من فترة طويلة كان نفسنا نتكلم عن التجربة السينمائية للنجم محمد رمضان.. الشاب اللي قدر يخالف توقعات معظم الناس له بأنه مش هيكمل، ويثبت نفسه في عالم الفن، ويقدم مجموعة من الأفلام في منطقة هو وحده المسيطر على تفاصيلها وعارف ينفذها كويس.
محمد رمضان المولود في 1988 كان بيتوجه له انتقادات كتيرة في الفترة الماضية إنه حصر نفسه في أدوار الأكشن اللي بتظهره كبلطجي.. محمد واجه انتقادات كتيرة بخصوص الأفلام اللي قدمها مع المنتج محمد السبكي، ولأننا لو أختلفنا على قوة أفلام محمد رمضان مش هنقدر نختلف على ذكاؤه الفني، فمن الواضح أن رمضان بيحاول يفتح سكك جديدة ويكتسب أرض جديدة ويعمل نقلة نوعية في الجمهور اللي بيتابع أفلامه، علشان كده بدأ يقدم حاجة جديدة بعيدة عن أفلام البلطجة والأكشن، وهي الأفلام اللايت كوميدي.
فيلم آخر ديك في مصر من تأليف أيمن بهجت قمر، وإخراج عمرو عرفه وبطولة مي عمر وهالة صدقي وإنجي وجدان وملك قورة.
الفيلم بيحكي عن الشاب علاء الدين، أو محمد رمضان، واللي بيتعرض لحادثة أثناء رحلة في النيل، الأمر اللي بيجعله آخر رجل متبقي من عائلة الديك اللي بيتبعها، ومن هنا بتبدأ مجموعة كبيرة من المواقف الكوميدية مع نساء العائلة.
لأن مستوى الكتابة والأخراج فى الفيلم متميزين، كان لازم تكون النتيجة أن مستوى الكوميديا في الفيلم يكون جيد جدًا ومتميز، لكن في رأينا أن محمد رمضان لسه مش متعود على تأدية الأدوار الكوميدية بنفس القوة اللي بيقوم بها بأدواره التانية، إحنا عارفين أنه قدم قبل كده فيلم واحد صعيدي واللي كان برضه فيلم كوميدي، لكن شتان بين كوميديا واحد صعيدي وبين كوميديا آخر ديك في مصر.. الفرق بين الفيلمين زي الفرق بين الفندق الخمس نجوم والفندق النجمة الواحدة! وطبعًا الفرق ده كان في صالح آخر ديك في مصر.
مستوى الديكورات في الفيلم كان متميز، وكان واضح الفخامة والبذخ الإنتاجي، لكن مستوى الموسيقى التصويرية كان أقل بكتير من الديكورات، وبشكل عام مش بنتوقع كتير من الموسيقى والديكورات لما بيتعلق الأمر بفيلم كوميدي خفيف في موسم الأجازات.
من الواضح أن الفيلم بينتصر للمرأة، وبيعرض تحول شخصية محمد رمضان من كاره للمرأة، أو حتى عرضة لمقالب بتخليه يظهر في شخصية عدو المرأة، لشخص محب للأنثى وبيقول : المرأة كالمظلة تحميك من المطر إذا وضعتها فوق رأسك، وده فيه انتصار كبير للمرأة، ومن الواضح أن دي كانت رسالة الفيلم، بالإضافة للكوميديا فيه.
آخر ديك في مصر فيلم كوميدي لايت برسالة بسيطة ومباشرة، ننصح بمشاهدته في موسم الأجازة ببال رايق وبدون توقعات مسبقة كبيرة.
علشان تبقى عارف: الفيلم يعتبر التعاون الثاني على التوالي بين المخرج عمرو عرفة والكاتب أيمن بهجت قمر بعد فيلم (من 30 سنة).
