-
كريم محجوبمحمد جمال...
-
حركة ومغامرات
-
عثمان أبو لبن
-
في1 Cinema
Mohamed Hamdy
ملاحظة مزعجة بدأنا نلاحظها مؤخرًا، وخاصة مع وفاة عدد كبير من نجوم الصف الأول في الفترة الماضية زي محمود عبد العزيز ونور الشريف، ومن قبلهم أحمد زكي وغيرهم. إن مافيش أجيال جديدة من الشباب قادرة على تعويضنا عن النجوم دول، أو تقديم أداء تمثيلي قريب من الأداء التمثيلي لهم.
ووجود الفجوة دي واستمرارها لوقت طويل، بيهدد صناعة السينما في مصر لعدم وجود أسماء شباب قادرة على الوصول للريادة زي زمان. علشان كده كنا مبسوطين من مشاركة الشباب في بعض الأعمال الدرامية زي مسلسل الأب الروحي على سبيل المثال.
لكن للأسف محاولة القائمين على فيلم (بترا: بوابة الزمن) بائت بالفشل، وماقدرش صناع الفيلم يقدموا مجموعة من الشباب علشان يقوموا ببطولة الفيلم، وفشل الفيلم في تحقيقي إيرادات تذكر في أيام عرضه الأولى.
فريق العمل
الفيلم من تأليف مي مسحال، ومن إخراج عثمان أبو لبن، ومن بطولة كريم محجوب ومحمد جمال وميرنا نور الدين ونور أبو سنينة ونبيل كوني. وزي ما إحنا ملاحظين أن كل أبطال الفيلم من جيل الشباب، وفي الغالب كلهم من اللي أول مرة يظهروا على الشاشة ماعدا زياد يوسف اللي قام قبل كده بأدوار في مسلسلات المطلقات وعيون القلب وغيرها.
كمان ميرنا نور الدين شاركت قبل كده في مسلسلات الحصان الأسود وسقوط حر وتحت السيطرة وغيرها من الأعمال.
قصة الفيلم
الفيلم بيحكي عن مجموعة من الشباب بتتجه لمنطقة صحراوية قديمة في الأردن مشهورة بتاريخها العتيق وأثارها المتميزة، لكن مجموعة من الأحداث الصعبة بتحصل لهم، بشكل بيخليهم يعيدوا اكتشاف أنفسهم من جديد.
الإخراج
للأسف المخرج عثمان أبو لبن على الرغم من اهتمامه الدائم بالشباب، وتقديم عدد كبير من الشباب من خلال أعماله السينمائية والدرامية، في رأينا ماقدرش يقدم مجموعة الشباب اللي كانوا شغالين معاه في الفيلم بشكل كويس. لكن مش هو لوحده المسئول.
القصة والسيناريو
لا يمكن ننسي مسئولية القصة الضعيفة والسيناريو اللي كان فيه فجوات كتير، كل العوامل دي أثرت على خط سير الدراما في الفيلم، وقدمت في الأخر سيناريو ضعيف وقصة غير مترابطة بشكل كبير.
الديكورات والموسيقى
يمكن الشيء الوحيد المميز في الفيلم كان الديكورات والموسيقى، والحقيقة أن اختيار أماكن التصوير والاهتمام بالتصوير في أماكن حقيقية، واستخدام زوايا تصوير مميزة كان من المميزات اللي تحسب للفيلم، كمان الموسيقى التصويرية وأغنية الفيلم اللي أدتها الفنانة سميرة سعيد، كل دي أمور عجبتنا في الفيلم.
الخلاصة:
لازم المخرجين والمنتجين والمؤلفين يهتموا أكتر بـإعداد جيل من الشباب الممثلين، علشان نقدر نرجع لريادة عالم السينما والدراما في مصر من جديد.
علشان تبقى عارف:
تم تصوير الفيلم في الأردن.