The Definitive Guide to Living in the Capital , Cairo , Egypt

للأسف لأ.. والخدمة كمان فيها مشاكل.. المنيو فيها أطباق إيطالية منها الغريب ومنها المعروف، لاحظنا أن الأسعار أغلى كثير من أماكن شبيهة، وبالتالى الخدمة والضريبة كمان، طلبنا فى البداية شوربة طماطم (20.99 جنيه)، وفى المقبلات كنا محتارين علشان الأصناف غريبة، الجرسون رشح لنا بريساولا Bresaola  وده بـ 39 جنيه، وهي عبارة عن لحم مدخن مع جبنة بارميزان وجرجير مع زيت الزيتون، طلبنا كمان مع أصحابنا تشيكن كوردون بلو (59.99 جنيه)، وإسكالوب ميلانو (94.99 جنيه)، وجريلد تشيكن (64.99 جنيه)، وفيتوتشيني مشروم تشيكن (45.99 جنيه) وواحد من أصحابنا طلب يشرب مع الأكل سفن أب (11.99 جنيه).
الشوربة كانت لطيفة، قوامها مضبوط وملحها كمان مقدمة فى طبق شكله شيك ومعاه قطع عيش على شكل مكعبات صغيرة محمصة، الصدمة الأولى كانت مع البريساولا، كان طعمها كأنك بـ تأكل قطع بسطرمة ومملحة جدًا وكمان الجبنة البارميزان كانت مملحة، طعمها ما كانش مستحب بالنسبة لنا وكمان ما حسيناش أن مكوناتها راكبة على بعض وما كانش فيه أى طعم لزيت الزيتون، لما الجرسون جاء يأخذ رأينا فيها اشتكينا من كونها مملحة بزيادة واعتذر لنا كثير جدًا على أنه ما كانش اقتراح نال إعجابنا وأنه ما حذرناش أنها مملحة زيادة.
ثاني حاجة أن طبق السكالوب كان المفروض معاه سوتيه وبطاطس مهروسة، جاء لنا بدلاً من السوتيه أرز، اعتذر لنا الجرسون ثاني وساب لنا الأرز ووعدنا أنه هـ ييجي لنا فى دقائق، جاء لنا بعد فترة وبرضه دش اعتذارات لأنهم بـ يحضروا الخضار فريش أول بأول فأخذ وقت، شكله كان كويس وطعمه شوية إلا أن اللى استوقفنا أنه كان مليان مياه من اللى اتسلق فيها ودى كانت حاجة غريبة!
الكوردون بلو كان طعمه غريب شوية، البطاطس المهروسة كانت حلوة وكريمي، والسكالوب كان كويس بس مضغه فى بعض الأحيان مجهود شوية، الجريلد تشيكن كانت كويسة، السفن أب جاء لنا بعد ما خلصنا أكل وده غريب لأنهم سألونا بنفسهم عاوزينها إمتى، ما جاءش لنا نفس نطلب تحلية أو مشروبات رغم أن المنيو فيها كام صنف.
كمية اعتذارات بعد ما خلصنا أكل مش طبيعية، على المقبلات.. على السوتيه اللى نسيوه.. السفن أب اللى تأخر، وزيادة عليها كمان اللخبطة اللى حصلت لما طلبنا الشيك وبعد فترة جاء لنا مدير عام المطعم يقول أن فيه غلطة حصلت فى جمع الحساب!
بعد زيارتنا للمكان تأكد عندنا أننا مش هـ يتحول عندنا مفهوم جملة “You only live once” إلى “You only come once”، المطعم لسه افتتاحه الرسمي النهارده وبقاله فترة عامل Soft Opening، إحنا عارفين أن فى الأول بـ يكون فيه شوية لخبطة وتضبيط، لكن لو ما أنتبهش المكان للملاحظات دي هـ تنطبق عليه الجملة الثانية!