The Definitive Guide to Living in the Capital , Cairo , Egypt

وايلد برجر – Wild Burger

وايلد برجر: برجر أمريكي عملاق في مساكن شيراتون

  • 2 شارع أنقرة - مساكن شيراتون - مبنى مصر للتعمير
  • برجر
  • 0222685863,0222685862
تم التقييم بواسطة
Waleed Abuarab
قيم
قيم الآن
وايلد برجر: برجر أمريكي عملاق في مساكن شيراتون

واحد من أصدقائنا رشح لنا المكان ده بعد ما راح هو بالصدفة وعجبه الأكل
هناك جدًا، قال لنا أن المطعم ده من الآخر هو النسخة اللي أسعارها أقل من مطاعم «فدركرز»
العالمية، البرجر بالأحجام المختلفة، بوفيه السلاطات المفتوح مجانًا لما تطلب أي
طبق رئيسي، والبيبسي الـ Refill أو اللي ممكن تملأه
أكثر من مرة، وكمان شكل المحل اللي هو الأمريكان داينر أو الكنبات المواجهة
لبعضها. الحقيقة أول ما دخلنا المكان ورغم أن كل حاجة صديقنا قال لنا عليها طلعت
صح أو موجودة بالفعل، إلا أن إحساسنا طول الوقت أن فيه حاجة ناقصة أو مش حقيقية،
ممكن نقول كأنها محاكاة للمطعم الأمريكي الشهير «فدركرز» بس الفرق بين الأصلي
والتقليد دائمًا بـ يبقى محسوس ولو كان مش ملحوظ ماديًا.

«وايلد برجر» أو WB زي ما مكتوب على
اليافطة اللي بره موجود في أكثر شارع حيوي في منطقة مساكن شيراتون وهو شارع “أنقرة”
أمام المركز الرياضي اللي هناك، جنب فرع كنتاكي اللي في نفس الشارع. فيه مكانين
للجلوس داخل وخارج المحل، والديكور ظريف بألوان بنية وخشبية، وطبعًا واخد طابع
الغرب الأمريكي وفيه بعض تابلوهات ورسوم بـ تدعم ده، وموسيقى روك وبلوز شغالة معظم
الوقت لكن السماعات كان فيها مشاكل والصوت كان بـ يوِش كثير. لكن في النهاية
القعدة حلوة لأنها بسيطة واللي حببنا فيها أكثر هو الود والترحيب الحقيقي من
العاملين في المكان، واهتمامهم برأينا طول الوقت في كل حاجة في المحل، خلانا فعلًا
نحس كأننا في بيتنا ومطرحنا، ودي كانت أقوى نقطة في التجربة كلها.

منيو «وايلد برجر» مش كبير، فيه برجر مشوي على الجريل بـ 4 أحجام، من 150
جرام لـ 450 جرام من اللحم الصافي، والأسعار ثابتة لكل حجم مهما اختلفت الإضافات،
من 35 لـ 55 جنيه، ومع أي ساندويتش بـ تطلبه بـ ينزل معاه بطاطس الودجز المحمرة
وطبق تملأه زي ما أنت عاوز من بوفيه السلاطات وبار الإضافات اللي فيه جبن شيدر
سائح ومسطردة العسل والمايونيز وصوص الباربكيو وكل الحاجات دي مجانًا، والبيبسي
الـ Refill بـ 12 جنيه.
ساندويتشات الدجاج بحجم واحد بأسعار من 35 لـ 44 جنيه وفكرتنا برضه بنفس الأصناف
الموجودة في «فدركرز» زي دجاج الكاجون ودجاج الفلفل والليمون. وفيه شوربات وايلد
برجر اللي بـ تتغير من يوم للثاني وهي بحجمين بـ 15 و20 جنيه.

بدأنا بطبق مقبلات وايلد (54 جنيه) اللي فيه كل أنواع المشهيات، بافلو وينجز
وتندر تشيكن وحلقات بصل مقلي وبطاطس التشيلي وصوصات مختلفة، أسوأ حاجة في الطبق
كانت أصابع الموتزاريلا اللي كانت مش مستوية تقريبًا وحادقة زيادة عن اللزوم، بس
الطبق علشان كبير قوي كان ممكن نستغنى عن الموتزاريلا ونركز في باقي الأصناف. طلبنا
أمريكان وايلد موستانج برجر اللي بـ يُقدم
مع بيف البيكون وصوص الباربكيو والجبن الحار بالبيبر جاك (الـ 300 جرام بـ 43 جنيه)
والساندويتش كان حلو طبعًا لكن مشكلتنا في أنه كان حار بزيادة بسبب جبن البيبر جاك،
واللحم نفسه ما كانش نقي كفاية وواضح أن كان داخل فيه توابل على عكس ما قال لنا مدير
المحل بعد كده أنه لحم صافي. بيمي بيف برجر معاه مشروم سوتيه وبصل مشوي  وجبن سويسري، ده كان أحلى كثير من الأولاني،
وطعم المشروم كان تحفة، واللحم كمان طعمه باين أكثر لأن الإضافات والتوابل هنا
أقل.

الخدمة ممتازة زي ما قولنا، والأكل نزل بسرعة واستمتعنا بزيارتنا المتكررة
لبار السلاطات وماكينة البيبسي والثلج، والمكان نظيف والحمامات معقولة، والمحل بـ
يفضل فاتح لوقت متأخر يعني ممكن تعتمد عليه لحد الساعة 2 بالليل مثلًا.

«وايلد برجر» نموذج لمطاعم الأكلات السريعة الأمريكية الموجودة بالفعل
في أمريكا، لكن متوسطة المستوى منها، المجهود المبذول في المكان رائع وروح فريق
العمل مثالية، لكن ناقصهم بعض الخبرة ونتوقع أنها هـ تزيد بسرعة لأن الإقبال على
المحل كان ممتاز وقت زيارتنا.

نصيحة 360

«وايلد برجر» فيه تيك آواي وبـ يعمل دليـﭭري في مصر الجديدة والأماكن المحيطة.

أحسن حاجة

أكلة برجر محترمة، وسلاطات وبيبسي كثير وبأسعار كويسة.

أسوأ حاجة

لسه مش حاسين بشخصية مستقلة للمكان، لازم يعمل فكرة تخلينا نحس أنه مش فدركرز.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح