The Definitive Guide to Living in the Capital , Cairo , Egypt

ولعتين

ولعتين: تفوق وإمتياز في التقليد والإبداع

  • 43 شارع إسماعيل القباني
  • مأكولات سريعة
  • 0222631768,01279292995
تم التقييم بواسطة
Meriam Wagdy
قيم
قيم الآن
ولعتين: تفوق وإمتياز في التقليد والإبداع

قليل لما
الواحد بـ يلاقي مطعم تيك آواي يجمع بين: الطعم، السعر، النضافة وكمان
الأصالة. «ولعتين» بـ يجمع بين كل ده وبنجاح ساحق. المكان ابتدى من حوالي 15 سنة،
وفي الوقت ده قدر إنه يكون ليه فروع في 5 محافظات، وبأكل وأسعار زي اللي بـ
يقدمها، المطعم مش بعيد نلاقيه عالمي بعد كام سنة.

ليه فرع في
كل من المنصورة، المحلة، طنطا وكفر الشيخ، ده غير 4 فروع في القاهرة. احنا كان
لينا الحظ اننا نروح فرع مدينة نصر اللي قريب من جنينة مول وعباس العقاد. المحل
بين فرغلي، ومحل فول وطعمية. للأسف مافيهوش قعدة، والديكور بتاعه شبيه بسلاسل
الأكل السريع العالمية، ومع ذلك ليه روحه الخاصة؛ طاغي عليه اللون البرتقالي
وبكاونتر ومطبخ ظاهر من وراه مطابق للي بـ نشوفه في ماكدونالدز ولا هارديز. الفرق
الوحيد ان المنيو اللي المفروض بـ يكون ورا المسؤول عن البيع فيه الوجبات
والأسعار، كان عبارة عن أربع أو خمس رسومات لسندويتشات من غير أي معلومات. بس
كعادة المطاعم دي المنيو الورق كان على الكاونتر قصاد الكاشير، فمواجهناش مشكلة
في معرفة الأطباق والأسعار. المكان مافيهوش ترابيزات للقعاد ومع ذلك كانت مساحتة
كويسة جداً وفيه كراسي عالية للزباين اللي مستنيين الطلبات بتاعتهم.

المنيو من
أول مابصينا عليه حسينا ان المحل مقلد أكتر من سلسلة مطاعم ومافيهوش حاجة جديدة،
فتلاقي وجبة زي الـ«دينر بوكس – Dinner Box» بتاعة كنتاكي بس بـ19 جنيه (بدل 20 في كنتاكي)، وساندوتش «ڤياجرا»
الشهير بتاع كوك دوور بـ16 جنيه ونص (بدل 21 جنيه). لكن لما تركز شوية هـ تلاقي ان
تميزه انه جامع بين الحاجات المفضلة للزباين في السلاسل التانية وضايف عليها السندويتشات الخاصة بيه زي سندويتش اسمه «حريقة»! أو الحواوشي الحار والكبدة
واللحم مشوي. ده غير الـ«كوماندو» والتوربيني، والأسماء دي بـ تدل عن أحجام
السندويتشات العملاقة: الـ«كوماندو» كايزر قطره 20 سم، والتوربيني عيش فرنساوي
طوله 50 سم!! والتوربيني العملاق ده ممكن يكون فراخ (بأشكالها المختلفة بـ29.5
جنيه)، أو سي فوود (33-35 جنيه).

طلبنا «ڤياجرا»
عشان نشوف التقليد حلو ولا لأ، وكان مفاجأة سارة. الأكل صابح جداً، الطعم أحلى من
الأصلي، ومقلد «ڤياجرا» كوك دوور بمنتهى الحرفنة، الجمبري والكابوريا، الجبنة
الموزيريلا السايحة – الجمبري بالأخص كان طعمه هايل. الجميل بقى انه فيه منه حجمين
وده مش موجود في كوك دوور (الصغير بـ13.5 والكبيربـ16 جنيه). وطلبنا كمان «هوت دوج
إسكندراني» وبالرغم من إن اسمه حمسنا ليه إلا انه زي الـ«بيكيني – Bikini» بتاع كوك دوور، وكان طِعم جداً، عبارة عن هوت دوج بالفلفل الملون
وصوص الباربيكيو في عيش فرنساوي (الصغير بـ9 والكبير بـ12 جنيه). أخيراً قلنا نجرب «حريقة»
اللي المفروض يكون في صميم تخصص محل اسمه «ولعتين» واللوجو بتاعه عبارة عن فلفلتين
حارين، وكان حراء ومشطشط للآخر، وعبارة عن فراخ بانيه، قشرتها عاملة زي قشرة
الفراخ السبايسي في كنتاكي، وعليه صوص حار في عيش برضه فرنساوي. أخدنا كمان سلاطة
كلوسلو وبطاطس (بـ2.5 و5 جنيه) واللي اتنين من غير تردد كانوا أحلى ما أكلنا في
مطعم أكل سريع في البلد، لكن كمياتهم قليلة شوية بس مناسبة لحد ما مع أسعارهم.

«ولعتين» من
الأماكن اللي احنا في منتهى الإمتنان اننا لقيناه ومستنيين نشوفه عالمي قريب.

نصيحة 360

بعد ما تاخد الأكل من عندهم حلي من عند فرغلي اللي جنب المطعم على طول وبـ يقدم مشروبات فريش مبتكرة وجديدة.

أحسن حاجة

جودة الأكل الهايلة والأسعار اللي تخلي الواحد مش متردد في إنه ينُطلهم كل شوية.

أسوأ حاجة

للأسف كل الفروع في مصر الجديدة ومدينة نصر وما بـ يوصلوش لمناطق بعيدة. ويمكن كمان اللوجو والإسم يحسسوك ان المحل مافيهوش حاجة للي مابـ ياكلش حراء لكنه مليان بالإختيارات اللي ترضي كل الأذواق.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح