The Definitive Guide to Living in the Capital , Cairo , Egypt

مطاعم
يوكل – Yokal

يوكل: كبدة وسجق بمزاج في الزمالك

  • 118 شارع العزيز عثمان، الزمالك.
  • مأكولات سريعة
تم التقييم بواسطة
Dina Mokhtar
قيم
قيم الآن
يوكل: كبدة وسجق بمزاج في الزمالك

القاهرة فيها مطابخ من كل أنحاء العالم بتعمل أي أكل يخطر على بالك، لكن مع نجاح مطاعم بتقدم أكل مصري صرف، اكتشفنا إن أهل القاهرة هيفضلوا معتزين بأكل بلدهم وشايلينه في قلوبهم وعقولهم، وطبعًا معدتهم! يوكل الموجود في حارة من حارات الزمالك جنب كايرو كيتشين يعتبر واحد من أجدد المطاعم اللي بتقدم أكل مصري عريق وهو ساندويتشات الكبدة والسجق.

المكان عبارة عن أماكن للأكل ترابيزات عالية ورخام على الحيطة مع كراسي عالية على شكل أزايز كوكا كولا، والقعدة المبتكرة دي ماشية مع المنيو البسيطة اللي مافيهاش غير ساندويتشات كبدة وسجق مع كفتة وبطاطس، وصنف حلو واحد وهو “سكالانس” (7 جنيه للواحد).

يوكل كمان عاملين عرضين كومبو بيجمعوا فيهم كل حاجة في المنيو، الأول هو توتالا (60 جنيه) وفيه ثمانية ساندويتشات – منهم أتنين سكالانس –ومعاهم بطاطس ومشروبات، والتاني اللي طلبناه كان كبوت (35 جنيه) واللي يشمل كل أصناف المنيو.

الأكل وصل بعد دقيقة واحدة من طلب الأوردر، وكل ساندويتش منهم ملفوف في ورقة ومرصوصين جنب بعض في علبة، وبعد ما شوفنا حجم الساندويتشات الصغيرة عرفنا إن اختيارنا للكومبو كان صح.

البداية كانت روعة مع ساندويتش الكفتة. العيش الطازة مع الكفتة المشوية صح من بره والطرية من جوه كانت روعة، وكمان الطحينة عملت طعم هايل. بعدها كان الدور على السجق اللذيذ واللي كان خفيف ومش مزيت زي الساندويتشات الموجودة في معظم المحلات.

الكبدة كمان كانت لذيذة، والتتبيلة الجامدة مع قطع الكبدة عملوا شغل جامد، ونقدر نقول أنه أحلى ساندويتش في المنيو. البطاطس كمان كانت مقرمشة وطازة بس مافيهاش أي طعم مميز، وده بيعكس بساطة المنيو.

بعد ما جربنا كل الساندويتشات الحادقة، جه الدور على السكالانس اللي كان مسك الختام. القشطة مع الحلاوة جوه العيش المقرمش المدهون عسل كان أحلى حاجة ممكن نختم بيها أكلة عظيمة.

يوكل قدر يحقق المعادلة الصعبة؛ أكل شارع بسيط وأصناف محدودة معمولين بإتقان وسط قعدة هادية.

نصيحة 360

يوكل عندهم خدمة توصيل للزمالك؛ كلموهم على 01144494466.

أحسن حاجة

السكالانس خرافي.

أسوأ حاجة

 الساندويتشات صغيرة نسبيًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح