The Definitive Guide to Living in the Capital , Cairo , Egypt

لو بتدور على خروجة مختلفة في إجازة نصف العام 2026، تجمع بين المتعة والمعرفة، وفي نفس الوقت مناسبة للأسرة والأطفال، فالمتحف الجيولوجي المصري في المعادي عنده مفاجأة خاصة جدًا. مش بس زيارة لمكان تاريخي وعلمي مهم، لكن كمان هدية مميزة هتاخدها معاك وانت خارج. لحد نهاية إجازة نصف العام الدراسي، كل زائر للمتحف هيحصل على نموذج ديناصور تذكاري، يخلي الزيارة ذكرى حقيقية ومختلفة.

المتحف الجيولوجي المصري قرر يحول الزيارة لتجربة متكاملة، مش مجرد جولة بين قاعات عرض. الهدية اللي بيقدمها لكل زائر خلال شهر يناير وحتى انتهاء إجازة نصف العام، نموذج ديناصور تذكاري، بتبقى بمثابة بطل الرحلة وذكرى تعليمية ممتعة، خصوصًا للأطفال والنشء.

أول ما تدخل المتحف، هتحس إنك خرجت من زمنك الحالي ورجعت ملايين السنين لورا. في قلب القاهرة وعلى كورنيش المعادي مباشرة، هتلاقي واحدة من أهم الكنوز العلمية في مصر. أبرزها جمجمة ديناصور الفيوم، كائن ضخم عاش من حوالي 40 مليون سنة، ومعروض قدامك جزء حقيقي من هيكله بنسبة تقارب 15 بالمية، تم اكتشافه على أرض مصر.

ما يفوتكش كمان: المتحف الجيولوجي المصري.. ويك إند مختلف مع الديناصورات والأحجار الكريمة في قلب المعادي!

التجربة ما بتقفش عند الديناصورات بس. المتحف بيضم مجموعة مبهرة من الأحجار الكريمة، في دولاب كامل فيه الياقوت والزمرد والماس، ومع شرح بسيط وسلس عن إزاي العلماء بيقيموا جمال وقيمة كل حجر. كمان هتشوف صخور فيها ذهب خام، قبل أي مراحل تصنيع أو تلميع، وده بيخلي الزيارة أقرب لرحلة استكشاف حقيقية.

الخروجة دي مناسبة جدًا للي عاوزين يبعدوا عن زحمة المولات والسينمات، ويدوروا على تجربة مختلفة، تعليمية وممتعة في نفس الوقت. الأطفال بيطلعوا مستمتعين، والكبار بيكتشفوا تفاصيل كتير ما يعرفوهاش عن تاريخ الأرض في مصر.

وفي الآخر، الهدية التذكارية وهي نموذج الديناصور بتخلي الزيارة ما تخلصش عند باب المتحف، لكنها تكمل في البيت كذكرى مرتبطة بالعلم والاكتشاف.

معلومات الزيارة

العنوان: أول كورنيش المعادي، بعد البنزينة على الشمال وانت جاي من الملك الصالح.

مواعيد الزيارة: يوميًا من 9 صباحًا لـ3 عصرًا، ماعدا الجمعة والسبت والإجازات الرسمية.

سعر التذكرة: 25 جنيه.