المتحف المصري الكبير يفتح أبوابه في نوفمبر.. كل اللي محتاج تعرفه قبل الافتتاح
افتتاح المتحف الآثار المصرية الحضارة المصرية السياحة في مصر المتحف المصري الكبير توت عنخ آمون مراكب الشمس
Cairo 360
الصور: صفحة المتحف على فيسبوك
مصر بتستعد لحدث عالمي مهم هيكون في الأول من نوفمبر الجاي، وهو افتتاح المتحف المصري الكبير. حاليًا بيحطوا اللمسات الأخيرة، بعد ما خلصوا تقريبًا كل حاجة جوه.
مصدر مطلع أكد لـكايرو360 إن كل الفتارين جهزت خلاص، حتى الخاصة بقاعة الملك توت عنخ آمون. اللي فاضل يوصل المتحف المصري الكبير دلوقتي هو القناع الذهبي، والعرش الملكي، والتابوت الذهبي، ولسه ما تحددش ميعاد نقلهم.
كمان خلصوا متحف مراكب الشمس، واللاند سكيب، ومحاكاة نهر النيل اللي قدام المركب.
اللي شغالين عليه دلوقتي مجرد شوية تفاصيل بسيطة زي الإضاءة. إنما المبنى خلص بالكامل، على مساحة أكتر من 300 ألف متر مربع، وبيضم قاعات عرض تعتبر أكبر من متاحف كاملة في مصر والعالم.
ما يفوتكش كمان: المتحف المصري الكبير 2025: 12 فئة هيدخلوا مجانًا.. هل أنت منهم؟
المتحف المصري الكبير مش مجرد مكان للآثار، ده مشروع حضاري ضخم بيجمع آلاف القطع الفريدة. من أهمها المجموعة الكاملة لكنوز الملك توت عنخ آمون اللي هتتعرض لأول مرة كلها من ساعة اكتشاف مقبرته سنة 1922. وكمان مجموعة الملكة حتب حرس أم الملك خوفو، ومتحف مراكب الملك خوفو، ومقتنيات من عصور ما قبل الأسرات لحد العصر اليوناني والروماني.
غير القاعات، المتحف فيه كمان أماكن للأنشطة الثقافية، متحف للأطفال، مركز تعليمي، سينما، قاعات مؤتمرات، ومناطق تجارية فيها محلات وكافيهات ومطاعم، وكمان حدائق واسعة للزوار.
المكان معمول بأحدث تقنيات العرض المتحفي، مع نظام توثيق ورقمنة للقطع الأثرية، وترميم وصيانة مستمرة. يعني تجربة متكاملة هتخلي المتحف المصري الكبير نقطة جذب عالمية تستحق الزيارة.
مقترح
الحياة في كايرو
جدول مواعيد قطارات القاهرة للإسكندرية والإسماعيلية ومرسى مطروح للهروب من حر الصيف
السفر بالقطار جدول مواعيد القطارات +4
معالم وسياحة
