The Definitive Guide to Living in the Capital , Cairo , Egypt

أحيانًا بنلاقي نفسنا عاوزين نتفرج على فيلم من أفلام مرحلة الطفولة أوالشباب، وكتير بنشوف فيديوهات على السوشيال ميديا أو حتى حلقات من مسلسلات زي “الكبير قوي” وغيرها بتتريق على الأفلام اللي كانت مكسره الدنيا في التسعينات، أهو هو ده تحديدًا اللي بيلعب عليه فيلم “الطيب والشرس واللعوب”.

الفيلم بيحكي عن مجموعة من الفنانين اللي كانوا نجوم شباك في مرحلة التسعينات، ومع الوقت فقدوا شهرتهم وانحسرت عنهم الأضواء، لكن هتجمع بينهم الظروف تاني مع بعض علشان يقدموا عمل جديد يعيد تقديمهم للأضواء.

الكوميديا في الفيلم نابعة من المواقف الكوميدية اللي بتقابل الأبطال “مي كساب” و”أحمد فتحي” و”بيومي فؤاد” و”محمد سلام” وهما بيعملوا الفيلم بتاعهم، وفي جزء من الكوميديا كمان بتولده التريقة على أفلام التسعينات والمبالغة في الأداء التمثيلي اللي كان منتشر أيامها، ده غير الحبكات المحروقة اللي بقينا حافظينها، والحقيقة إن الكوميديا في الفيلم جيدة سواء في كميتها أو في أسلوبها اللي بتتقدم به.

بالنسبة للأداء التمثيلي في الفيلم فكان جيد، وكل شخصية كانت بتحاول تقدم طول الوقت أفضل حاجة عندها في الكوميديا، لكن المميز كمان هو التعاون بين أبطال الفيلم وتوزيع الإيفيهات والمساحات الكوميدية على كل الممثلين بالتساوي تقريبًا علشان يطلع الفيلم في النهاية كوميدي من أول لآخر لقطة.

لكن للأسف كان عندنا مشكلة مع نهاية الفيلم اللى حسينا إنها جت بسرعة، وبشكل مش مفهوم، ويمكن ده واحد من أكبر عيوب الفيلم.

أما المؤلف “رأفت رضا” فقدر إنه يكتب الفيلم بشكل جيد، لكن مع قرب النهاية حسينا إنه بقى مستعجل وماقدرش يحافظ على فكرة السخرية من أفلام التسعينات على طول الخط، وده أثر سلبًا على الفيلم، لكن من ناحية تانية، شوفنا إن فكرة الأفلام اللي بتتعمل بهدف السخرية من الأفلام التانية تعتبر من التيمات القليلة عندنا في السينما العربية، وده خيط يستحق التمسك به على طول خط الفيلم.