The Definitive Guide to Living in the Capital , Cairo , Egypt

برو & تشو – Brew & Chew

Brew & Chew: لما تحب تذوق أطباق مختلفة بمكان واحد فى الإسكندرية

  • 52 طريق الحرية، شارع فؤاد، محطة الرمل
  • عالمي
  • 01068857667
  • 9 صباحًا - 12 صباحًا
تم التقييم بواسطة
Amira Dawoud
قيم
قيم الآن
Brew & Chew: لما تحب تذوق أطباق مختلفة بمكان واحد فى الإسكندرية

فاكر الأحلام اللي كنت دائمًا بـ تحلمها وأنت طفل أن كل حاجة حولك معمولة من الشوكولاتة؟ دلوقت الأحلام دي بقيت حقيقة.. ده اللي مكتوب على ظهر المنيو بتاعة كافيه “Brew & Chew – برو & شو” فى الإسكندرية، واللي قررنا أننا نروح نأكل فيه لأن التغيير مطلوب وكثير مننا لما بـ يحب يخرج بـ يفضل يروح مكان ما أكلش فيه قبل كده ويكون بـ يقدم أصناف مختلفة.

وعلشان نلاقي مدخل الكافيه مشينا حتة صغيرة أوي في شارع جانبي من شارع فؤاد، لأن الكافيه ده موجود ضمن مجموعة كافيهات ثانية جنبه وكلهم موجودين فى مكان اسمه L Passage واللي اليافطة بتاعته واضحة على الشارع الرئيسي.

واجهة كافيه “برو & شو” كلها زجاج، ومساحته من جوه مش كبيرة أوي، تصميمه بسيط جدًا غالب عليه الستايل المودرن، هتلاقي حوائط لونها أبيض والثانية فيها مراية طويلة يمكن علشان تعطي وسع للمكان، الأرضية خشب والكراسي والكنب كلهم جلد، وموجود كمان الترابيزات والكراسي العالية، جزء منها بـ يبص على الشارع وجزء موجود لجوه، بـ يعتمد على الإضاءة الخافتة سواء الإضاءات الجانبية أو اللي نازلة من السقف… وهـ نلاقي أنه مفتوح على الكافيه اللي جنبه على طول.

أول ما دخلنا كان الكافيه زحمة جدًا وده يمكن علشان كنا يوم الخميس، وتقريبًا كل الكافيهات والمطاعم بـ تكون يوم الخميس زحمة…  بس لاقينا ناس لسه ماشيين من على الترابيزة في مدخل الكافيه فـ قعدنا مكانهم… شوية وطلبنا المنيو، بس الجرسون نبهنا أن يوم الخميس بـ يكون فيه Minimum Charge قيمته 50 جنيه للفرد، أخذنا المنيو وعجبنا تصميمه اللي واخد نفس ستايل الكتالوجات وغلافه ألوانه مبهجة، ده غير أن طباعة ورقه من جوه حلوة وده ساعد أن صور الأكل اللي حاطينها في كل صفحة تبان بشكل يجوع بصراحة.

لاقيناهم مهتمين جدًا بوجبة الإفطار، وده لأنهم بـ يفتحوا من بدري وممكن ناس كثير تحب تروح الصبح تفطر هناك، فعندهم أطباق البيض وكرواسون وتوست وساندويتشات بأنواع كثيرة، ده غير البان كيك والوافلز، وبـ تتراوح أسعار الأطباق دي من أول 11 لغاية 30 جنيه… طبعًا فيه أنواع مختلفة من سلاطات التونة والفراخ والسلامون وغيرها وكمان المقبلات زي كويساديلا والبيتزا والفرايز والشيبسي وقطع الفراخ وكلها معمولة بطرق جديدة وبـ تبدأ أسعارها من 29 لحد 48 جنيه… نيجي بقى للأطباق الرئيسية من لحوم وفراخ وأسماك والساندويتشات والشوربة وأطباق الباستا هـ نلاقيهم بـ يقدموا أنواع كثيرة ومختلفة وأسعارها كلها بـ تبدأ من 31 لحد 95 جنيه… أما جزء الحلويات فيمكن ده أكثر جزء بـ يتميز به منيو (برو & شو)، لأننا فعلاً لقينا أنواع من الحلويات مش موجودة عند كثير من الكافيهات  والمطاعم زي مثلاً مكرونة بالشوكولاتة وشوربة الشوكولاتة وبيتزا الشوكولاتة وإكلير الكباب والآيس كريم المقلي، ده غير الشوكولاتة السايحة سواء البيضاء أو البني واللي بـ تُقدم مع أنواع مختلفة من الفواكة والشوكولاتة والمارشميلو، بالإضافة طبعًا لأطباق ثانية زي الكيكات والبراونيز والآيس كريم معمولة بطرق كثير، وأطباق الحلويات هـ نلاقي أسعارها بـ تتراوح من 23 جنيه وبـ توصل لغاية 70 جنيه، ده غير المشروبات السخنة  والباردة اللي بـ تبدأ من 12 لحد 26 جنيه.

طبعًا كان الاختيار من بين الأصناف الكثيرة دي محير جدًا، اختارنا في الأول طبق ساندويتش فاهيتا فراخ (34 جنيه) واللي كان عبارة عن ساندويتش مقسوم نصفين جواه فراخ الفاهيتا مقطعة قطع صغيرة معمولة بالبصل والفلفل الأخضر المشوي ومعاهم صوص اسمه ويسترتشاير واللي هو عبارة عن خليط من الخل والسكر والملح والأنشوجة والتمر هندي والبصل والثوم وتوابل ثانية، وعلى فكرة الصوص ده بـ يستخدموه كثير في الدول الأوربية، وجنب الساندويتش معاه بطاطس محمرة وكمية صغيرة من سلاطة الكول سلو… طلبنا برضه طبق باستا بالسي فوود (52 جنيه) واللي كان عبارة عن مكرونة بِنا عليها كمية من قطع الكاليماري والجمبري الصغير وقطع من لحم الكابوريا عليهم صوص ثقيل شوية لونه وردي ومرشوش على وجه الطبق بقدونش وجبنة شيدر مبشورة… جاء الأكل تقريباً بعد نصف ساعة وكانت ميزته أنه سخن وكميته تشبع.

طبعًا كنا لازم نذوق من الحلويات، فطلبنا برادايس كيك (28 جنيه) واللي كانت عبارة عن مربع من الكيك معمول بالقرفة عليها بولة آيس كريم فانيليا ومحطوط على الوجه كراميل كثير، والطبق ده جاء لنا تقريبًا بعد عشر دقائق.. بعدها قولنا نشرب حاجة فطلبنا كافيه لاتيه ( الوسط بـ 17 جنيه) وميلك شيك شوكولاتة (22 جنيه) وعصير ليمون (17 جنيه)، وميزة المشروبات بصورة عامة أنها معمولة مضبوط، فمثلاً الميلك شيك في أماكن كثير بـ يكون عبارة عن ثلج، لكن هناك كان طعم الشوكولاتة ممتع أكيد.

وكانت ميزة موقع كافيه “برو & شو – Brew & Chew” أننا بعد ما خلصنا خرجنا نتمشى في شارع فؤاد اللي بـ يعتبر من الشوارع الحيوية جدًا في الإسكندرية.

نصيحة 360

علشان تذوق أنواع كثير من الحلويات حاول ما تأكلش قبلها بأسبوع.

أحسن حاجة

الأكل مش بـ يتأخر وأسعاره كويسة ومعمول بطرق مختلفة وحلوة.

أسوأ حاجة

أنك ممكن تفضل مستني شوية لغاية لما مكان يفضى داخل الكافيه، خاصة في الأيام الزحمة، وده لأن مساحة الكافيه صغيرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح