The Definitive Guide to Living in the Capital , Cairo , Egypt

“السخنة” زي ما بعض القاهريين
بـ يسموها، مشهورة ببحرها الهادي وجوها الحلو قوي في الشتا لكن حر جداً في الصيف
(حر مايستحملهوش إلا المصريين من محبي شهر أغسطس)، المكان مشهور وعليه إقبال بصورة
خاصة لأنه قريب من القاهرة، فتلاقي كتير من اللي عاوزين يستثمروا في بيت مصيف، بـ
يشتروا هناك، وده قد يكون أحد أسباب أسعار العقارات والفنادق المرتفعة في المنطقة،
لدرجة أن في فنادق في «السخنة» الليلة فيها أغلى من الغردقة وشرم الشيخ. واحد من
الفنادق اللي مش غالية نسبياً في السخنة هو «أميجو – Amigo».

العين
السخنة خدت إسمها من منطقة العيون الكبريتية اللي إتكونت عند «جبل عتاقة» شمال
الصحراء الشرقية وهي على ساحل البحر الأحمر وعلى بعد ساعة بس من القاهرة وتابعة لمحافظة
السويس. أما طريق العين السخنة الصحراوي من القاهرة فهو هادي وأمان، السرعة القصوى
فيه 120 كم/ساعة، وبـ ننصحك إنك ما تسرعش لو مافيش إحتياج لده (مصر للأسف من أوائل
الدول في العالم في عدد ضحايا حوادث السيارات). المنظر على الطريق رائع لأن الطريق
شاقق الجبل والجبل حاضنه في منظر هـ يسرق عينيك من على الطريق (فركز!). المشكلة أن
مافيش إستراحات على الطريق ولا محطة بنزين فإتأكد إنك ممون ومعاك لوازم طريقك قبل
ما تسيب القاهرة.

بعد
ما تعدي بوابة مدينة السويس وبالتحديد بعد 20 كم في إتجاه الشمال هـ تلاقي فندق «أميجو»
الصغير والبسيط بالمقارنة لمشاهير «السخنة» زي «ستيلا دي ماري – Stella Di Mare» أو «پالميرا – Palmera». وأرخص كتير طبعاً، يعني مثلاً
إقامة كاملة (Full Board) في غرفة مزدوجة هـ تكلفك 450 جنيه، ولو فطار وعشا بس (Half-Board) هـ تبقى بـ 350 أو 375 جنيه و ده
على حسب الموسم، وغرفة ثلاثية بـ 515 جنيه في الليلة لو إحتجت سرير زيادة هـ يبقى
سعره بين 140 و160 جنيه. والأسعار دي هايلة بالمقارنة بـ810 جنيه في الليلة في «پالميرا»
أو أكتر من 1200 جنيه في «موفنپيك – Mövenpick».

غرف
الفندق لطيفة ونضيفة وبسيطة بالقدر الكافي، وفي حمام سباحة صغير في الفندق بس
نادراً لما حد بـ يستخدمه؛ طبيعي إذا كان البحر الاحمر كله موجود! الشاطئ قدام
الفندق مساحته صغيرة بس عمره ما بـ يتزحم، وده بـ يخليك حاسس بالخصوصية أكتر،
وصفحة المية معظم الأيام بـ تكون رايقة وهادية قدامك.

وجبة
الفطار بـ تبقى من 8 لـ10 الصبح، ودايماً بـ تكون أومليت، هوت دوج متقطع بالصوص
والبصل، جبنة، وزبدة ومربى بـ تيجي مع العصير والشاي. العشا من 6 لـ8 بالليل وهما
طبقين أساسيين إما فراخ أو لحمة وجنبها الشوربة والخضار والسلطة. بعد الأكل ممكن
تتمشى على الپلاﭺ وتستمتع بالهدوء الشديد ومنظر البحر الأحمر العبقري بالليل.

في
كمان 2 سوبر ماركت على الناحية التانية من بوابة المنتجع لو حبيت تشتري أي حاجة
ناقصاك، وفي محل كبابجي ومحل أسماك قريب لو حبيت تاكل من برة الأوتيل، ممكن كمان تطلب
ديليڤري يوصلك للأوتيل.

منتجع
«أميجو» بـ يعتبر فندق 3 نجوم وإختيار جيد لو حبيت تقضي أجازة في العين السخنة من
غير ما تدفع كتير. وميزة العين السخنة الخطيرة إنها مالهاش موسم صيفي أو شتوي وتقدر تروحها في أي وقت في السنة وهـ تلاقي جوها مناسب دايماً حتى لو المية ساقعة شوية في
الشتا أو الشمس قوية شوية في الصيف.

لو
عايز تستعلم أو تحجز هناك ممكن تكلم الأرقام دي: 06-23410000،06-23410001 ، 06-23410002.