات البصل (15 جنيه) وكانت كميتها كبيرة وممكن تشترك فيها مع أصحابك.
تقدر تختار من بين مجموعة لذيذة من أطباق المكرونة والبرجر، مع اختيارات من اللحم أو المأكولات البحرية، مع عدد محدود من الوجبات النباتية. النموذج الإنجليزي اكتمل عند صفحة “الستيك الإنجليزى المشوى” رغم أن مش واضح إيه الإنجليزى فى الموضوع، إذا كان زى ما قالوا لنا إن اللحم أصلاً من استراليا!
من الواضح أن سكان لندن من عشاق الجبنة، علشان كثير من الأكلات كان وصفها أنها غرقانة فى الجبنة، حتى مع الجمبرى والستيك. كإضافة لطيفة للمنيو هاش بـ يقدم مجموعة من المختارات الإنجليزية المحبوبة، زى نسخة روشة من الطبق الشهير Hotpot. تقدر تشبع اشتياقك للأكلات الإنجليزية بـ 69.99 جنيه بفطيرة Hotpot بالفراخ والجبنة، أو جرب الوجبة القديمة اللذيذة، سمك مع البطاطس (59.99 جنيه). اختارنا برجر سويسرى بالمشروم والبيكون (44.99 جنيه)، وطبق من الفراخ المقلية وفاهيتا لحمة (69.99 جنيه). كميات الأكل كانت برضه ضخمة؛ البرجر كان يمثل تحدى للجبابرة مش مجرد أكلة خفيفة لبعد الظهر والفاهيتا كانت مليانة باللحم والسلاطة مع شكل جمالى مميز. لازم نعترف أن اللحم الاسترالى كان هائل فى الطبقين وشرائح الفراخ فى الفاهيتا كانت طرية ومطبوخة بامتياز.
البرجر كان بالضبط زى ما توقعنا، برج عالى من اللحم، والجبنة، والمشروم، والبيكون، مع البطاطس وسلاطة صغيرة، نقدر نقول أنها وجبة جميلة. قطع الفاهيتا كانت مقطعة مضبوط وجاهزة تؤدى دورها فى الوجبة، بس أكوام الصلصة والسلاطة عقدت الموضوع شوية. اللحم وصل فى طاسة معدن ساخنة وعليها أنواع من الفلفل والخضار المشوى.
تقدر تملأ مشروبك زى ما أنت عاوز، ودى كانت حاجة هايلة، بس اللاتيه عندهم ما كانش أكثر من كوب لبن سخن. الموظفين كل وظيفتهم أنهم يسعدوك، والشيشة اللى طلبناها كانت مخدومة كويس، بس عديمة النكهة شوية.
يمكن “هاش” مش بـ يقدم المواصفات اللندنية بحذافيرها، بس فى بعض المنتجات الإنجليزية اللذيذة قدر يعمل توفيق كويس بين المنيو الموجودة فى أماكن زى دى. لو حسينا فجأة برغبة فى hotpot، أكيد عارفين نروح على فين.